ຍີ່ປຸ່ນ ສະໜັບສະໜູນ ແລະ ຊ່ວຍເຫລືອ ສປປ ລາວ ໃນການເປັນປະທານອາຊຽນ ປີ 2024 ໃຫ້ສຳເລັດຕາມຄາດໝາຍ

ວັນທີ 11 ມັງກອນ 2024, ທີ່ກະຊວງການຕ່າງປະເທດ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນາງ ຊຶຈິຢຸ ຊິນາໂກະ (TSUCHIYA Shinako) ລັດຖະມົນຕີກະຊວງຟື້ນຟູໄພພິບັດ, ປະທານສະມາຄົມມິດຕະພາບ ລັດຖະສະພາ ຍີ່ປຸ່ນ-ລາວ ພ້ອມດ້ວຍຄະນະ ໃນໂອກາດທີ່ມາຢ້ຽມຢາມເຮັດວຽກຢູ່ ສປປ ລາວ ແຕ່ວັນທີ 10-12 ມັງກອນ 2024,
ທ່ານ ສະເຫລີມໄຊ ກົມມະສິດ ໄດ້ຕີລາຄາສູງຕໍ່ການມາຢ້ຽມຢາມ ລາວ ຂອງຄະນະຜູ້ແທນຍີ່ປຸ່ນ ຄັ້ງນີ້ ເຊິ່ງເປັນການປະກອບສ່ວນສຳຄັນ ເຂົ້າໃນການເພີ່ມທະວີສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ລາວ-ຍີ່ປຸ່ນ ພາຍໃຕ້ການເປັນຄູ່ຮ່ວມຍຸດທະສາດ ໃຫ້ສືບຕໍ່ໄດ້ຮັບການພັດທະນາຢ່າງແໜ້ນແຟ້ນຍິ່ງຂຶ້ນໃນຕໍ່ໜ້າ ແລະ ສະແດງຄວາມເສົ້າສະຫລົດໃຈ ແລະ ເຫັນໃຈຕໍ່ຄອບຄົວຜູ້ຖືກເຄາະຮ້າຍຈາກເຫດການແຜ່ນດິນໄຫວ, ເຮືອບິນຕຳກັນ ແລະ ໄຟໄໝ້ຮ້ານຄ້າໃນອາທິດຜ່ານມາ, ເຊື່ອໝັ້ນວ່າ ລັດຖະບານ ແລະ ປະຊາຊົນຍີ່ປຸ່ນ ຈະສາມາດຜ່ານຜ່າຄວາມຫຍຸ້ງຍາກໃນຄັ້ງນີ້ ແລະ ຟື້ນຟູຊີວິດການເປັນຢູ່ໃຫ້ກັບຄືນສູ່ສະພາບປົກກະຕິໂດຍໄວ ພ້ອມນີ້ ຍັງໄດ້ ສະແດງຄວາມຊົມ ເຊີຍ ແລະ ຕີລາຄາສູງຕໍ່ລັດຖະບານ ແລະ ປະຊາຊົນຍີ່ປຸ່ນ ໃນການເປັນເຈົ້າ

ພາບຈັດກອງປະຊຸມສຸດຍອດສະເຫລີມສະຫລອງ ຄົບຮອບ 50 ປີ ແຫ່ງມິດຕະພາບ ແລະ ການຮ່ວມມື ອາຊຽນ-ຍີ່ປຸ່ນ ແລະ ກອງປະຊຸມຜູ້ນໍາ AZEC (AZEC’s Leader Meeting) ໃນເດືອນທັນວາ 2023, ທີ່ນະຄອນຫລວງໂຕກຽວ ຢ່າງມີຜົນສຳເລັດອັນຈົບງາມ.

