ກໍາປູເຈຍຢືນຢັນພົບຜູ້ຕິດເຊື້ອໂຄວິດ-19 ສາຍພັນຍ່ອຍ JN.1 ຈໍານວນ 4 ຄົນທໍາອິດ

ກະຊວງສາທາລະນະສຸກຂອງກໍາປູເຈຍ ປະກາດວ່າກໍາປູເຈຍໄດ້ກວດພົບຜູ້ຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ສາຍພັນຍ່ອຍ JN.1 ຈໍານວນ 4 ຄົນທໍາອິດ ເຊິ່ງມີຕົ້ນກໍາເນີດມາຈາກສາຍພັນ BA.2.86 ທີ່ມີການກາຍພັນສູງ.

ຖະແຫລງການຈາກກະຊວງສາທາລະນະສຸກຂອງກໍາປູເຈຍ ໃນທ່ຽງຄືນວັນທີ 28 ທັນວາຜ່ານມາ ລະບຸວ່າ: ຜົນກວດທີ່ໄດ້ຮັບຈາກສະຖາບັນປາສເຕີໃນກໍາປູເຈຍວັນທີ 28 ທັນວາ ຢືນຢັນພົບຜູ້ຕິດເຊື້ອໂຄວິດ-19 ສາຍພັນຍ່ອຍ JN.1 ຈໍານວນ 4 ຄົນ ໂດຍທັງໝົດເຂົ້າຮັບການປິ່ນປົວ ແລະ ຟື້ນຕົວແລ້ວ, ແຕ່ຍັງຕ້ອງກັກຕົວຢູ່ເຮືອນຂອງຕົນເອງຕໍ່ໄປ.

ກະຊວງສາທາລະນະສຸກຂອງກໍາປູເຈຍ ກ່າວວ່າ: ອົງການອະນາໄມໂລກ (WHO) ຈັດໃຫ້ເຊື້ອໂຄວິດ-19 ສາຍພັນຍ່ອຍ JN.1 ເປັນສາຍພັນທີ່ໜ້າສົນໃຈ ບໍ່ແມ່ນ ສາຍພັນທີ່ໜ້າກັງວົນ ໂດຍມີການກວດພົບສາຍພັນຍ່ອຍນີ້ຄັ້ງທໍາອິດຢູ່ອາເມລິກາ ໃນເດືອນກັນຍາ.

ອົງການອະນາໄມໂລກ ກໍານົດໃຫ້ສາຍພັນຍ່ອຍ JN.1 ເປັນສາຍພັນໜ້າສົນໃຈທີ່ແຍກອອກຈາກສາຍພັນຕົ້ນກໍາເນີດ BA.2.86 ແລະ ມີຄວາມສ່ຽງຕໍ່າໃນດ້ານສາທາລະນະສຸກ.