ເພີ່ມທະວີການເອົາໃຈໃສ່ ຕໍ່ວຽກງານ ສະກັດກັ້ນ ແລະ ຕ້ານອັກຄີໄພ

ວັນທີ 3 ມັງກອນ 2024 ນີ້ ກົມໃຫຍ່ຕຳຫລວດ ກະຊວງຫ້ອງກັນຄວາມສະຫງົບ ອອກແຈ້ງການ ເພີ່ມທະວີການເອົາໃຈໃສ່ ຕໍ່ວຽກງານ ສະກັດກັ້ນ ແລະ ຕ້ານອັກຄີໄພ ວ່າ:

ໃນຊຸມປີຜ່ານມາ ຢູ່ ສປປ ລາວ ໄດ້ມີອັກຄີໄພເກີດຂຶ້ນຢູ່ບັນດາສໍານັກງານ-ອົງການ, ທີ່ພັກອາໄສ, ໂຮງຈັກ, ໂຮງງານ, ຕະຫຼາດຮ້ານຄ້າ, ພື້ນຖານເສດຖະກິດ, ວັດທະນະທໍາ-ສັງຄົມ, ໄຟໄໝ້ລາມປ່າ ແລະ ອື່ນໆ. ເຊິ່ງໄດ້ສ້າງຄວາມເສຍຫາຍໃຫ້ແກ່ຊີວິດ, ຊັບສິນຂອງລັດ-ລວມໝູ່, ບຸກຄົນ ແລະ ນິຕິບຸກຄົນ ເປັນຈໍານວນຫຼວງຫຼາຍ; ສາເຫດທີ່ພາໃຫ້ເກີດ ໄຟໄໝ້ ສ່ວນຫຼາຍແມ່ນເກີດຈາກໄຟຟ້າລັດວົງຈອນ, ເລິນເລີ້ຂາດສະຕິ, ຂາດຄວາມຮັບຜິດຊອບ, ເປັນຕົ້ນແມ່ນການນໍາ ໃຊ້ໄຟຟ້າເຂົ້າໃນການຜະລິດ, ດໍາເນີນທຸລະກິດ, ດໍາລົງຊີວິດປະຈໍາວັນ, ຈູດຂີ້ເຫຍື້ອ-ຈູດປ່າຊະຊາຍ, ໄຕ້ທູບທຽນບູຊາ ແລະ ອື່ນໆ.

ການສະກັດກັ້ນ ແລະ ຕ້ານອັກຄີໄພ ແມ່ນໜ້າທີ່ຂອງພົນລະເມືອງລາວຫມົດທຸກຄົນ, ນັບທັງຊາວຕ່າງປະເທດທີ່ມາ ເຄື່ອນໄຫວ ແລະ ດໍາລົງຊີວິດຢູ່ ສປປ ລາວ; ເພື່ອເຮັດໃຫ້ວຽກງານສະກັດກັ້ນ ແລະ ຕ້ານອັກຄີໄພ ມີປະສິດທິຜົນສູງ.

ກົມໃຫຍ່ຕໍາຫຼວດ ອອກແຈ້ງການ:

