ປີ 2023 ສປປ ລາວ ມີມູນຄ່າສົ່ງອອກຜົນຜະລິດກະສິກຳ 1.442 ລ້ານໂດລາ
ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ – ປ່າໄມ້ ໄດ້ລາຍງານໃນກອງປະຊຸມສະຫຼຸບວຽກງານກະສິກຳ – ປ່າໄມ້ ແລະ ພັດທະນາຊົນນະບົດປີ 2023 ແລະ ທິດທາງ 2024, ວັນທີ 16 ມັງກອນ 2024 ຜ່ານມານີ້ວ່າ:ໃນປີ 2023 ຜ່ານມາ ການຂະຫຍາຍຕົວຂອງຂະແໜງກະສິກຳ, ປ່າໄມ້ ແລະ ພັດທະນາຊົນນະບົດບັນລຸ 3,4% (ລື່ນ ແຜນການ 0,9% ) ກວມເອົາ 21,4% ຂອງ GDP ( ລື່ນແຜນການ 4,2%).ສະເພາະແຜນງານຜະລິດກະສິກຳເປັນສິນຄ້າໃນທົ່ວ ປະເທດ: ການປູກຝັງ ປະຕິບັດໄດ້ຫຼາຍກ່ວາ 9 ລ້ານໂຕນ ລື່ນແຜນ 13,7% ( ແຜນການ 8,56 ລ້ານໂຕນ ) ໃນນີ້, ອັນພົ້ນເດັ່ນແມ່ນມັນຕົ້ນ ເພີ່ມຂຶ້ນ 28,62; , ກາເຟ ເພີ່ມຂຶ້ນ 7,5%; ໝາກກ້ວຍ ເພີ່ມຂຶ້ນ 16,7%; ອ້ອຍ ເພີ່ມຂຶ້ນ 10,1 % ແລະ ພືດສິນຄ້າອື່ນໆ.
ປັດຈຸບັນມີຟາມລ້ຽງສັດທັງໝົດ 2.261 ຟາມ ມີສັດລ້ຽງ 6,5 ລ້ານ ກວ່າໂຕ; ອັນພົ້ນເດັ່ນແມ່ນຟາມລ້ຽງສັດໄດ້ເພີ່ມຂຶ້ນທັງໝົດ 123 ຟາມ ຈາກປີ 2022. ໃນນັ້ນ, ຟາມລ້ຽງງົວ 55 ຟາມ, ຟາມລ້ໝູ 34 ຟາມ, ໄກ່ພັນໄຂ່ 18 ຟາມ ແລະ ອື່ນໆ ເຊິ່ງຜົນຜະລິດທາດຊີ້ນຈາກການລ້ຽງແບບເປັນຟາມ ສາມາດສະໜອງໄດ້ 41% ຂອງ ການຜະລິດຊີ້ນທັງໝົດ.
ການເຈລະຈາເປີດຕະຫຼາດ ແລະ ການສົ່ງອອກຜະລິດຕະພັນກະສິກຳ ແມ່ນສຳເລັດການເຈລະຈາກັບ ປະເທດຄູ່ຄ້າແລ້ວ 64 ລາຍການ ( ສະເພາະປີ 2023 ເພີ່ມຂຶ້ນໃໝ່ 16 ລາຍການ ) ໃນນັ້ນ ກັບ ສປ ຈີນ 33 ລາຍການ (ມີ 30 ພືດ ແລະ 3 ສັດ ); ສສ ຫວຽດນາມ 16 ພືດ; ໄທ 15 ພືດ ແລະ ສະເພາະສົ່ງອອກໄປສະຫະພາບເອີຣົບ ( EU ) ແມ່ນເປີດຮັບທຸກປະເພດສິນຄ້າ ແຕ່ຕ້ອງປະຕິບັດໄດ້ຕາມເງື່ອນໄຂການນຳເຂົ້າຂອງສະຫະພາບເອີຣົບ.
ການສົ່ງອອກຜົນຜະລິດກະສິກຳ ປະຕິບັດໄດ້ຫຼາຍກວ່າ 1.442 ລ້ານໂດລາ, ໃນນີ້ ການສົ່ງອອກພືດ ແລະ ຜະລິດຕະພັນພືດ ປະຕິບັດໄດ້ 1.024 ລ້ານໂດລາສະຫະລັດ; ພືດທີ່ພົ້ນເດັ່ນໃນການສົ່ງອອກ ມີ: ໝາກກ້ວຍ, ມັນຕົ້ນ, ສາລີ, ອ້ອຍ, ໝາກໂມ ແລະ ອື່ນໆ; ສົ່ງອອກສັດລ້ຽງໄດ້ 100,26 ລ້ານໂດລາ, ໄມ້ ຜະລິດຕະພັນໄມ້, ຢາງພາລາ ແລະ ເຄື່ອງປ່າຂອງດົງ ບັນລຸ 318,05 ລ້ານກວ່າໂດລາສະຫະລັດ. ແລະ ຖ່ານຂາວ 573.189 ໂດລາສະຫະລັດ.
ສ່ວນການນໍາເຂົ້າພືດ ແລະ ຜະລິດຕະພັນພືດ ຜ່ານດ່ານກັກກັນພືດ ມີມູນຄ່າ 109,93 ລ້ານກວ່າໂດລາ ທຽບໃສ່ປີ 2022 ເພີ່ມຂຶ້ນ 22,72 ລ້ານໂດລາ (ຈາກ 87,21 ລ້ານໂດລາສະຫະລັດ ) ພືດທີ່ພົ້ນເດັ່ນໃນການນຳເຂົ້າ ມີ: ໄມ້ກະຖິນນາລົງ, ກາກຖົ່ວເຫຼືອງ, ແປ້ງມັນຕົ້ນ, ເຂົ້າເມັດຫັກ ແລະ ອື່ນໆ.
