ທ່ານປະທານປະເທດ ເຂົ້າຮ່ວມຊົມພິທີຍິງປືນສະເຫລີມສະຫລອງວັນສ້າງຕັ້ງກອງທັບ ຄົບຮອບ 75 ປີ

ກະຊວງປ້ອງກັນປະເທດ ໄດ້ຍິງປືນສະແດງໃນໂອກາດສະເຫລີມສະຫລອງວັນສ້າງຕັ້ງກອງທັບປະຊາຊົນລາວ ວັນທີ 20 ມັງກອນ ຄົບຮອບ 75 ປີ ຈັດຂຶ້ນໃນຕອນເຊົ້າວັນທີ 17 ມັງກອນ 2024, ທີ່ວິທະຍາຄານນາຍ ແລະ ພົນທະຫານ ກົມມະດຳ ເມືອງໂພນໂຮງ ແຂວງວຽງຈັນ ໂດຍການເປັນກຽດເຂົ້າຮ່ວມຂອງທ່ານ ທອງລຸນ ສີສຸລິດ, ເລຂາທິການໃຫ່ຍຄະນະບໍລິຫານງານສູນກາງພັກ ປະທານປະເທດ, ທ່ານ ສອນໄຊ ສີພັນດອນ ນາຍົກລັດຖະມົນຕີ, ທ່ານ ຈັນສະໝອນ ຈັນຍາລາດ, ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດ ມີການນໍາພັກ-ລັດ ພ້ອມດ້ວຍນາຍ ແລະ ພົນທະທານ.

ໃນນີ້ໄດ້ຊົມການສະແດງສິລະປະຈາກກອງສິລະປະກອງທັບປະຊາຊົນລາວ ການສະແດງຂອງເຫລົ່າຮົບຕ່າງໆ ເຊັ່ນ: ເຫຼົ່າຮົບສືບຂ່າວ, ເຫລົ່າຮົບຕີພິເສດ, ກອງພັນໃຫຍ່ທະຫານຮາບຍານເກາະ 11 ,ກອງພັນຍິງປືນ 199, ເຫລົ່າຮົບຕີພິເສດປິດລັບຫລອນຕີສູນບັນຊາຂອງສັດຕູ, ເຫລົ່າຮົບຊ່າງແສງ, ເຫລົ່າຮົບເສນາຮັກ ແລະ ການສະແດງ ອື່ນໆ ລວມທັງໝົດ 15 ລາຍການ,  ພິເສດກອງບັນຊາການທະຫານອາກາດກອງ ທັບປະຊາຊົນລາວ ແລະກອງທັບອາກາດ ກອງທັບປົດປ່ອຍປະຊາຊົນຈີນ ໄດ້ນຳໃຊ້ຝູງຍົນບິນສວນສະໜາມ ແລະບິນສະແດງຜ່ານໜ້າຜາມໄຊ ເພື່ອສະເຫລີມສະຫລອງ ແລະຊົມເຊີຍວັນສ້າງຕັ້ງກອງທັບປະຊາຊົນລາວຕື່ມອີກ.

ພົນໂທ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫ່ຍເສນາທິການກອງທັບປະຊາຊົນລາວ ໃນນາມຫົວໜ້າຄະນະຮັບຜິດຊອບຊ້ອມຮົບສະແດງເພື່ອສະເຫລີມສະຫລອງ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໃຫ້ສໍາພາດວ່າ: ການສະແດງຊ້ອມຮົບໃນຄັ້ງນີ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້ ສະແດງອອກໃນການປະຕິບັດຕົວຈິງຂອງແຕ່ລະຈຸ ແຕ່ລະໜ່ວຍຮົບ, ແຕ່ລະກອງຮ້ອຍ ປະຕິບັດໄດ້ຕາມຍຸດທະວິທີ ມີການປະສານງານກັນຢ່າງສອດ ຄ່ອງໃນແຕ່ລະລາຍການສະແດງ ທັງສາມາດນໍາໃຊ້ອາວຸດ, ຍຸດໂທປະກອນຕ່າງໆໄດ້ເປັນຢ່າງດີ.

ໃນງານຄັ້ງນີ້ຜູ້ເຂົ້າຮ່ວມຍັງໄດ້ຊົມສະແດງວັດຖຸອຸປະກອນ, ພາຫະນະອາວຸດ, ຍຸດໂທປະກອນທີ່ກົມອຸດ ສາຫະກຳປ້ອງກັນຊາດ, ກົມສື່ສານ ແລະ ກົມປືນໃຫຍ່ໜ້າດິນກອງທັບປະຊາຊົນລາວ ຈັດຂື້ນ ເພື່ອສະແດງໃຫ້ເຫັນເຖິງການເຕີບໃຫ່ຍຂະຫຍາຍຕົວ ແລະ ຄວາມທັນສະໄໝຂອງກອງທັບປະຊາຊົນລາວຕະຫລອດໄລຍະ 75 ປີຜ່ານມາ.

ຂ່າວ: ຈັນທະສອນ