ມອບ-ຮັບ ໂຄງການປັບປຸງໂຮງໝໍແຂວງໄຊສົມບູນ ແລະ ໂຄງການຫໍພັກພະນັກງານ ມູນຄ່າ 158,04 ຕື້ດົງ
ວັນທີ 27 ທັນວາ 2023, ແຂວງໄຊສົມບູນ ຈັດພິທີມອບ-ຮັບ ໂຄງ ການປັບປຸງ ແລະ ຍົກລະດັບໂຮງໝໍແຂວງ, ໂຄງການຫໍພັກພະນັກງານ 3 ຊັ້ນ ແຂວງໄຊສົມບູນ ເຊິ່ງເປັນໂຄງການຊ່ວຍເຫລືອລ້າຈາກລັດຖະບານ ສສ ຫວຽດນາມ ໂດຍແມ່ນກອງບັນຊາການທະຫານເຂດ 4 ສສ ຫວຽດນາມ ເປັນເຈົ້າຂອງໂຄງການ.
ການປັບປຸງ, ຍົກລະດັບໂຮງໝໍແຂວງໄຊສົມບູນ ແມ່ນໂຄງການໜຶ່ງທີ່ອົງຄະນະພັກ-ອົງການປົກຄອງແຂວງ ໄດ້ຄົ້ນຄວ້າ ແລະ ກໍານົດຢູ່ໃນມະຕິກອງປະຊຸມຕົວແທນສະມາຊິກພັກ ທົ່ວແຂວງໄຊສົມບູນ ແລະ ມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງ ຄົມ 5 ປີ ຄັ້ງທີ II ຂອງແຂວງ ໃນການຍົກລະດັບໃຫ້ເປັນໂຮງໝໍແຂວງທີ່ທັນສະໄໝ ສາມາດບໍລິການ ຮັບໃຊ້ຜູ້ມາປິ່ນປົວສຸຂະພາບ ໃຫ້ມີຄວາມສະດວກ, ວ່ອງໄວ, ມີຄຸນນະພາບ, ສາມາດປິ່ນປົວຜ່າຕັດຂະໜາດກາງ ແລະ ຂະໜາດໃຫຍ່ໄດ້. ທັງນີ້, ກໍເພື່ອຮັບໃຊ້ບໍລິການພໍ່ແມ່ປະຊາຊົນ ແລະ ຫລຸດຜ່ອນຄວາມແອອັດຂອງຄົນເຈັບລົງ, ຈະໄດ້ຮັບການບໍລິການທີ່ມີຄຸນນະພາບ, ວ່ອງໄວ ແລະ ທັນການ, ພ້ອມທັງຈະເຮັດໃຫ້ປະຊາຊົນທຸກຊັ້ນຄົນ ມີສຸຂະພາບແຂງແຮງ ເພື່ອເປັນກໍາລັງສໍາຄັນປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາ ແຂວງໄຊສົມບູນ ໃຫ້ດີຂຶ້ນເປັນກ້າວໆ. ສຳລັບ ໄລ ຍະການກໍ່ສ້າງແມ່ນເລີ່ມແຕ່ວັນທີ 27 ກຸມພາ 2021 ຫາ 27 ທັນວາ 2023 ຈຶ່ງໄດ້ມອບຮັບຢ່າງເປັນທາງການ. ໃນນີ້, ເປັນຕຶກອາຄານສອງຊັ້ນມີ 2 ຕຶກ, ມີຫ້ອງປົວພະຍາດຕ່າງໆ 15 ຫ້ອງ, ມີ 80 ຕຽງນອນ ແລະ ມີອຸປະກອນການແພດຈໍານວນໜຶ່ງ, ລວມມູນຄ່າໃນການກໍ່ສ້າງທັງໝົດ 158,04 ຕື້ດົງ.
ສ່ວນໂຄງການຫໍພັກພະນັກງານແຂວງໄຊສົມບູນ ເປັນອາຄານ 3 ຊັ້ນ, ມີເນື້ອທີ່ກໍ່ສ້າງເກືອບ 3.000 ຕາແມັດ, ມີທັງໝົດ 40 ຫ້ອງພ້ອມອຸປະກອນຄົບຊຸດ, ພື້ນຖານໂຄງລ່າງດ້ານເຕັກນິກປະກອບມີປະຕູ, ຮົ້ວ, ເດີ່ນເບຕົງ, ເສັ້ນທາງພາຍໃນ, ອ່າງເກັບນໍ້າໃຕ້ດິນ, ລະບົບສະໜອງໄຟຟ້າ, ສະໜອງ ແລະ ລະບາຍນໍ້າຄົບຊຸດ ລວມມູນຄ່າການກໍ່ສ້າງທັງໝົດ 30 ຕື້ດົງ ເຊິ່ງໄດ້ເລີ່ມລົງມືກໍ່ສ້າງ ແຕ່ເດືອນມັງກອນ 2023 ເປັນໄລຍະ 12 ເດືອນ ເຊິ່ງສໍາເລັດ ແລະ ມອບ-ຮັບ ຢ່າງເປັນທາງການ.
