UN ປະນາມອິດສະລາແອນ ໂຈມຕີຂະບວນລົດຊ່ວຍເຫລືອມະນຸດສະທໍາຢູ່ກາຊາ
ເຈົ້າໜ້າທີ່ລະດັບສູງຂອງໜ່ວຍງານດ້ານມະນຸດສະທໍາສະຫະປະຊາຊາດ ສະແດງຄວາມບໍ່ພໍໃຈຕໍ່ກໍລະນີອິດສະລາແອນໂຈມຕີຂະບວນລົດມອບການຊ່ວຍເຫລືອດ້ານມະນຸດສະທໍາໃຫ້ແກ່ຊາວກາຊາ.
ວັນທີ 30 ທັນວາ, ສໍານັກຂ່າວຕ່າງປະເທດລາຍງານວ່າ: ທ່ານ ທອມ ໄວ ຜູ້ອໍານວຍການສໍານັກງານບັນເທົາທຸກ ແລະ ຈັດຫາງານຂອງສະຫະປະຊາຊາດສໍາລັບຜູ້ລີ້ໄພປາແລັສຕິນຢູ່ຕາເວັນອອກໃກ້ (UNRWA) ປະຈໍາເຂດກາຊາ ກ່າວວ່າ: ທະຫານອິດສະລາແອນຍິງໂຈມຕີຂະບວນລົດຂອງ UNRWA ເຊິ່ງສໍາເລັດໃຫ້ການຊ່ວຍເຫລືອປະຊາຊົນຢູ່ພາກເໜືອຂອງເຂດກາຊາ ແລະ ຢູ່ລະຫວ່າງເດີນທາງກັບໂດຍໃຊ້ເສັ້ນທາງປອດໄພທີ່ກອງທັບອິດສະລາແອນກໍານົດ.
ເຫດການດັ່ງກ່າວເກີດຂຶ້ນໃນວັນທີ 28 ທັນວາຜ່ານມາ ເຖິງວ່າບໍ່ມີຜູ້ໄດ້ຮັບບາດເຈັບ, ແຕ່ລົດຄັນໜຶ່ງໃນຂະບວນໄດ້ຮັບຄວາມເສຍຫາຍ.
ຂະນະທີ່ທ່ານ ມາຣຕິນ ກຣິບຟິ ຜູ້ຊ່ວຍດ້ານກິດຈະການມະນຸດສະທໍາຂອງເລຂາທິການ UN ກ່າວວ່າ: ໄດ້ຮັບລາຍງານຂະບວນລົດຂອງ UNRWA ຖືກໂຈມຕີແທ້ ເຊິ່ງຖືເປັນການລະເມີດກົດໝາຍສາກົນຢ່າງຮ້າຍແຮງ ເນື່ອງຈາກພາຫະນະທຸກຄັນຂອງໜ່ວຍງານໃນສັງກັດສະຫະປະຊາຊາດມີການສະແດງສັນຍາລັກຊັດເຈນ.
ສ່ວນກອງທັບອິດສະລາແອນອອກຖະແຫລງການກ່ຽວກັບເລື່ອງນີ້ວ່າ: ຈະກວດສອບຢ່າງລະອຽດ. ເຖິງຢ່າງໃດກໍຕາມ, ນັບແຕ່ສົງຄາມຢູ່ເຂດກາຊາເກີດຂຶ້ນ ໃນວັນທີ 7 ຕຸລາຜ່ານມາ ອິດສະລາແອນກ່າວວ່າ: ຄວາມຊັກຊ້າ ແລະ ການຊ່ວຍເຫລືອຢູ່ເຂດກາຊາຍັງບໍ່ຄວບຄຸມ ເປັນຄວາມບົກພ່ອງຂອງ UN ເອງ.
