ນາຍົກ ເນັ້ນໃຫ້ເອົາໃຈໃສ່ຄຸ້ມຄອງເງິນຕາທີ່ນຳເຂົ້າມາລົງທຶນພາຍໃນແຂວງໃຫ້ຖືກຕ້ອງຕາມກົດໝາຍ

ໃນໂອກາດເຄື່ອນໄຫວວຽກງານຢູ່ແຂວງບໍ່ແກ້ວ, ວັນທີ 6 ກຸມພາ 2024 , ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ພົບປະໂອ້ລົມ ແລະ ໃຫ້ທິດຊີ້ນຳ ຕໍ່ການນຳຫລັກແຫລ່ງແຂວງບໍ່ແກ້ວ ໂດຍທ່ານເອົາໃຈໃສ່ຕື່ມບາງດ້ານ ເປັນຕົ້ນ ເອົາໃຈໃສ່ສຶກສາອົບຮົມການເມືອງແນວຄິດ ຂອງພະນັກງານ, ທະຫານ, ຕຳຫລວດ ແລະ ປະຊາຊົນບັນດາເຜົ່າ ໃຫ້ຮັບຮູ້ ແລະ ເຂົ້າໃຈແຈ້ງ ຕໍ່ສະ ພາບຄວາມເປັນຈິງ ກ່ຽວກັບບັນຫາຄວາມຫຍຸ້ງຍາກດ້ານຕ່າງໆ ແລະ ຄວາມພະຍາຍາມເອົາໃຈໃສ່ ໃນການແກ້ໄຂຂອງພັກ ແລະ ລັດຖະບານ ກໍຄື ອົງການປົກຄອງຂັ້ນຕ່າງໆ ເຊິ່ງເຫັນວ່າ ມີທ່າອ່ຽງດີຂຶ້ນເປັນກ້າວໆ.

ພ້ອມກັນຈັດຕັ້ງຜັນຂະຫຍາຍມະຕິຂອງສູນກາງພັກ ວ່າດ້ວຍສືບຕໍ່ຊຸກຍູ້ການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ ເຂົ້າສູ່ທຸກຂົງເຂດວຽກງານຕົວຈິງ ເພື່ອໃຫ້ມີການຫັນປ່ຽນທີ່ດີຂຶ້ນຢ່າງຈະແຈ້ງ; ພ້ອມກັນຈັດຕັ້ງປະຕິບັດ ດໍາລັດສະບັບເລກທີ 381/ນຍ ວ່າດ້ວຍການກໍານົດໜ້າວຽກແລະແບ່ງຄວາມຮັບ ຜິດຊອບໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ທ້າຍສະໄໝ, ແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາປະຈຳປີ2024 ແລະ ແຜນການແກ້ໄຂຜົນການກວດສອບໃຫ້ໄດ້ຮັບຜົນດີ; ຊຸກຍູ້ສົ່ງເສີມການຂະຫຍາຍລະບົບຊຳລະສະສາງ ຜ່ານບັນຊີທະນາຄານ ໃຫ້ສັງຄົມໄດ້ຊົມໃຊ້ກວ້າງຂວາງ ແລະ ສະດວກສະບາຍ, ທັງເປັນການດຶງດູດເງິນຕາ ເຂົ້າສູ່ລະບົບການຄຸ້ມຄອງຂອງທະນາຄານໃຫ້ຫລາຍຂຶ້ນ; ເອົາໃຈໃສ່ຄຸ້ມຄອງເງິນຕາ, ລວມທັງ ເງິນທີ່ນຳເຂົ້າມາລົງທຶນພາຍໃນແຂວງ ໃຫ້ຖືກຕ້ອງ ຕາມກົດໝາຍ ແລະ ລະບຽບການທີ່ກຳ ນົດໄວ້; ຊຸກຍູ້ສົ່ງເສີມການຊົມໃຊ້ຜະລິດຕະພັນສິນຄ້າພາຍໃນໃຫ້ຫລາຍຂຶ້ນ, ສົ່ງເສີມການຜະລິດເປັນສິນຄ້າຂອງທ້ອງຖິ່ນຕົນ ໃຫ້ກຸ້ມຕົນເອງ ແລະ ສາມາດຈຳໜ່າຍສົ່ງອອກຕ່າງປະເທດ ເພື່ອຫລີກລ້ຽງການນຳເຂົ້າປະເພດສິນຄ້າຟູມເຟືອຍ ນັບມື້ໃຫ້ຫລຸດລົງ; ສົ່ງເສີມການທ່ອງທ່ຽວ ດ້ວຍການໂຄສະນາເຜີຍແຜ່ດຶງດູດເອົານັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວໃຫ້ນັບມື້ຫລາຍຂຶ້ນ; ສືບຕໍ່ຫັນລົງກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງປະຊາຊົນ, ສ້າງອາຊີບຄົງທີ່ ແລະ ວຽກເຮັດງານທຳໃຫ້ເຂົາເຈົ້າໄດ້ຮັບການພັດທະນານັບມື້ດີຂຶ້ນເປັນກ້າວໆ ໂດຍອີງໃສ່ບັນດາມາດຕະຖານພົ້ນທຸກ ແລະ ມາດຕະຖານການພັດທະນາ ທີ່ໄດ້ກຳນົດໃນດຳລັດສະບັບເລກທີ 348/ລບ; ພ້ອມກັນສືບຕໍ່ກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ໃຫ້ສໍາເລັດຕາມຄາດໝາຍທີ່ກໍານົດໄວ້ ໄປຄຽງຄູ່ກັບປັບປຸງກົງຈັກການຈັດຕັ້ງຂັ້ນຕ່າງໆ ຕາມທິດກະທັດຮັດ, ສົມເຫດສົມຜົນ ແລະ ມີປະສິດທິຜົນ.