ລັດຖະບານ ແຫ່ງ ສປປ ລາວ ໄດ້ຕີລາຄາສູງຕໍ່ການຮ່ວມມື ແລະ ສະໜັບສະໜູນຊ່ວຍເຫລືອຈາກ ລັດຖະບານ ແລະ ປະຊາຊົນຍີ່ປຸ່ນ ໃນໄລຍະຜ່ານມາ ກໍຄື ການຜັນຂະຫຍາຍແຜນປະຕິບັດງານ ລາວ-ຍີ່ປຸ່ນ (Action Plan) ແລະ ບັນດາໂຄງການທີ່ສໍາຄັນ ເປັນຕົ້ນ ຂົງເຂດການພັດທະນາຊັບພະ ຍາກອນມະນຸດ, ໂຄງລ່າງພື້ນຖານ, ດ້ານສາທາລະນະສຸກ, ດ້ານກະສິກໍາ ແລະ ປ່າໄມ້, ການເກັບກູ້ລະເບີດບໍ່ທັນແຕກທີ່ຕົກຄ້າງແຕ່ປາງສົງຄາມ(UXO) ແລະ ອື່ນໆ. ພິເສດ ແມ່ນໂຄງການປັບປຸງສະໜາມກິລາເຈົ້າອານຸວົງ ເຊິ່ງເປັນສັນຍາລັກສໍາຄັນ (ຕໍ່ຈາກຊ້າງ ແລະ ດອກຊາກຸຣະ) ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ຍີ່ປຸ່ນ ຄົບຮອບ 70 ປີ ແລະ ການເປັນຄູ່ຮ່ວມຍຸດທະສາດ ລາວ-ຍີ່ປຸ່ນ ຄົບຮອບ 10 ປີ ໃນປີ 2025 ທີ່ຈະມາເຖິງ ແລະ ໄດ້ສະແດງຄວາມຂອບໃຈ ສະມາຄົມມິດຕະພາບ ລັດຖະສະພາ ຍີ່ປຸ່ນ-ລາວ ທີ່ໄດ້ຊຸກຍູ້ສະໜັບສະໜູນ ບັນດາໂຄງການຂອງ ສປປ ລາວ ທີ່ໄດ້ນໍາສະເໜີຕໍ່ ລັດຖະບານຍີ່ປຸ່ນ ຕະຫລອດໄລຍະຜ່ານມາ ຢ່າງມີຜົນສຳເລັດ, ລວມທັງ ການສະໜັບສະໜູນ ແລະ ຊ່ວຍເຫລືອ ສປປ ລາວ ໃນການເປັນປະທານອາຊຽນ ປີ 2024 ໃຫ້ປະສົບຜົນສຳເລັດຕາມຄາດໝາຍ, ຊຶ່ງ ລາວ ມີຄວາມພ້ອມທີ່ຈະໄດ້ຕ້ອນຮັບບັນດາແຂກຕ່າງປະເທດ, ສະມາຊິກອາຊຽນ, ບັນດາຄູ່ເຈລະຈາອາຊຽນ ແລະ ຄູ່ຮ່ວມພັດທະນາຕ່າງໆ ທີ່ຈະເຂົ້າຮ່ວມກອງປະ ຊຸມອາຊຽນພາຍໃຕ້ຫົວຂໍ້ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ຢູ່ນະຄອນ ຫລວງວຽງຈັນ. ພ້ອມນີ້, ກໍໄດ້ສະເໜີໃຫ້ຝ່າຍຍີ່ປຸ່ນ ຊ່ວຍສືບຕໍ່ຊຸກຍູ້ບັນດານັກນັກທຸລະກິດ, ນັກລົງ ທຶນ, ນັກທ່ອງທ່ຽວຍີ່ປຸ່ນ ໃຫ້ເຂົ້າມາຢ້ຽມຢາມ ແລະ ທ່ອງທ່ຽວ ສປປ ລາວ ຫລາຍຂຶ້ນ ໃນໂອກາດປີທ່ອງທ່ຽວລາວ ປີ 2024 ນີ້.

ທ່ານ ນາງ ຊຶຈິຢຸ ຊິນາໂກະ ກໍໄດ້ຢືນຢັນຄືນຄວາມໝາຍໝັ້ນຂອງລັດຖະບານຍີ່ປຸ່ນ ໃນການສືບຕໍ່ເສີມຂະຫຍາຍ ແລະ ຮັດແໜ້ນການພົວພັນຮ່ວມມືກັບ ລັດຖະບານລາວ, ພາຍໃຕ້ການເປັນຄູ່ຮ່ວມຍຸດທະສາດ ຍີ່ປຸ່ນ-ລາວ ກໍຄື ການພົວພັນຮ່ວມມືໃນຂອບ ຍີ່ປຸ່ນ-ອາຊຽນ ໃຫ້ໄດ້ຮັບການພັດທະນາຍິ່ງໆຂຶ້ນ, ຈະສືບຕໍ່ຊຸກຍູ້ການຮ່ວມມືໃນຂະແໜງການຕ່າງໆທີ່ສອງຝ່າຍມີທ່າແຮງຮ່ວມກັນໃຫ້ຫລາຍຂຶ້ນ ໂດຍສະເພາະ ການຮ່ວມມືໃນວຽກງານດ້ານລັດຖະສະພາ ຍີ່ປຸ່ນ-ລາວ ໃຫ້ມີບາດກ້າວຂະຫຍາຍຕົວຍິ່ງຂຶ້ນ, ຈະສືບຕໍ່ໃຫ້ການສະໜັບສະໜູນ ແລະ ຊ່ວຍເຫລືອ ສປປ ລາວ ການ ຈັດຕັ້ງປະຕິບັດວຽກງານການເປັນປະທານອາຊຽນ ປີ 2024 ໃຫ້ປະສົບຜົນສໍາເລັດຕາມລະດັບຄາດໝາຍ.