ຫົວໜ່ວຍທຸລະກິດທ່ອງທ່ຽວທີ່ມີຄວາມສ່ຽງຕ້ອງເຂົ້າປະກັນໄພເພື່ອຄໍ້າປະກັນໃນເວລາເກີດອຸບັດເຫດຂອງນັກທ່ອງທ່ຽວ

ທ່ານ ບຸນຈັນ ມາລາວົງ ເຈົ້າເມືອງວັງວຽງ ແຂວງວຽງຈັນ ໃຫ້ສຳພາດໃນວັນທີ 5 ມັງກອນ 2024 ວ່າ: ໄລຍະຜ່ານມາໄດ້ເກີດກໍລະນີບໍ່ຄາດຝັນເຮັດໃຫ້ນັກທ່ອງທ່ຽວໄດ້ຮັບບາດເຈັບ ແລະ ເສຍຊີວິດຈໍານວນໜ້ອຍໜຶ່ງ. ດັ່ງນັ້ນເພື່ອຮັບປະກັນຄວາມປອດໄພໃຫ້ແກ່ນັກທ່ອງທ່ຽວດີຂຶ້ນກວ່າເກົ່າ, ອົງການປົກຄອງເມືອງໄດ້ມອບຄວາມຮັບຜິດຊອບໃຫ້ພາກສ່ວນກ່ຽວຂ້ອງຈັດປະຊຸມ ແລະ ວາງແຜນຮ່ວມກັນ, ລວມເຖິງປຸກລະດົມຫົວໜ່ວຍທຸລະກິດທ່ອງທ່ຽວເອົາໃຈໃສ່ວຽກງານນີ້ໃຫ້ຫລາຍຂຶ້ນກວ່າເກົ່າ.
ເນື່ອງຈາກໃນໄລຍະຜ່ານມາ ຫົວໜ່ວຍທຸລະກິດທ່ອງທ່ຽວພາຍໃນເມືອງວັງວຽງຈໍານວນໜຶ່ງມີຄວາມສ່ຽງ ຍ້ອນລະບຽບຄຸ້ມຄອງບໍ່ຮັດກຸມຢ່າງເຂັ້ມງວດແທ້ ໂດຍສະເພາະການທ່ອງທ່ຽວທາງອາກາດ ເຊັ່ນ: ພາລາມໍເຕີ່, ເຄື່ອງບິນເບົາ, ລວມເຖິງລົດປັກກີ່ ແລະ ລົດໃຫ້ເຊົ່າຕ່າງໆ ເນື່ອງຈາກນັກທ່ອງທ່ຽວຕ່າງປະເທດບາງຄົນຂັບຂີ່ບໍ່ທັນເກັ່ງ ຫລື ບໍ່ເຄີຍຊົມໃຊ້ໃນປະເທດຂອງຕົນມາກ່ອນ, ແຕ່ເມື່ອມາເຫັນແລ້ວຢາກລອງເພື່ອຄວາມມ່ວນຊື່ນຈຶ່ງເຮັດໃຫ້ເກີດອຸບັດເຫດຂຶ້ນ.
ເພື່ອແກ້ໄຂບັນຫາທີ່ເກີດຂຶ້ນອົງການປົກຄອງເມືອງຈະວາງລະບຽບການຕ່າງໆ ຕໍ່ຜູ້ປະກອບການທ່ອງທ່ຽວໃຫ້ເຂັ້ມງວດຂຶ້ນຕື່ມອີກ ເພື່ອຮັບປະກັນຄວາມປອດໄພຂອງນັກທ່ອງທ່ຽວໃຫ້ດີຂຶ້ນ, ລວມເຖິງໃຫ້ຫົວໜ່ວຍທຸລະກິດເຫລົ່ານີ້ຕ້ອງເຂົ້າຫາປະກັນໄພເພື່ອຄໍ້າປະກັນໃນເວລາເກີດອຸບັດເຫດຂອງນັກທ່ອງທ່ຽວ ຫລື ເກີດມາແລ້ວໃຫ້ມີຄວາມພ້ອມໃນການແກ້ໄຂບັນຫາຢ່າງທັນການ.
ພາບ-ຂ່າວ: ວສລ