ມາເລເຊຍ ປະກາດຫລຸດໂທດໃຫ້ ອະດີດນາຍົກລັດຖະມົນຕີ ທີ່ຖືກໂທດຂໍ້ຫາສໍ້ລາດບັງຫລວງ

ວັນທີ 2 ກຸມພາ 2024 ສຳນັກຂ່າວສານຕ່າງປະເທດລາຍງານວ່າ: ຄະນະກຳມະການອະໄພຍະໂທດຂອງມາເລເຊຍ ປະກາດຫລຸດໂທດໃຫ້ກັບທ່ານ ນາຈິບ ຣາຊັກ ອະດີດນາຍົກລັດຖະມົນຕີ ມາເລເຊຍ ອາຍຸ 70 ປີ ໃນຂໍ້ຫາສໍ້ລາດບັງຫລວງ ກ່ຽວຂ້ອງກັບໂຄງການລົງທຶນຂອງລັດ 1MDB ຫລຸດໂທດເຫລືອເຄິ່ງໜຶ່ງຈາກໂທດຈຳຄຸກ 12 ປີ ມາເປັນ 6 ປີ ແລະ ຈະໄດ້ຮັບການປ່ອຍຕົວໃນວັນທີ 23 ສິງຫາ 2028. ນອກນີ້, ຄະນະກໍາມະການອະໄພຍະໂທດ ຍັງໄດ້ຫລຸດຄ່າປັບໃໝຈາກ 210 ລ້ານຣິງກິດ (ປະມານ 1.000 ຕື້ກວ່າກີບ) ເຫລືອເປັນ 50 ລ້ານຣິງກິດ (ປະມານ 239 ຕື້ກວ່າກີບ) ແຕ່ຖ້າຫາກບໍ່ຈ່າຍຄ່າປັບໃໝ ກໍຈະຖືກເພີ່ມໂທດຈຳຄຸກອີກ 1 ປີ ແລະ ການປ່ອຍຕົວກໍຈະຂະຫຍັບຂຶ້ນເປັນວັນທີ 23 ສິງຫາ 2029.

ທ່ານ ນາຈິບ ຣາຊັກ ໄດ້ດຳລົງຕຳແໜ່ງເປັນນາຍົກລັດຖະມົນຕີ ມາເລເຊຍ ເປັນເວລາ 9 ປີ ແລະ ເປັນນາຍົກລັດຖະມົນຕີຄົນທຳອິດທີ່ຖືກຈຳຄຸກ. ໂດຍທ່ານໄດ້ເລີ່ມຮັບໂທດຈຳຄຸກໃນເດືອນສິງຫາ 2022 ເປັນຕົ້ນມາ ຫລັງຈາກການຍື່ນອຸທອນບໍ່ສຳເລັດ ຈຳນວນ 2 ຄັ້ງ ເພື່ອຍົກເລີກຄຳຕັດສິນຂອງສານສູງ ມາເລເຊຍ ໃນເດືອນກໍລະກົດ 2020, ໂດຍໄດ້ກຳນົດວ່າມີ 3 ເລື່ອງກະທຳຜິດຕໍ່ໜ້າທີ່ຂອງຜູ້ທີ່ໄດ້ຮັບມອບໝາຍໃຫ້ເບິ່ງແຍງຜົນປະໂຫຍດ, ເລື່ອງຟອກເງິນ 3 ເລື່ອງ ແລະ ເລື່ອງໃຊ້ອຳນາດໂດຍບໍ່ເປັນທຳ 1 ເລື່ອງ.

https://www.thairath.co.th/news/foreign/2760319