ໂຄງການປັບປຸງເສັ້ນທາງຫລວງແຫ່ງຊາດ ເລກທີ 13 ເໜືອ ແຕ່ສີໄຄ ຫາ ສີເກີດ ຈະສຳເລັດໃນເດືອນເມສາ 2025

ທ່ານ ຄໍາຫລ້າ ອ່າງມັດສາ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງສີໂຄດຕະບອງ ນະຄອນຫລວງວຽງຈັນ ໃຫ້ສໍາພາດຕໍ່ໂທລະພາບນະຄອນຫລວງວຽງຈັນ ໃນວັນທີ 6 ກຸມພາ 2024 ວ່າ: ໃນການເຂົ້າຮ່ວມໂຄງການປັບປຸງເສັ້ນທາງຫລວງແຫ່ງຊາດ ເລກທີ 13 ເໜືອ ແຕ່ສີໄຄ ຫາ ສີເກີດ, ຫ້ອງການໂຍທາທິການ ແລະ ຂົນສົ່ງເມືອງສີໂຄດຕະບອງ ໄດ້ປະກອບສ່ວນອອກແຈ້ງການ ແລະ ຊ່ວຍໂຄສະນາເຜີຍແຜ່ກ່ຽວກັບການຈັດຕັ້ງປະຕິບັດໂຄງການດັ່ງກ່າວໃຫ້ສັງຄົມຮັບຮູ້ຢ່າງທົ່ວເຖິງ, ຊ່ວຍໄກ່ເກ່ຍຈ່າຍຄ່າທົດແທນຄືນຜົນກະທົບສິ່ງກີດຂວາງອອກຈາກແລວທາງ ມີທັງທີ່ດິນ ແລະ ສິ່ງປຸກສ້າງ ທັງໝົດ 659 ກໍລະນີ , ລວມມູນຄ່າຊົດເຊີຍ ແລະ ຈ່າຍຄ່າເສຍໂອກາດໃຫ້ປະຊາຊົນທີ່ດໍາເນີນທຸລະກິດຢູ່ແຄມເສັ້ນທາງດັ່ງກ່າວ 19,8 ຕື້ກວ່າກີບ ຊຶ່ງການຊົດເຊີຍຜົນເສຍຫາຍຂອງປະຊາຊົນເກືອບສໍາເລັດແລ້ວ.

ການປັບປຸງເສັ້ນທາງແຕ່ສີໄຄ ຫາ ສີເກີດ ພວມຢູ່ໃນຂັ້ນຕອນຈັດຕັ້ງປະຕິບັດ ໂດຍເລີ່ມແຕ່ສີ່ແຍກສີເກີດເຂົ້າມາຫາສີໄຄ ປັດຈຸບັນພວມກໍ່ສ້າງລະບົບຫ້ອງລະບາຍນໍ້າ. ດັ່ງນັ້ນ, ການສັນຈອນໄປ-ມາຜ່ານເສັ້ນທາງດັ່ງກ່າວໃນໄລຍະນີ້ພົບຄວາມຫຍຸ້ງຍາກສົມຄວນ  ຢ່າງໃດກໍຕາມ, ຕາມສັນຍາທີ່ບໍລິສັດຮັບ  ເໝົາສ້ອມແປງໄດ້ເຊັນໄວ້ກັບພາກສ່ວນກ່ຽວຂ້ອງ ແມ່ນຈະໃຊ້ເວລາສ້ອມແປງ 18 ເດືອນໃຫ້ສໍາເລັດ ແລະ ຈະມອບ-ຮັບຢ່າງເປັນທາງການໃນເດືອນເມສາ ປີ 2025.