ສົມເດັດພະເທບ ຣັດຕະນະຣາຊສຸດາ ຢ້ຽມຢາມໂຮງຮຽນວັດທະນະທຳ ຫລັກ 67 ພ້ອມໃຫ້ການຊ່ວຍເຫລືອ ສ້າງຫ້ອງການຄູ ແລະ ຫໍພັກຍິງ
ວັນທີ 12 ມັງກອນ 2024 ຜ່ານມາ, ສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຕະນະຣາຊສຸດາ ສະຫຍາມບໍຣົມຣາຊະກຸມາຣີ ແຫ່ງ ຣາຊະອານາຈັກໄທ ໄດ້ເດີນທາງຢ້ຽມຢາມ ສປປ ລາວ ພ້ອມຄະນະ, ຕອນແລງຂອງວັນດຽວກັນ ໄດ້ຖືໂອກາດດັ່ງກ່າວ ຢ້ຽມຢາມ ໂຮງຮຽນວັດທະນະທໍາ ຫລັກ 67 ເມືອງໂພນໂຮງ ແຂວງວຽງຈັນ.
ໂຮງຮຽນວັດທະນະທຳຫລັກ 67 ໄດ້ສ້າງຕັ້ງຂຶ້ນ ໃນວັນທີ 7 ພະຈິກ 1976 ໂດຍລັດຖະບານ ສປປ ລາວ ຂຶ້ນກັບກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໂດຍມີຈຸດປະສົງ ແລະ ເປົ້າໝາຍໃນການກໍ່ສ້າງບຸກຄະລາກອນ ກໍຄື: ອະນຸຊົນຜູ້ທີ່ຈະສືບຕໍ່ໃນການພັດທະນາປະເທດຊາດ; ໂຮງຮຽນແຫ່ງນີ້ ມີຄູ-ອາຈານທັງໝົດ 115 ທ່ານ ຍິງ 60 ທ່ານ. ໃນນີ້, ຄູຈົບຊັ້ນປະລິນຍາໂທ 1 ທ່ານ, ປະລິນຍາຕີ 60 ທ່ານ, ຊັ້ນສູງ 29 ທ່ານ, ຊັ້ນກາງ 19 ທ່ານ ແລະ ຊັ້ນຕົ້ນ 7 ທ່ານ, ມີພາຫະນະຮັບໃຊ້ລົດໃຫຍ່ 6 ຄັນ, ຫໍພັກ 8 ຫລັງ (ຫໍພັກຍິງ 3 ຫລັງ), ອາຄານຮຽນ 3 ຫລັງ, ອາຄານຮຽນຄອມພິວເຕີ 2 ຫລັງ, ອາຄານທົດລອງວິທະຍາສາດ 1 ຫລັງ, ສະໂມສອນ 1 ຫລັງ, ຫ້ອງສະໝຸດ 1 ຫລັງ, ເຮືອນຄົວແຕ່ງກິນ 1 ຫລັງ ແລະ ຫ້ອງອາຫານ 1 ຫລັງ ແລະ ອື່ນໆ.
ໃນໂອກາດການຢ້ຽມຢາມຂອງ ສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຕະນະຣາຊສຸດາ ສະຫຍາມບໍຣົມຣາຊະກຸມາຣີ ຢູ່ໂຮງຮຽນດັ່ງກ່າວ, ກົມສົມເດັດພະເທບ ຍັງໄດ້ສະໜັບສະໜູນ ແລະ ຊ່ວຍເຫລືອສ້າງຫ້ອງການຄູ 1 ຫລັງ, ຫໍພັກຍິງ 1 ຫລັງ ແລະ ມອບອຸປະກອນຮັບໃຊ້ການຮຽນ-ການສອນ (ເຄື່ອງສາຍໂປຣເຈັກເຕີ ຈຳນວນ 10 ເຄື່ອງ) ລວມມູນຄ່າຫລາຍກວ່າ 2,7 ລ້ານບາດ ຫລື 1.750.000.000 ກວ່າກີບ. ນອກນີ້, ກົມສົມເດັດພະເທບ ກໍໄດ້ມອບຂອງຂວັນໃຫ້ນັກ ຮຽນທີ່ດີເດັ່ນ 5 ນ້ອງ.
