ປີຜ່ານມາ ກະຊວງການຕ່າງປະເທດ ສາມາດເສີມສ້າງຖານະບົດບາດຂອງ ສປປ ລາວ ສູງເດັ່ນຂຶ້ນຢູ່ໃນເວທີພາກພື້ນ ແລະ ສາກົນ

ວັນທີ 5 ມັງກອນ 2024, ກະຊວງການຕ່າງປະເທດ ໄດ້ຈັດກອງປະຊຸມສະຫລຸບຜົນງານການເຄື່ອນໄຫວວຽກງານ ປະຈໍາປີ 2023 ແລະ ວາງທິດທາງແຜນການ ສຳລັບປີ 2024, ມີທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ເປັນປະທານ

ທ່ານ ພົງສະຫວັນ ສີສຸລາດ ຫົວໜ້າຫ້ອງການ ກະຊວງການຕ່າງປະເທດ ລາຍງານວ່າ: ປີ 2023 ຜ່ານມາ ກະຊວງການຕ່າງປະເທດ ສາມາດປັບຕົວເຂົ້າກັບສະພາບການປ່ຽນແປງໄດ້ຢ່າງວ່ອງໄວທັນການ ແລະ ຢູ່ໃນທ່າບຸກຕະ ຫລອດມາ, ສາມາດຈັດຕັ້ງຜັນຂະຫຍາຍແນວທາງການຕ່າງປະເທດຂອງພັກ ຢ່າງມີປະສິດທິພາບ ແລະ ປະສິດທິຜົນສູງ, ສືບຕໍ່ເພີ່ມທະວີການພົວພັນຮ່ວມມື ກັບປະເທດເພື່ອນມິດອື່ນໆໃນໂລກ ທັງຢູ່ໃກ້ ແລະ ຢູ່ໄກ, ຍາດໄດ້ຜົນສຳເລັດພົ້ນເດັ່ນຫລາຍດ້ານຢ່າງໜ້າພາກພູມໃຈ ທັງໃນຂອບການຮ່ວມມືສອງຝ່າຍ, ຫລາຍຝ່າຍ, ສາມາດຂົນຂວາຍຍາດແຍ່ງເອົາການຮ່ວມມື, ສະໜັບສະໜູນ ແລະ ຊ່ວຍເຫລືອຈາກປະ ເທດເພື່ອນມິດຍຸດທະສາດ, ປະເທດຄູ່ຮ່ວມພັດທະນາ ແລະ ຈາກສາກົນ ໄດ້ຢ່າງຫລວງຫລາຍ ຜົນສໍາເລັດອັນພົ້ນເດັ່ນ ກໍແມ່ນການຕ້ອນຮັບບັນດາຜູ້ນໍາປະເທດເພື່ອນມິດ ໃນການເດີນທາງມາຢ້ຽມຢາມ ສປປ ລາວ ແລະ ຜູ້ນຳລາວ ກໍໄດ້ດຳເນີນການຢ້ຽມຢາມພົບປະ ແລະ ເຂົ້າຮ່ວມກອງປະຊຸມສາກົນຢູ່ຕ່າງ ປະເທດ ຫລາຍຄັ້ງ; ບັນດາສຳນັກງານຜູ້ຕາງໜ້າ ແຫ່ງ ສປປ ລາວ ປະຈຳຢູ່ຕ່າງປະເທດ ກໍຄື ບັນດານັກການທູດລາວ ກໍໄດ້ເຄື່ອນໄຫວວຽກງານການທູດການເມືອງ, ການທູດເສດຖະກິດ ແລະ ການທູດວັດທະນະທຳຢ່າງຕັ້ງໜ້າ ແລະ ມີຜົນສຳເລັດສູງ; ສາມາດຂົນຂວາຍຍາດແຍ່ງເອົາການຮ່ວມມື ຈາກພາຍນອກ ແລະ ການສະໜັບສະໜູນຊ່ວຍເຫລືອຈາກສາກົນ ໄດ້ຢ່າງຫລວງຫລາຍ, ປົກປ້ອງໄດ້ສິດຜົນປະ ໂຫຍດອັນຊອບທໍາຂອງ ສປປ ລາວ ຢູ່ເວທີພາກພື້ນ ແລະ ສາກົນ; ສາມາດດຶງດູດເອົາການລົງທຶນຈາກຕ່າງປະເທດ, ການທ່ອງທ່ຽວ ແລະ ການຮ່ວມມືດ້ານເສດຖະກິດມາສູ່ປະເທດຊາດ, ລວມເຖິງການຂົນ ຂວາຍດຶງດູດຄົນເຊື້ອຊາດລາວຢູ່ປະເທດຕ່າງໆ, ປະກອບສ່ວນສໍາຄັນ ເຂົ້າໃນການພັດທະນາເສດຖະກິດ-ສັງຄົມ ເປັນແຕ່ລະໄລະຍະ. ມາຮອດປັດຈຸບັນ, ສປປ ລາວ ໄດ້ມີການພົວພັນການທູດກັບ 149 ປະເທດໃນໂລກ(ຫລ້າສຸດແມ່ນກັບ ສາທາລະນະລັດ ບົດສະວານາ), ມີສໍານັກງານຜູ້ຕາງໜ້າ ແຫ່ງ ສປປ ລາວ ປະຈໍາຢູ່ຕ່າງປະເທດ ຈໍານວນ 42 ແຫ່ງ; ໃນນັ້ນ, ມີສະຖານເອກອັກຄະລັດຖະທູດ ຈໍານວນ 28 ແຫ່ງ, ສໍານັກງານຜູ້ຕາງໜ້າຖາວອນ ຈໍານວນ 3 ແຫ່ງ, ສະຖານກົງສຸນໃຫຍ່ 10 ແຫ່ງ ແລະ ຫ້ອງການກົງສຸນ 1 ແຫ່ງ. ພ້ອມດຽວກັນນີ້, ບັນດາຜູ້ເຂົ້າຮ່ວມກອງປະຊຸມ ກໍໄດ້ຮ່ວມກັນປະກອບຄຳຄິດເຫັນຕື່ມໃສ່ ບົດລາຍງານສະຫລຸບຕີລາຄາ ການເຄື່ອນໄຫວວຽກງານການຕ່າງປະເທດ ໃນໄລຍະປີຜ່ານມາ ແລະ ວຽກຈຸດສຸມໃນຕໍ່ຫນ້າ ເພື່ອໃຫ້ມີເນື້ອໃນຄົບຖ້ວນສົມບູນຍິ່ງຂຶ້ນ.

ທ່ານ ສະເຫລີມໄຊ ກົມມະສິດ ມີຄໍາເຫັນໂອ້ລົມ ແລະ ໃຫ້ທິດຊີ້ນຳຕໍ່ກອງປະຊຸມ ໂດຍໄດ້ສະແດງຄວາມຊົມເຊີຍ ຕໍ່ຜົນງານການເຄື່ອນໄຫວວຽກງານ ໃນໄລຍະຜ່ານມາ ພ້ອມທັງ ຮຽກຮ້ອງໃຫ້ຄະນະນໍາແຕ່ລະຂັ້ນ ແລະ ພະນັກງານ-ລັດຖະກອນທຸກຄົນ ທັງຢູ່ພາຍໃນ ແລະ ຕ່າງປະເທດ ຈົ່ງສືບຕໍ່ເສີມຂະຫຍາຍຜົນສຳເລັດທີ່ຍາດມາໄດ້, ທັງຍັງໄດ້ເນັ້ນໃສ່ບາງວຽກທີ່ສໍາຄັນ ໃຫ້ພ້ອມກັນສືບຕໍ່ເຄື່ອນໄຫວວຽກງານ ຢ່າງມີປະສິດທິຜົນ ແລະ ຢູ່ໃນທ່າບຸກ ໂດຍຍຶດໝັ້ນໃນແນວທາງການຕ່າງປະເທດ “ສັນຕິພາບ, ເອກະລາດ, ມິດຕະ ພາບ ແລະ ການຮ່ວມມື” ແລະ ປະຕິບັດຕາມຄໍາຂວັນ ຂອງກອງປະຊຸມວຽກງານການຕ່າງປະເທດ ຄັ້ງທີ 14 ຄື: ການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ ເພື່ອຮັບປະກັນການເຄື່ອນໄຫວວຽກງານການທູດ ໃນຂອບສອງຝ່າຍ ແລະ ຫລາຍຝ່າຍ ໃຫ້ມີປະສິດທິຜົນສູງ, ຍາດແຍ່ງການຊ່ວຍເຫລືອ, ການສະໜັບສະໜູນ ແລະ ຄວາມເຫັນອົກເຫັນໃຈ ຈາກປະເທດເພື່ອນມິດຍຸດທະສາດ ແລະ ອື່ນໆ ເພື່ອສ້າງເງື່ອນໄຂອັນດີໃຫ້ແກ່ການເປັນປະທານອາຊຽນ 2024 ຂອງ ສປປ ລາວ ໃຫ້ປະສົບຜົນສໍາເລັດຢ່າງຈົບງາມ, ສືບຕໍ່ເອົາໃຈໃສ່ວຽກງານສຶກສາອົບຮົມທາງດ້ານການເມືອງ-ແນວຄິດ ໃຫ້ແກ່ສະມາຊິກພັກ-ພະນັກງານ; ສືບຕໍ່ເອົາໃຈໃສ່ຂຶ້ນແຜນກໍ່ສ້າງ ແລະ ຍົກລະດັບຄວາມຮູ້ຄວາມສາມາດ ແກ່ພະນັກງານ-ລັດຖະກອນ ຢ່າງເປັນຮູບປະທຳ ເພື່ອແນໃສ່ສ້າງພະນັກງານ-ລັດຖະກອນ ໃຫ້ມີຄວາມຊ່ຽວຊານ ດ້ານພາສາຕ່າງປະເທດ ແລະ ດ້ານວິຊາສະເພາະ; ສືບຕໍ່ເອົາໃຈໃສ່ການປະຕິບັດວຽກງານວິຊາສະເພາະໃຫ້ມີປະສິດທິຜົນ ໃຫ້ໄດ້ຕາມລະດັບຄາດໝາຍ; ເອົາໃຈໃສ່ຕິດຕາມບັນດາໂຄງການ ແລະ ການ ຈັດຕັ້ງປະຕິບັດບັນດາໂຄງການຕ່າງໆ ຕາມ 6 ແຜນງານ ແລະ 38 ໂຄງການ ໃນໄລຍະປີ 2021-2025 ຂອງກະຊວງການຕ່າງປະເທດ; ສືບຕໍ່ປັບປຸງ ແລະ ສ້າງນິຕິກຳຂະແໜງການຕ່າງປະເທດ ໃຫ້ແທດເໝາະກັບສະພາບການປັດຈຸບັນ ເພື່ອເປັນບ່ອນອີງໃຫ້ແກ່ການເຄື່ອນໄຫວວຽກງານການຕ່າງປະເທດ ໃຫ້ມີຄວາມຮັດກຸມ ແລະ ມີປະສິດທິຜົນ; ສືບຕໍ່ຍົກສູງລະບົບການເຮັດວຽກ ຕາມຫລັກການຜ່ານປະຕູດຽວ ແລະ ຊຸກຍູ້ໃຫ້ທຸກພາກສ່ວນທັງສູນກາງ ແລະ ທ້ອງຖິ່ນ ເພີ່ມທະວີການຕິດຕາມ, ກວດກາ, ປະເມີນ, ການລາຍງານ ແລະ ຊຸກຍູ້ການຮ່ວມມື ລະຫວ່າງ ສປປ ລາວ ກັບຕ່າງປະເທດ ໂດຍສະເພາະແມ່ນການ ຈັດຕັ້ງຜັນຂະຫຍາຍ ຜົນການເຄື່ອນໄຫວຕ່າງປະເທດ ຂອງການນຳຂັ້ນຕ່າງໆ ຂອງ ສປປ ລາວ ກັບຕ່າງ ປະເທດ; ສືບຕໍ່ເອົາໃຈໃສ່ວຽກງານໂຄສະນາ ແລະ ເຜີຍແຜ່ບັນດາແນວທາງນະໂຍບາຍຂອງພັກ-ລັດ, ນິຕິກໍາ ທີ່ພົວພັນກັບວຽກງານການຕ່າງປະເທດ, ການດຶງດູດການລົງທຶນ ກໍຄືວຽກງານການທູດເສດຖະກິດ, ການຂົນຂວາຍຄົນເຊື້ອຊາດລາວ ຢູ່ຕ່າງປະເທດ ແລະ ອື່ນໆ.