ຍີ່ປຸ່ນຕອນກາງກໍາຈັດສັດປີກເຄິ່ງແສນ ຫລັງພົບໄຂ້ຫວັດສັດປີກລະບາດຄັ້ງທໍາອິດ
ກະຊວງກະສິກໍາ, ປ່າໄມ້ ແລະ ປະມົງຂອງຍີ່ປຸ່ນ ລາຍງານວ່າ: ວັນທີ 5 ມັງກອນ, ພື້ນທີ່ຕອນກາງຂອງຍີ່ປຸ່ນເລີ່ມຕົ້ນກໍາຈັດສັດປີກປະມານ 50.000 ໂຕ ຫລັງຈາກມີການຢືນຢັນການລະບາດຂອງພະຍາດໄຂ້ຫວັດສັດປີກຊະນິດສ້າງພະຍາດຮຸນແຮງຄັ້ງທໍາອິດໃນຊ່ວງລະດູໃບໄມ້ຫລົ່ນ ແລະ ລະດູໜາວປີນີ້.
ລາຍງານລະບຸວ່າ: ການລະບາດຄັ້ງຫລ້າສຸດຂອງພະຍາດໄຂ້ຫວັດສັດປີກຊະນິດສ້າງພະຍາດຮຸນແຮງ ເຊິ່ງເປັນການລະບາດຄັ້ງທີ 6 ຢູ່ຍີ່ປຸ່ນ ເກີດຂຶ້ນຢູ່ຟາມລ້ຽງໄກ່ປະມານ 50.000 ໂຕ ຢູ່ເມືອງຢາມາກາຕະຂອງແຂວງກິຟຸ ໂດຍໃນວັນທີ 4 ມັງກອງ, ທາງການທ້ອງຖິ່ນໄດ້ຮັບລາຍງານອັດຕາໄກ່ຕາຍເພີ່ມຂຶ້ນຢູ່ຟາມແຫ່ງນີ້.
ປະຕິບັດການກໍາຈັດສັດປີກຂອງຟາມດັ່ງກ່າວທັງໝົດ 50.000 ໂຕ ເລີ່ມແຕ່ວັນທີ 5 ມັງກອນ ແລະ ຄາດວ່າຈະສໍາເລັດໃນວັນທີ 6 ມັງກອນ. ພ້ອມມີຄໍາສັ່ງຫ້າມຂົນສົ່ງຜະລິດຕະພັນສັດປີກ ແລະ ໄຂ່ພາຍໃນລັດສະໝີ 10 ກິໂລແມັດຈາກຟາມທີ່ພົບການລະບາດໄປພື້ນທີ່ພາຍນອກເຂດທີ່ກໍານົດ.
ຍັງມີລາຍງານອີກວ່າ: ສັດປີກຂອງຟາມ 25 ແຫ່ງ ຈໍານວນປະມານ 158.000 ໂຕ ພາຍໃນເຂດຫວງຫ້າມດັ່ງກ່າວຈະຖືກຈໍາກັດການເຄື່ອນຍ້າຍ ແລະ ຂົນສົ່ງ.
ລະດູການໄຂ້ຫວັດສັດປີກລະບາດຢູ່ຍີ່ປຸ່ນມັກເກີດຂຶ້ນນັບແຕ່ເດືອນຕຸລາຂອງທຸກປີ.