1. ການນໍາໃຊ້ໄຟຟ້າເຂົ້າໃນການຜະລິດ, ດໍາເນີນທຸລະກິດ, ດໍາລົງຊີວິດປະຈໍາວັນ ຫຼື ໃນວຽກງານອື່ນໆ ຕ້ອງປະຕິບັດ ຕາມຂໍ້ກໍານົດ, ລະບຽບການຂອງລັດວິສາຫະກິດໄຟຟ້າລາວວາງອອກຢ່າງເຂັ້ມງວດ, ເອົາໃຈໃສ່ກວດກາລະບົບໄຟຟ້າ, ອຸປະກອນເຄື່ອງໃຊ້ໄຟຟ້າຕ່າງໆ ໃຫ້ຢູ່ໃນສະພາບສົມບູນ; ຖ້າເຫັນວ່າເກົ່າແກ່, ເປ່ເພບໍ່ຮັບປະກັນ ຕ້ອງສ້ອມແປງ ຫຼື ປ່ຽນໃໝ່; ທຸກຄັ້ງທີ່ໃຊ້ອຸປະກອນເຄື່ອງໃຊ້ໄຟຟ້າສໍາເລັດແລ້ວຕ້ອງປິດ ແລະ ຖອດປັກສຽບອອກ.
2. ການຈູດທູບທຽນບູຊາ ຕ້ອງມີການຕິດຕາມ ພາຍຫຼັງສໍາເລັດຕ້ອງມອດໃຫ້ລະອຽດ, ຮ້ານບູຊາຕ້ອງເຮັດດ້ວຍ ວັດຖຸທີ່ໄຟໄໝ້ຍາກ, ຫ່າງໄກຈາກວັດຖຸໄວໄຟ ແລະ ໄໝ້ງ່າຍ.
3. ການຄຸ້ມຄອງ, ການນໍາໃຊ້, ການຂົນສົ່ງ ແລະ ຈໍາຫນ່າຍວັດຖຸໄວໄຟ-ທາດເຄມີ ຕ້ອງປະຕິບັດຕາມມາດຕະ ຖານເຕັກນິກຄວາມປອດໄພທາງດ້ານອັກຄີໄພຢ່າງເຂັ້ມງວດ.
4. ຈັດມ້ຽນວັດຖຸສິ່ງຂອງຕ່າງໆ ຢູ່ໃນສະຖານທີ່ທໍາການຜະລິດ, ສະຖານທີ່ເຮັດວຽກ, ທີ່ພັກອາໄສ ໃຫ້ເປັນລະບຽບ ຮຽບຮ້ອຍ, ບໍ່ປ່ອຍໃຫ້ຫົກເຮື້ອ-ຊະຊາຍ, ຈັດໄວ້ບ່ອນທີ່ມີຄວາມປອດໄພ, ຫ່າງຈາກແຫ່ຼງໄຟ ທີ່ຈະພາໃຫ້ເກີດໄຟໄໝ້ ເຊັ່ນ: ເຕົາດັງໄຟ, ເຕົາແກ໊ສ ຫຼື ອຸປະກອນທີ່ມີຄວາມຮ້ອນອື່ນໆ.
5. ທຸກໆ ສໍານັກງານ-ອົງການ, ພື້ນຖານເສດຖະກິດ, ວັດທະນະທໍາ-ສັງຄົມ, ຍານພາຫະນະແຕ່ສີ່ລໍ້ຂຶ້ນໄປທຸກຊະນິດ ຕ້ອງໄດ້ຕິດຕັ້ງບັ້ງມອດໄຟຕາມຄວາມເຫມາະສົມ ແລະ ຖືກຕ້ອງຕາມລະບຽບ-ກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ.
6. ບັນດາ ສໍານັກງານ-ອົງການ, ພື້ນຖານເສດຖະກິດ, ວັດທະນະທໍາ-ສັງຄົມ, ອໍານາດການປົກຄອງທ້ອງຖິ່ນ, ປະຊາ ຊົນ ຕ້ອງໄດ້ເອົາໃຈໃສ່ໃນການປ້ອງກັນເວນຍາມສະຖານທີ່ ທີ່ຕົນຮັບຜິດຊອບ ແລະ ກະກຽມອຸປະກອນມອດໄຟມາ ປະຈໍາໄວ້ໃຫ້ພຽງພໍ ພ້ອມທັງຈັດຕັ້ງການຝຶກອົບຮົມວິທີການສະກັດກັ້ນ ແລະ ຕ້ານອັກຄີໄພ ໃຫ້ມີຄວາມຊໍານິຊໍານານ.

7.ບັນດາອາຄານໃຫຍ່, ອາຄານສູງ ຕ້ອງມີແຜນຜັງການຫນີໄພ, ມີລະບົບສະກັດກັ້ນ ແລະ ຕ້ານອັກຄີໄພ ທີ່ໄດ້ມາດຕະຖານ.

8. ທຸກໆ ພາກສ່ວນຕ້ອງອໍານວຍຄວາມສະດວກ ແລະ ໃຫ້ການຮ່ວມມືກັບເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານ ອັກຄີໄພ ໃນການລົງກວດກາ, ໂຄສະນາ-ຝຶກອົບຮົມ, ຕ້ານອັກຄີໄພ ແລະ ກູ້ໄພ ໃນເຂດທີ່ຕົນຮັບຜິດຊອບ.
9. ເວລາມີໄຟໄໝ້ເກີດຂຶ້ນຢູ່ສະຖານທີ່ໃດໜຶ່ງ ຜູ້ຮັບຜິດຊອບສະຖານທີ່ນັ້ນ ຕ້ອງເຕົ້າໂຮມກໍາລັງ, ພາຫະນະ- ອຸປະກອນມອດໄຟ ເຂົ້າມອດໄຟເບື້ອງຕົ້ນ ແລະ ແຈ້ງໃຫ້ກໍາລັງຕໍາຫຼວດສະກັດກັ້ນ ແລະ ຕ້ານອັກຄີໄພທີ່ຢູ່ໃກ້ສຸດ ( ແຈ້ງເຫດໄຟໄໝ້ ໂທ 1190 ); ພ້ອມກັນນັ້ນ ທຸກຄົນມີໜ້າທີ່ເຂົ້າຮ່ວມມອດໄຟ, ຊ່ວຍເຫຼືອຜູ້ປະສົບໄພ, ປ້ອງກັນສະຖານທີ່ ເກີດເຫດ ແລະ ໃຫ້ຄວາມຮ່ວມມືກັບເຈົ້າໜ້າທີ່ຕໍາຫຼວດໃນການສືບສວນ-ສອບສວນ ດໍາເນີນຄະດີອັກຄີໄພ.

