ປກສ ແຂວງຈຳປາສັກ ຈັບຜູ້ຄ້າຂາຍຢາເສບຕິດໄດ້ 2 ຄົນ ພ້ອມຂອງກາງຢາບ້າ

ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ໃຫ້ຮູ້ວ່າ: ວັນທີ 1 ມັງກອນ 2024 ເຈົ້າໜ້າທີ່ຈະລາຈອນປະຈຳຈຸດກວດກາບ້ານຫລັກ 13 ເມືອງບາຈຽງຈະເລີນສຸກ ແຂວງຈຳປາສັກ ໃນເວລາລົງປະຕິບັດວຽກງານກວດກາລົດ ໄດ້ພົບເປົ້າໝາຍຕ້ອງສົງໄສ, ຈຶ່ງກັກລົດຄັນດັ່ງກ່າວເພື່ອກວດກາ, ຜ່ານການກວດຄົ້ນພົບເຫັນຢາເສບຕິດຫລາຍກວ່າ 900 ເມັດ ຈຶ່ງໄດ້ກັກເປົ້າໝາຍ 2 ຄົນ ຊື່ທ້າວ ຈັນທະວີ ອາຍຸ 34 ປີ ອາຊີບເຮັດສວນ ຢູ່ບ້ານສວນສະຫວ່າງ ເມືອງປາກຊ່ອງ ແລະ ທ້າວ ທ້າວຄຳເບື້ອງ ອາຍຸ 33 ປີ ອາຊີບກຳມະກອນ ຢູ່ບ້ານດູ່ ເມືອງໂພນທອງ ທັງສອງຄົນຢູ່ແຂວງຈຳປາສັກ ພ້ອມຂອງກາງຢາບ້າ 985 ເມັດ, ລົດຈັກ ບໍ່ມີປ້າຍທະບຽນ 1 ຄັນ, ໂທລະສັບ 2 ໜ່ວຍ ແລະ ເງິນກີບຈຳນວນໜຶ່ງ.

ປັດຈຸບັນ ຄະດີດັ່ງກ່າວ ເຈົ້າໜ້າ ປກສ ແຂວງຈຳປາສັກ ພວມເລັ່ງສືບສວນ-ສອບສວນ ຂະຫຍາຍຜົນຫາກຸ່ມແກ໊ງພັກພວກທີ່ຮ່ວມຂະບວນການ ມາດໍາເນີນຄະດີ ຕາມຂັ້ນຕອນຂອງກົດໝາຍ.