ລັດຖະບານ ເລັ່ງສຸ່ມໃສ່ການແກ້ໄຂບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ

ກອງປະຊຸມລັດຖະບານເປີດກວ້າງ ຄັ້ງທີ II ປີ 2023 ດຳເນີນໄປ ໃນວັນທີ 26-27 ທັນວາ 2023 ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ນາຍົກລັດຖະມົນຕີ.

ຜ່ານການຄົ້ນຄວ້າ, ປຶກສາຫາລື ແລະ ປະກອບຄຳເຫັນດ້ວຍຄວາມເອົາໃຈໃສ່ ຕໍ່ 3 ວາລະສໍາຄັນ, ເຊິ່ງກອງປະຊຸມໄດ້ເຫັນດີຮັບຮອງເອົາບົດລາຍງານສະຫລຸບການປະຕິບັດມະຕິກອງປະຊຸມລັດຖະບານເປີດກວ້າງ ຄັ້ງທີ I ແລະ ກໍານົດທິດທາງແຜນວຽກຈຸດສຸມຂອງລັດຖະບານ ປີ 2024  ພ້ອມທັງສືບຕໍ່ປະຕິບັດ 2 ວາລະແຫ່ງຊາດ ແລະ ການແກ້ໄຂບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ໃຫ້ປະສົບຜົນ ສຳເລັດ ແລະ ເປັນຮູບປະທຳ ຕາມແຜນທີ່ກຳນົດໄວ້ ໂດຍໃຫ້ເອົາໃຈໃສ່ ຕໍ່ບັນດາວຽກງານຕົວຈິງໃນປີ 2024 ຈຳນວນໜຶ່ງ ຄື:

ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ: ສຸມໃສ່ຈັດຕັ້ງປະຕິບັດ 4 ໜ້າທີ່ໃຫຍ່, 26 ແຜນງານຂອງກະຊວງປ້ອງກັນປະເທດ ແລະ 4 ແຜນງານ, 41 ໂຄງການ ຂອງກະຊວງປ້ອງກັນຄວາມສະຫງົບ, ເອົາໃຈໃສ່ແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນ ລົງເລິກແກ້ໄຂບັນຫາຢາເສບຕິດໃຫ້ຫລຸດລົງ ຕິດພັນກັບການຄຸ້ມຄອງອາວຸດເຖື່ອນ ແລະ ອາວຸດດັດແປງ ດ້ວຍມາດຕະການແກ້ໄຂຮູບແບບໃໝ່; ຄຸ້ມຄອງສື່ສັງຄົມອອນລາຍ ແລະ ສ້າງແຜນການເຄື່ອນ ໄຫວວຽກງານຕ້ານ ແລະ ສະກັດກັ້ນການກໍ່ອາຊະຍາກໍາທາງໄຊເບີ.

ດ້ານເສດຖະກິດ: ສຸມໃສ່ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສະເພາະບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ, ແລະ ໜີ້ສິນຕ່າງປະເທດ ດ້ວຍການບັງຄັບໃຊ້ບັນດາມາດຕະການ ທີ່ໄດ້ວາງອອກແລ້ວໃຫ້ປະກົດຜົນເປັນຈິງ ແລະ ເປັນຮູບປະທຳຫລາຍຂຶ້ນກ່ວາເກົ່າ; ສຸມໃສ່ການເກັບລາຍຮັບງົບປະມານ ປີ 2024 ໃຫ້ໄດ້ຕາມແຜນ ຫລື ເກີນແຜນ ແລະ ອື່ນໆ.

ດ້ານວັດທະນະທໍາ-ສັງຄົມ: ຊຸກຍູ້ວຽກງານສົ່ງເສີມການທ່ອງທ່ຽວ ໃນປີທ່ອງທ່ຽວລາວ ຕິດພັນກັບການເປັນປະທານກອງປະຊຸມອາຊຽນ ດ້ວຍການສຸມໃສ່ປັບປຸງພື້ນຖານໂຄງລ່າງ ໂດຍສະເພາະ ເສັ້ນທາງ, ສະຖານທີ່ທ່ອງທ່ຽວ ແລະ ສະຖານທີ່ບໍລິການນັກທ່ອງທ່ຽວ ໂດຍສົມທົບແໜ້ນກັບຜູ້ປະກອບການ ກໍຄື ທຸກພາກສ່ວນໃນສັງຄົມ ເພື່ອສ້າງສະພາບແວດລ້ອມທີ່ດີ, ບໍລິການນັກທ່ອງທ່ຽວ ໃຫ້ມີຄວາມປະທັບໃຈ; ສຸມໃສ່ປະຕິບັດນະໂຍບາຍ ແລະ ມາດຕະການ ໃນການແກ້ໄຂບັນຫາການຂາດເຂີນຄູ ແລະ ການປະລະການຮຽນ ຕາມມະຕິລັດຖະບານ ສະບັບເລກທີ 09 ໃຫ້ເປັນຮູບປະທໍາ.

