IMF ກ່າວວ່າ AI ອາດກະທົບຕໍາແໜ່ງວຽກໃນທົ່ວໂລກເກືອບ 40%
ວັນທີ 14 ມັງກອນ, ທ່ານ ນາງ ຄຣິສຕາລິນາ ຈໍຈີວາ ຜູ້ອໍານວຍການກອງທຶນການເງິນສາກົນ (IMF) ກ່າວວ່າ: ບັນຫາປັນຍາປະດິດ (AI) ຈະສົ່ງຜົນກະທົບຕໍ່ຕໍາແໜ່ງວຽກໃນທົ່ວໂລກເກືອບ 40%. ພ້ອມຮຽກຮ້ອງການຮັກສາສົມດູນຂອງນະໂຍບາຍຕ່າງໆຢ່າງຮອບຄອບ ໂດຍນາງ ຈໍຈີວາ ຊີ້ວ່າ: ໂລກເຂົ້າໃກ້ການປະຕິວັດທາງເຕັກໂນໂລຊີທີ່ອາດເພີ່ມຜະລິດພາບຢ່າງກ້າວກະໂດດ, ກະຕຸ້ນການເຕີບໃຫຍ່ທົ່ວໂລກ ແລະ ເພີ່ມລາຍໄດ້ທົ່ວໂລກ ລວມທັງອາດທົດແທນຕໍາແໜ່ງວຽກ ແລະ ທະວີຄວາມບໍ່ເທົ່າທຽມ.
ລະບົບອັດຕະໂນມັດ ແລະ ເຕັກໂນໂລຊີຂໍ້ມູນຂ່າວສານມີທ່າອ່ຽງສົ່ງຜົນກະທົບຕໍ່ວຽກແບບຣູທີນ (routine) ໃນອະດີດ, ແຕ່ສິ່ງໜຶ່ງທີ່ເຮັດໃຫ້ປັນຍາປະດິດແຕກຕ່າງຄືອາດສົ່ງຜົນກະທົບຕໍ່ວຽກທີ່ໃຊ້ທັກສະສູງ, ບັນດາປະເທດເສດຖະກິດພັດທະນາແລ້ວຈຶ່ງຜະເຊີນຄວາມສ່ຽງຈາກປັນຍາປະດິດຫລາຍກວ່າ, ແຕ່ມີໂອກາດໃຊ້ປະໂຫຍດຈາກປັນຍາປະດິດຫລາຍກວ່າເຊັ່ນກັນ ເມື່ອທຽບໃສ່ປະເທດເສດຖະກິດກໍາລັງພັດທະນາ ແລະ ຕະຫລາດເກີດໃໝ່ ໂດຍປັນຍາປະດິດອາດສົ່ງຜົນກະທົບຕໍ່ຕໍາແໜ່ງວຽກປະມານ 60% ໃນປະເທດເສດຖະກິດພັດທະນາແລ້ວ.
ນາງ ຈໍຈີວາ ອ້າງອີງຜົນວິເຄາະໃໝ່ຂອງ IMF ເຊິ່ງກວດສອບທ່າອ່ຽງຜົນກະທົບຂອງປັນຍາປະດິດຕໍ່ຕະຫລາດແຮງງານທົ່ວໂລກ ລະບຸວ່າ: ປັນຍາປະດິດອາດສົ່ງຜົນກະທົບຕໍ່ຕໍາແໜ່ງວຽກໃນຕະຫລາດເກີດໃໝ່ ແລະ ປະເທດລາຍໄດ້ຕໍ່າປະມານ 40% ແລະ 26% ໂດຍປະເທດເຫລົ່ານີ້ບໍ່ມີໂຄງສ້າງພື້ນຖານ ຫລື ແຮງງານທີ່ມີທັກສະໃນການຄວບຄຸມ ແລະ ໃຊ້ປະໂຫຍດຈາກປັນຍາປະດິດ ເຮັດໃຫ້ເພີ່ມຄວາມສ່ຽງເຕັກໂນໂລຊີປັນຍາປະດິດອາດຄ່ອຍໆທະວີຄວາມບໍ່ເທົ່າທຽມໃນປະເທດເຫລົ່ານີ້.
ປັນຍາປະດິດຍັງອາດສົ່ງຜົນກະທົບຕໍ່ຄວາມບໍ່ເທົ່າທຽມທາງລາຍໄດ້ ແລະ ຄວາມໝັ້ນຄົງໃນປະເທດຕ່າງໆ ໂດຍປັນຍາປະດິດອາດຈະທີວີຄວາມບໍ່ເທົ່າທຽມໂດຍລວມ ເຊິ່ງເປັນທ່າອ່ຽງທີ່ໜ້າເປັນຫ່ວງທີ່ຜູ້ກໍານົດນະໂຍບາຍຕ້ອງແກ້ໄຂ ເພື່ອປ້ອງກັນເຕັກໂນໂລຊີປັນຍາປະດິດເພີ່ມຄວາມເຄັ່ງຕຶງໃນສັງຄົມ, ປະເທດຕ່າງໆຈຶ່ງຄວນຈັດຕັ້ງເຄືອຂ່າຍການຄຸ້ມຄອງທາງສັງຄົມຢ່າງຮອບດ້ານ ແລະ ສະເໜີໂຄງການຝຶກອົບຮົມໃຫ້ແຮງງານກຸ່ມເບາະບາງ ເຮັດໃຫ້ການປ່ຽນຜ່ານຂອງປັນຍາປະດິດມີການຄວບຄຸມຍິ່ງຂຶ້ນ, ປົກປ້ອງການດໍາລົງຊີວິດ ແລະ ຢັບຢັ້ງຄວາມບໍ່ເທົ່າທຽມ.
ນາງ ຈໍຈີວາ ແນະນໍາວ່າ: ປະເທດເສດຖະກິດພັດທະນາແລ້ວຄວນໃຫ້ຄວາມສໍາຄັນຕໍ່ການສ້າງນະວັດຕະກໍາ ແລະ ການບູລະນະປັນຍາປະດິດ, ພ້ອມການພັດທະນາຂອບການເຮັດວຽກຄວບຄຸມອັນແຂງແກ່ນ. ສ່ວນຕະຫລາດເກີດໃໝ່ ແລະ ປະເທດເສດຖະກິດກໍາລັງພັດທະນາຄວນໃຫ້ຄວາມສໍາຄັນຕໍ່ການວາງຮາກຖານທີ່ໝັ້ນຄົງຜ່ານການລົງທຶນໃນໂຄງລ່າງພື້ນຖານທາງດິຈີຕອນ ແລະ ແຮງງານທີ່ມີຄວາມຮູ້ຄວາມສາມາດທາງດິຈີຕອນ.
