ເຈົ້າເມືອງຊີ້ແຈງ ກໍລະນີປາຕາຍຈຳນວນຫລາຍຢູ່ບ້ານຄົກເຂົ້າດໍ ເມືອງຊະນະຄາມ
ວັນທີ 6 ກຸມພາ 2024 ຜ່ານມານີ້ ມີປະຊາຊົນສ່ອງແສງວ່າ ມີປາຕາຍຈຳນວນຫລາຍ ແລະ ມີກິ່ນເນົ່າເໝັນຢູ່ຫ້ວຍນໍ້າທຳມະຊາດ ເຂດບ້ານຄົກເຂົ້າດໍ, ເມືອງຊະນະຄາມ, ແຂວງວຽງຈັນ ໂດຍບໍ່ຮູ້ສາເຫດ ພ້ອມໄດ້ຮຽກຮ້ອງເຖິງພາກສ່ວນກ່ຽວຂ້ອງລົງກວດກາ ແລະ ແກ້ໄຂ.
ຫລ້າສຸດ ວັນທີ 8 ກຸມພາ 2024 ນີ້ ທ່ານ ແກ້ວ ພິມມະວົງ ເຈົ້າເມືອງຊະນະຄາມ ໄດ້ຊີ້ແຈງຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ວ່າ: ຜ່ານການກວດກາຕົວຈິງຂອງເຈົ້າໜ້າທີ່ກ່ຽວ ຂ້ອງຂອງເມືອງເຫັນວ່າ ຂ່າວດັ່ງກ່າວມີມູນຄວາມຈິງແທ້ ຊຶ່ງສາເຫດຂອງປາຕາຍແມ່ນເກີດມາຈາກອ່າງບໍາບັດນໍ້າເປື້ອນຂອງໂຮງງານມັນຕົ້ນແຫ່ງໜຶ່ງທີ່ກໍາລັງກໍ່ສ້າງຢູ່ເຂດໃກ້ຄຽງ ບໍ່ສາມາດຮອງຮັບນໍ້າໄດ້ຍ້ອນມີຝົນຕົກ ເຮັດໃຫ້ນໍ້າເປື້ອນລົ້ນອອກຈາກບໍ່ບໍາບັດທີ່ກໍາລັງກໍ່ສ້າງຢູ່ແລ້ວໄຫລລົງສູ່ຫ້ວຍທໍາມະຊາດທີ່ຢູ່ໃກ້ຄຽງ ຊຶ່ງເປັນຫ້ວຍນ້ອຍເຮັດໃຫ້ປາຕາຍຈໍານວນໜຶ່ງ.
ປັດຈຸບັນ, ພາກສ່ວນທີ່ກ່ຽວຂ້ອງຂອງເມືອງ ພວມຮ່ວມກັບເຈົ້າຂອງໂຮງງານມັນຕົ້ນ ແລະ ອົງການປົກຄອງບ້ານຄົກເຂົ້າດໍ ປະເມີນຜົນເສຍຫາຍຢ່າງລະອຽດ ຊຶ່ງເຈົ້າຂອງໂຮງງານຮັບປາກຈະຮັບຜິດຊອບຜົນເສຍຫາຍທັງໝົດຢ່າງສົມເຫດສົມຜົນທັງສອງຝ່າຍ. ນອກຈາກນີ້ ອົງການປົກຄອງເມືອງ ໄດ້ແຈ້ງເຕືອນປະຊາຊົນບໍ່ໃຫ້ນໍາໃຊ້ນໍ້າໃນເຂດທີ່ມີປາຕາຍ ແລະ ຫ້າມທໍາມາຫາກິນໃນເຂດດັ່ງກ່າວເທື່ອໃນໄລຍະນີ້.
ເຈົ້າເມືອງຊະນະຄາມ ກ່າວຕື່ມວ່າ: ຫ້ວຍທີ່ມີປາຕາຍຍ້ອນນໍ້າເປື້ອນຈາກໂຮງງານມັນຕົ້ນ ເປັນຫ້ວຍນ້ອຍ ຊຶ່ງໃນໄລຍະຍາມແລ້ງມີນໍ້າບໍ່ຫລາຍ ແລະ ປະຊາຊົນບໍ່ໄດ້ທໍາການຜະລິດຢູ່ໃນເຂດໃກ້ຄຽງຈິ່ງບໍ່ມີຜົນກະທົບຕໍ່ຄົນ ແລະ ສັດຊະນິດອື່ນ ນອກຈາກມີປາຕາຍຈໍານວນໜຶ່ງເທົ່ານັ້ນ. ຢ່າງໃດກໍຕາມ ທາງເມືອງໄດ້ເນັ້ນໃຫ້ເຈົ້າຂອງໂຮງງານເລັ່ງກໍ່ ສ້າງອ່າງບໍາບັດນໍ້າເປື້ອນ ກໍຄື ໂຮງງານໃຫ້ສໍາເລັດໂດຍໄວ ແລະ ຮັບປະກັນຄຸນນະພາບ ເພື່ອບໍ່ໃຫ້ເກີດເຫດການແບບນີ້ອີກ, ພ້ອມນີ້ ທ່ານໄດ້ຝາກມາຍັງສັງຄົມຈົ່ງບໍລິໂພກສື່ສັງຄົມອອນລາຍຢ່າງມີສະຕິ ເພາະປາຕາຍຢູ່ເຂດບ້ານຄົກເຂົ້າດໍທີ່ເກີດຂຶ້ນໃນຄັ້ງນີ້ ເປັນພຽງປາຕາຍໃນໜອງທໍາມະຊາດທີ່ບໍ່ໃຫຍ່ຄືສື່ສັງຄົມອອນລາຍໄດ້ລາຍງານຂ່າວອອກໄປ.
