ຮອງນາຍົກ ເນັ້ນໃຫ້ເມືອງໝອກ ແຂວງຊຽງຂວາງ ພັດທະນາເສດຖະກິດແກ້ໄຂຄວາມທຸກຍາກ

ວັນທີ 18 ກຸມພາ 2024, ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ພ້ອມດ້ວຍຄະນະ ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງໝອກ ແຂວງຊຽງຂວາງ ເຊິ່ງທ່ານໄດ້ເນັ້ນໃຫ້ເອົາໃຈໃສ່ນຳພາ – ຊີ້ນຳ ຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານປັບປຸງກໍ່ສ້າງພັກໃຫ້ປອດໃສເຂັ້ມແຂງໜັກແໜ້ນ, ວຽກງານສ້າງພະນັກງານນຳພາຄຸ້ມຄອງ, ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ, ແຂວງ ໃຫ້ປະສົບຜົນສຳເລັດຕາມແຜນທີ່ກຳນົດໄວ້, ຄົ້ນຄວ້ານຳໃຊ້ ແລະ ເສີມຂະຫຍາຍທ່າແຮງບົ່ມຊ້ອນຂອງເມືອງໃຫ້ມີປະສິດທິຜົນສູງ ເພື່ອການສ້າງສາພັດທະນາໃຫ້ໄດ້ຮັບຜົນດີເປັນກ້າວໆ, ເອົາໃຈໃສ່ວຽກງານແຂ່ງຂັນຮັກຊາດ ແລະ ພັດທະນາ, ວຽກງານການແກ້ໄຂຄວາມທຸກຍາກ, ຄົ້ນຄ້ວາ ເຊື່ອມຊຶມ ບັນດານິຕິກຳຕ່າງໆ ຂອງຂັ້ນເທິງໃຫ້ເຂົ້າສູ່ລວງເລິກ, ຊຸກຍູ້ ສົ່ງເສີມວຽກງານການທ່ອງທ່ຽວ ໃນປີທ່ອງທ່ຽວລາວ 2024 ຢ່າງແຂງແຮງ, ວຽກງານການຮ່ວມມືກັບຕ່າງປະເທດ ໂດຍສະເພາະກັບບັນດາປະເທດເພື່ອນມິດຍຸດທະສາດ ແລະ ຄູ່ຮ່ວມພັດທະນາຢູ່ພາຍໃນທ້ອງຖິ່ນຂອງຕົນໃຫ້ມີປະສິດທິພາບ ແລະ ປະສິດທິຜົນສູງ.

ທົ່ວເມືອງໝອກ ມີ 28 ບ້ານ 4 ກຸ່ມ, ມີ 1 ຈຸດສຸມພັດທະນາຂອງກະຊວງປ້ອງກັນປະເທດ, ມີ 2.590 ຄອບຄົວ, ພັນລະເມືອງ 16.430 ຄົນ, ລາຍຮັບບັນລຸ 239,59 ຕື້ກີບ, ເສດຖະກິດຂະຫຍາຍຕົວ 5,25% ທຽບໃສ່ແຜນການຫລຸດຄາດໝາຍ 0,25% ສະເລ່ຍໄດ້ 14 ລ້ານກວ່າກີບ ຕໍ່ຄົນຕໍ່ປີ ທຽບໃສ່ແຜນການປີປະຕິບັດໄດ້ 98,65%.