܀ຂໍ້ຫ້າມ:

1. ຫ້າມຈູດຂີ້ເຫຍື້ອຊະຊາຍ ໃກ້ສໍານັກງານ-ອົງການ, ໂຮງຈັກ-ໂຮງງານ, ສາງ, ຕະຫຼາດ, ທີ່ຢູ່ອາໄສ, ບ່ອນທີ່ມີວັດຖຸ ໄວໄຟ, ບ່ອນຊຸມຊົນໜາແໜ້ນ ແລະ ບ່ອນອື່ນໆ ທີ່ອາດຈະເກີດໄຟໄໝ້ລາມໄດ້.
2. ຫ້າມຈູດປ່າລ່າເນື້ອ, ຈູດໄຮ່ ແລະ ຈູດສວນ; ຖ້າມີຄວາມຈໍາເປັນຈູດ ຕ້ອງມີການປ້ອງກັນ ແລະ ສ້າງໄລຍະຫ່າງບໍ່ ໃຫ້ໄຟໄໝ້ລາມ.
3. ຫ້າມນໍາເອົານໍ້າມັນເຊື້ອໄຟ, ທາດເຄມີ, ວັດຖຸໄໝ້-ລະເບີດ ເກັບຮັກສາໄວ້ໃນເຮືອນ, ສະຖານທີ່ເຮັດວຽກ, ທີ່ພັກ ອາໄສ ຫຼື ບ່ອນທີ່ມີແຫຼ່ງຄວາມຮ້ອນສູງ, ບໍ່ໃຫ້ນໍາເອົານໍ້າມັນເຊື້ອໄຟໃສ່ຟຸ່ຍ, ຕຸກ, ແກ້ວ ແລະ ອື່ນໆ ວາງຂາຍຊະຊາຍ; ສະເພາະຢູ່ສາງ ຫຼື ປ້ໍານໍ້າມັນ ຕ້ອງມີການກວດກາການຮົ່ວໄຫຼຂອງນໍ້າມັນ, ມີຂໍ້ກໍານົດກົດລະບຽບ ແລະ ວິທີການສະກັດ ກັ້ນ ແລະ ຕ້ານອັກຄີໄພ ຢ່າງເຂັ້ມງວດ.
4. ຫ້າມໃຊ້ໂທລະສັບ, ສູບຢາ ແລະ ວັດຖຸທີ່ພາໃຫ້ເກີດປະກາຍໄຟ ຢູ່ສາງນໍ້າມັນ ແລະ ປ້ໍານໍ້າມັນບໍລິການຕ່າງໆ.

❖ ການຈັດຕັ້ງປະຕິບັດ:

ມອບໃຫ້ຕໍາຫຼວດສະກັດກັ້ນ ແລະ ຕ້ານອັກຄີໄພ, ບັນດາກອງບັນຊາການ ປກສ ແຂວງ-ນະຄອນຫຼວງ, ສໍານັກງານ-ອົງການ, ເສດຖະກິດພິເສດ, ເສດຖະກິດສະເພາະ, ຫົວຫນ່ວຍທຸລະກິດທັງພາກລັດ ແລະ ເອກະຊົນ ແຕ່ສູນ ກາງຮອດທ້ອງຖິ່ນ ແລະ ປະຊາຊົນທຸກຊັ້ນຄົນຂອບເຂດທົ່ວປະເທດ.

ດັ່ງນັ້ນ ກົມໃຫຍ່ຕໍາຫຼວດ ຈຶ່ງອອກແຈ້ງການສະບັບນີ້ມາຍັງທຸກພາກສ່ວນຮັບຊາບ ແລະ ຈົ່ງພ້ອມກັນຈັດຕັ້ງປະຕິ ບັດ ຢ່າງເຂັ້ມງວດ.