OECD ຄາດວ່າເສດຖະກິດໂລກຈະເຕີບໃຫຍ່ 2,9% ໃນປີ 2024
ວັນທີ 5 ກຸມພາ, ລາຍງານທ່າອ່ຽງຈາກອົງການເພື່ອການຮ່ວມມື ແລະ ການພັດທະນາທາງເສດຖະກິດ (OECD) ຄາດຄະເນການເຕີບໃຫຍ່ຂອງລວມຍອດຜະລິດຕະພັນພາຍໃນ (GDP) ທົ່ວໂລກຈະຫລຸດລົງຈາກ 3,1% ໃນປີ 2023 ເຫລືອ 2,9% ໃນປີ 2024 ກ່ອນຟື້ນຕົວເປັນ 3% ໃນປີ 2025 ເມື່ອສະພາບການເງິນຜ່ອນຄາຍ.
ລາຍງານລະບຸວ່າ: ການເຕີບໃຫຍ່ຂອງລວມຍອດຜະລິດຕະພັນພາຍໃນແຕ່ລະປີຢູ່ອາເມລິກາອາດຢູ່ລະດັບ 2,1% ໃນປີ 2024 ແລະ 1,7% ໃນປີ 2025 ໂດຍຄາດວ່າຈະຍັງໄດ້ຮັບແຮງສະໜັບສະໜູນຈາກການໃຊ້ຈ່າຍຂອງຄົວເຮືອນ ແລະ ສະພາບການທີ່ດີຂອງຕະຫລາດແຮງງານ, ສ່ວນການເຕີບໃຫຍ່ຂອງລວມຍອດຜະລິດຕະພັນຢູ່ເອີຣົບ ຄາດວ່າຈະຢູ່ລະດັບ 0,6% ໃນປີ 2024 ແລະ 1,3% ໃນປີ 2025 ເນື່ອງຈາກກິດຈະກໍາທີ່ຢຸດສະງັກຈາກເງື່ອນໄຂສິນເຊື່ອທີ່ເຂັ້ມງວດໃນອະນາຄົດອັນໃກ້ ກ່ອນກັບມາຟື້ນຕົວຕາມລາຍໄດ້ທີ່ແທ້ຈິງທີ່ແຂງແຮງຂຶ້ນ.
ອົງການເພື່ອການຮ່ວມມື ແລະ ການພັດທະນາທາງເສດຖະກິດ ຍັງລາຍງານວ່າ: ການເຕີບໃຫຍ່ທົ່ວໂລກມີຄວາມຫົດຢືດໃນປີ 2023 ຈາກສະພາບເງິນເຟີ້ຫລຸດລົງຢ່າງວ່ອງໄວກວ່າການຄາດຄະເນໄວ້ ໂດຍຄາດວ່າສະພາບເງິນເຟີ້ຈະກັບສູ່ລະດັບເປົ້າໝາຍໃນກຸ່ມສະມາຊິກ G20 ສ່ວນຫລາຍພາຍໃນປີ 2025.
ອົງການເພື່ອການຮ່ວມມື ແລະ ການພັດທະນາທາງເສດຖະກິດ ກ່າວວ່າ: ອັດຕາເງິນເຟີ້ທົ່ວໄປໃນກຸ່ມສະມາຊິກ G20 ຄາດວ່າຈະຫລຸດລົງຈາກ 6,6% ໃນປີ 2024 ເຫລືອ 3,8 ໃນປີ 2025, ສ່ວນອັດຕາເງິນເຟີ້ພື້ນຖານໃນກຸ່ມສະມາຊິກ G20 ທີ່ພັດທະນາແລ້ວ ຫລຸດລົງເຫລືອ 2,5% ໃນປີ 2024 ແລະ 2,1 ໃນປີ 2025.
ຄວາມເຄັ່ງຕຶງທາງພູມສາດໃນລະດັບສູງຖືເປັນຄວາມສ່ຽງສໍາຄັນໃນອະນາຄົດຕໍ່ກິດຈະກໍາ ແລະ ສະພາບເງິນເຟີ້ ໂດຍສະເພາະຄວາມຂັດແຍ່ງຢູ່ຕາເວັນອອກກາງສົ່ງຜົນກະທົບຕໍ່ຕະຫລາດພະລັງງານ.
ລາຍງານຍັງກ່າວອີກວ່າ: ຮາກຖານສໍາລັບການເຕີບໃຫຍ່ໃນອະນາຄົດຈໍາເປັນຕ້ອງໄດ້ຮັບການສົ່ງເສີມຄວາມແຂງແຮງດ້ວຍການປະຕິຮູບນະໂຍບາຍ ແລະ ຈໍາເປັນຕ້ອງປັບປຸງການຮ່ວມມືລະຫວ່າງປະເທດ ເພື່ອຟື້ນຟູການຄ້າທົ່ວໂລກ, ຮັບຮອງຄວາມກ້າວໜ້າທີ່ວ່ອງໄວ ແລະ ດີຍິ່ງຂຶ້ນໃນການຫລຸດການປ່ອຍກາກບອນ ຕະຫລອດຈົນບັນເທົາສະພາບໜີ້ສິນໃນກຸ່ມປະເທດລາຍໄດ້ຕໍ່າ.
