ກົມຊົນລະປະທານ ລາວ ແລະ ຄະນະເສດຖະສາດ, ມະຫາວິທະຍາໄລແມ່ໂຈ້ ປະເທດໄທ ຮ່ວມມືກ່ຽວກັບການສຶກສາເສດຖະກິດຊົນລະປະທານ

ການເຊັນບົດບັນທຶກຄວາມເຂົ້າໃຈກ່ຽວກັບການສຶກສາ ເສດຖະກິດຊົນລະປະທານ ລະຫວ່າງ ກົມຊົນລະປະທານ, ກະຊວງກະສິກໍາ ແລະ ປ່າໄມ້, ສປປ ລາວ ແລະ ຄະນະເສດຖະສາດ, ມະຫາວິທະຍາໄລແມ່ໂຈ້, ຣາຊະອານາຈັກໄທ ໄດ້ດຳເນີນໄປໃນວັນທີ 8 ມັງກອນ 2024 ຢູ່ນະຄອນຫລວງວຽງຈັນ, ໂດຍການລົງນາມຂອງທ່ານ ຄໍາພະຈັນ ວົງຊະນະ ຮັກສາການຫົວໜ້າກົມຊົນລະປະທານ ແລະ ທ່ານ ນາງ ຣະພັດສອນ ຄົງທົນຈາລຸອານັນ ຮອງຄະນະບໍດີ ຄະນະເສດຖະສາດ, ມະຫາວິທະຍາໄລເເມ່ໂຈ້.

ນີ້,ເພື່ອສືບຕໍ່ຜັນຂະຫຍາຍແນວທາງນະໂຍບາຍ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 (2021-2025) ເຂົ້າໃນການພັດທະນາຊົນລະປະທານ ເພື່ອສຶກສາ, ສໍາຫລວດ-ອອກແບບ, ຟື້ນຟູ-ສ້ອມແປງ-ກໍ່ສ້າງຊົນລະປະທານ, ຄຸ້ມຄອງນຳໃຊ້ຊົນລະປະທານ, ຄຸ້ມຄອງ ແລະ ຫຼຸດ ຜ່ອນຄວາມສ່ຽງຈາກໄພນໍ້າຖ້ວມ ແລະ ແຫ້ງແລ້ງ ໃນພື້ນທີ່ກະສິກຳ ແນໃສ່ປະກອບສ່ວນເຂົ້າໃນການຈັດຕັ້ງປະຕິບັດແຜນງານຄໍ້າປະກັນຄວາມໝັ້ນຄົງ ທາງດ້ານສະບຽງອາຫານ, ຜະລິດເປັນສິນຄ້າ, ພັດທະນາຊົນນະບົດ ແລະ ລຶບລ້າງຄວາມທຸກຍາກ, ດັ່ງນັ້ນ, ກົມຊົນລະປະທານ, ກະຊວງກະສິກໍາ ແລະ ປ່າໄມ້, ສປປ ລາວ, ຈຶ່ງໄດ້ປຶກສາຫາລືຂໍການຮ່ວມມື ກັບມະຫາວິທະຍາໄລແມ່ໂຈ້, ຣາຊະອານາຈັກໄທ ເພື່ອສຶກສາ ເສດຖະກິດຊົນລະປະທານ, ທັງສອງຝ່າຍເຫັນດີຮ່ວມມືກັນ ທາງດ້ານວິຊາການ ເພື່ອດຳເນີນການສຶກສາ, ຄົ້ນຄວ້າ, ຝຶກອົບຮົມ, ແລກປ່ຽນບົດຮຽນທາງດ້ານວິຊາການ, ທັດສະນະສຶກສາເຊິ່ງກັນ ແລະ ກັນ.

ເນື້ອໃນຂອງບົດບັນທຶກ ການຮ່ວມມືສະບັບນີ້ ລວມມີ : ສຶກສາເສດຖະກິດ ແລະ ນະໂຍບາຍການພັດທະນາຊົນລະປະທານ; ສຶກສາ-ຄົ້ນຄວ້າ ດ້ານເສດຖະກິດ, ນິຕິກໍາ ແລະ ນະໂຍບາຍ ໃນການຫັນເປັນ ວິສາຫະກິດຊົນລະກະເສດລວມໝູ່ ຢູ່ບັນດາໂຄງການຄຸ້ມຄອງລະບົບຊົນລະປະທານ ແລະ ຫຼຸດ ຜ່ອນງົບປະມານຂອງລັດ ກ້າວໄປເຖິງການສ້າງລາຍຮັບໃຫ້ພາກລັດໃນອະນາຄົດ; ແລກປ່ຽນຂໍ້ມູນຂ່າວສານ ແລະ ສືບຕໍ່ພັດທະນາຄວາມຮູ້ທາງດ້ານວິຊາສະເພາະ, ການບໍລິການວິຊາການ, ການຄົ້ນ ຄວ້າ , ເຕັກໂນໂລຊີ ແລະ ນະວັດຕະກໍາໃຫ້ກ້າວໜ້າ; ເພື່ອແລກປ່ຽນບຸກຄະລາກອນ ດ້ານການສຶກສາ ລະຫວ່າງ ພະນັກງານກົມຊົນລະປະທານ ແລະ ນັກສຶກສາຂອງມະ ຫາວິທະຍາໄລ ແມ່ໂຈ້, ການຄົ້ນ ຄວ້າ ແລະ ການບໍລິການວິຊາການ, ລວມທັງການຖ່າຍທອດຄວາມຮູ້ ແລະ ນະວັດຕະກໍາ ລະຫວ່າງພາກສ່ວນຕ່າງໆ; ການຮ່ວມມື ໃນການພັດທະນາຄໍາຖາມຄົ້ນຄວ້າ, ໂຄງການຄົ້ນຄວ້າ, ໂຄງການບໍລິການວິຊາການ ແລະ ຮ່ວມມືກັນພັດທະນາ ຫລັກສູດການຝຶກອົບຮົມໄລຍະສັ້ນ ແລະ ການຮຽນຮູ້ໄລຍະຍາວ.