ຍ່າງເພື່ອສຸຂະພາບເພື່ອສະຫລອງວັນທ່ອງທ່ຽວໂລກ

ພິທີຍ່າງເພື່ອສຸຂະພາບແຕ່ປະຕູໄຊຫາຫໍຄໍາແລ້ວກັບຄືນປະຕູໄຊ  ເພື່ອສະເຫລີມສະຫລອງວັນທ່ອງທ່ຽວໂລກ ໄດ້ຈັດຂຶ້ນໃນເຊົ້າວັນທີ 30 ກັນຍານີ້, ໂດຍມີທ່ານ ບຸນທອງ ຈິດມະນີ ຮອງນາຍົກ ປະທານກວດກາພັກ-ລັດ,  ທ່ານພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີທູຕານຸທູດ, ອົງການຈັດຕັ້ງສາກົນ, ພ້ອມດ້ວຍມວນຊົນຊາວນະຄອນຫຼວງວຽງຈັນເຂົ້າຮ່ວມເປັນຈໍານວນຫບາຍ.

ໃນໂອກາດນີ້, ທ່ານ ບໍ່ແສງຄຳ ວົງດາລາ ໄດ້ມີຄໍາເຫັນວ່າ: ໃນວັນທີ 27 ກັນຍາ 1980, ອົງການທ່ອງທ່ຽວໂລກ (UN-WTO) ໄດ້ສະເຫລີມສະຫລອງວັນຄົບຮອບລະບຽບການຂອງອົງການທ່ອງທ່ຽວໂລກມີຜົນບັງຄັບໃຊ້ນັບແຕ່ປີ 1970 ໂດຍໄດ້ກໍານົດເອົາວັນທີ 27 ກັັນຍາ ຂອງທຸກໆປີ ເປັນວັນທ່ອງທ່ຽວໂລກ, ຊຶ່ງໄດ້ເລີ່ມຈັດຕັ້ງປະຕິບັດນັບແຕ່ນັ້ນເປັນຕົ້ນມາ. ການສະເຫລີມສະຫລອງວັນທ່ອງທ່ຽວໂລກໃນແຕ່ລະປີຈະມີຫົວຂໍ້ຕ່າງກັນ ແລະ ໃນປີ 2017 ນີ້ ມີຫົວຂໍ້ວ່າ:“ການທ່ອງທ່ຽວແບບຍືນຍົງ: ແມ່ນເຄື່ອງມືສໍາລັບການພັດທະນາ” (Sustainable Tourism: a Tool for Development) ໂດຍອົງການທ່ອງທ່ຽວໂລກ ມີພາລະບົດສຳຄັນໃນການກຳນົດນະໂຍບາຍການພັດທະນາ ແລະ ສົ່ງເສີມການທ່ອງທ່ຽວສາກົນ, ການພັດທະນາການທ່ອງທ່ຽວແບບຍືນຍົງເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ, ວັດທະນະທຳ ແລະ ການເມືອງ ແລະ ກິດຈະກໍາດັ່ງກ່າວຍັງເປັນການສົ່ງເສີມການ ໂຄສະນາປີທ່ອງທ່ຽວອາຊຽນຄົບຮອບ 50 ປີ (ASEAN@50) ແລະ ການກະກຽມເປີດປີທ່ອງທ່ຽວລາວ 2018 ໃຫ້ມີບັນຍາກາດຟົດຟື້ນ, ເພື່ອດຶງດູດນັກທ່ອງທ່ຽວຈາກອະນຸພາກພື້ນ ແລະ ທົ່ວໂລກ ໃຫ້ເຂົ້າມາທ່ຽວປະເທດລາວໃຫ້ນັບມື້ຫຼາຍຂຶ້ນ.