ວິທະຍາຄານການເມືອງປ້ອງກັນຄວາມສະຫງົບ ຕ້ອງເຂັ້ມງວດ ມີລະບຽບວິໄນ ເປັນແບບຢ່າງໃນການເຮັດໜ້າທີ່

ໃນເວລາໂອ້ລົມຕໍ່ກອງປະຊຸມສະຫລຸບວຽກງານວິທະຍາຄານການເມືອງປ້ອງກັນຄວາມສະຫງົບ ປະຈຳປີ 2023 ແລະ ວາງແຜນການປີ 2024, ທີ່ດຳເນີໄປໃນວັນທີ 2 ກຸມພາ 2024ນີ້, ພົທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ເນັ້ນໃຫ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ນາຍ ແລະ ພົນຕຳຫລວດ, ນັກສຶກສາຂອງວິທະຍາຄານການເມືອງປ້ອງກັນຄວາມສະຫງົບ ເປັນບູລິມະສິດສໍາຄັນຕົ້ນຕໍ ແລະ ສອດຫ້ອຍເຂົ້າໃນທຸກຂົງເຂດວຽກງານ, ເປັນແບບ ຢ່າງນໍາໜ້າຮອບດ້ານຂອງຄະນະພັກ-ຄະນະບັນຊາທຸກຂັ້ນ ຕະຫລອດຮອດພະນັກງານ, ຄູ – ອາຈານ, ຕ້ອງມີຄວາມຕື່ນຕົວເປັນເຈົ້າການ ແລະ ທັງເປັນແບບຢ່າງໃນການເຮັດໜ້າທີ່ວຽກງານຂອງຕົນ.

ສິ່ງສຳຄັນຕ້ອງມີລະບຽບວິໄນເຂັ້ມງວດ, ເອົາໃຈໃສ່ຄົ້ນຄວ້າບົດສອນ, ສ້າງຕໍາລາສິດສອນ, ແຕ່ງບົດສອນ, ຂຶ້ນຫ້ອງສອນຕົວຈິງ ແລະ ນຳພານັກສຶກສາຄົ້ນຄວ້າສໍາມະນາ, ຝຶກຝົນຫລໍ່ຫລອມຕົນເອງໃຫ້ກາຍເປັນຄູສອນດີສອນເກັ່ງ ໃຫ້ໄດ້ຮັບຄວາມນັບຖື ແລະ ເຊື່ອໝັ້ນຈາກນັກສຶກສາ ສົມກັບວ່າຄູອາຈານຂອງວິທະຍາຄານແຫ່ງນີ້ ເປັນແມ່ພິມຂອງຊາດ ກໍຄືແມ່ພິມຂອງກຳລັງປ້ອງກັນຄວາມສະຫງົບປະຊາຊົນ; ເສີມຂະຫຍາຍຫົວຄິດປະດິດສ້າງ, ຄວາມຮູ້ – ຄວາມສາມາດ, ສະຕິປັນຍາ, ການຄົ້ນຄວ້າວິທະຍາສາດໃຫ້ເກີດປະໂຫຍດສູງສຸດ ໄປຄຽງຄູ່ກັບການບຳລຸງ, ກໍ່ສ້າງຍົກລະດັບຄວາມຮູ້ – ຄວາມສາມາດ, ວຸດທິການສຶກສາ ແລະ ນາມມະຍົດຄູອາຈານ ໃຫ້ສູງຂຶ້ນເທື່ອລະກ້າວ; ເອົາໃຈໃສ່ຄົ້ນຄວ້າປັບປຸງ, ສ້າງ ແລະ ພັດທະນາການສຶກສາໃນຂົງເຂດທິດສະດີການເມືອງ, ການບັນຊາ ທີ່ມີລັກສະນະພິເສດສະເພາະຂອງກໍາລັງປ້ອງກັນຄວາມສະຫງົບປະຊາຊົນໃຫ້ມີຄຸນນະພາບ ແລະ ສາມາດເຊື່ອມໂຍງຂໍ້ມູນຜ່ານລະບົບທີ່ທັນສະໄໝ ກັບບັນປະເທດເພື່ອນມິດຍຸດທະສາດ, ພາກພື້ນ ແລະ ສາກົນ.