ຄົ້ນຄວ້ານະໂຍບາຍ ແລະ ມາດຕະການ ໃນການແກ້ໄຂບັນຫາຂາດເຂີນແຮງງານພາຍໃນປະເທດ ໂດຍໃຫ້ປະເມີນຄືນ ການປະຕິບັດນະໂຍບາຍທີ່ກຳນົດໃນບັນດານິຕິກຳ ທີ່ໄດ້ອອກຜ່ານມາ,ນະໂຍບາຍໃດບໍ່ເໝາະສົມ ກໍໃຫ້ປັບປຸງ; ເພີ່ມທະວີຄຸ້ມຄອງແຮງງານລາວ ທີ່ໄປເຮັດວຽກ ຢູ່ຕ່າງປະເທດ.

ຂົງເຂດການປົກຄອງ, ການບໍລິຫານລັດ ແລະ ຍຸຕິທໍາ: ສຸມໃສ່ສ້າງ ແລະ ປັບປຸງກົດໝາຍ ທີ່ສະພາແຫ່ງຊາດ ໄດ້ຮັບຮອງແຜນແລ້ວນັ້ນ ຈໍານວນ 20 ສະບັບ, ພ້ອມນັ້ນ ກໍສຸມໃສ່ສ້າງ ແລະ ປັບປຸງນິຕິກໍາລຸ່ມກົດໝາຍຈຳນວນໜຶ່ງ ໂດຍສະເພາະ ການອອກຄຳແນະນໍາການຈັດຕັ້ງປະຕິບັດບາງມາດຕາຂອງກົດໝາຍທີ່ຍັງບໍ່ແຈ້ງ; ສຸມໃສ່ການຈັດຕັ້ງປະຕິບັດຄຳຕັດສິນຂອງສານ ທີ່ໃຊ້ໄດ້ຢ່າງເດັດຂາດໃຫ້ໄວ ແລະ ໃຫ້ໄດ້ຫລາຍກ່ວາປີຜ່ານມາ; ສືບຕໍ່ສຸມໃສ່ຈັດຕັ້ງປະຕິບັດການຫັນຫົວໜ່ວຍວິຊາການ ທີ່ມີລາຍຮັບ ແລະ ມີເງື່ອນໄຂ ໄປສູ່ການກຸ້ມຕົນເອງທາງດ້ານງົບປະມານເທື່ອລະກ້າວ; ຊຸກຍູ້ ແລະ ສົ່ງເສີມທຸກພາກສ່ວນໃນສັງຄົມ ປະກອບສ່ວນເຂົ້າໃນການພັດທະນາຊົນນະບົດ ແລະ ແກ້ໄຂຄວາມທຸກຍາກ ໂດຍການດຶງດູດການລົງທຶນຂອງພາກເອກະຊົນ ເພື່ອສ້າງວຽກເຮັດງານທໍາ ແລະ ລາຍໄດ້ໃຫ້ປະຊາຊົນກັບທີ່.

ຂົງເຂດວຽກງານການຕ່າງປະເທດ: ສືບຕໍ່ກະກຽມຄວາມພ້ອມຮອບດ້ານ ໃຫ້ແກ່ການເປັນປະທານກອງປະຊຸມອາຊຽນ ໃນປີ 2024, ພ້ອມທັງສົມທົບກັບວຽກປ້ອງກັນຊາດ ແລະ ປ້ອງກັນຄວາມສະຫງົບ, ການອຳນວຍຄວາມສະດວກ, ການຮັກສາຄວາມສະອາດ ແລະ ການບໍລິການຕ່າງໆ ເພື່ອສ້າງສະພາບແວດລ້ອມທີ່ດີໃຫ້ແກ່ຜູ້ແທນມາຮ່ວມກອງປະຊຸມຕ່າງໆ ທັງເປັນໂຄສະນາການທ່ອງທ່ຽວ; ສຸມໃສ່ຈັດຕັ້ງປະຕິບັດບັນດາຂໍ້ຕົກລົງ, ສັນຍາ ແລະ ສົນທິສັນຍາ ທີ່ລາວເຮົາໄດ້ລົງນາມ ແລະ ເປັນພາຄີ.

ໂອກາດນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຮຽກຮ້ອງມາຍັງບັນດາທ່ານ ສະມາຊິກລັດຖະບານ, ເຈົ້າແຂວງ ແລະ ເຈົ້າຄອງນະຄອນຫລວງວຽງຈັນ ຕ້ອງໄດ້ຍົກສູງຄວາມຮັບຜິດຊອບ ແລະ ຄວາມເປັນເຈົ້າການ ໃນການຈັດຕັ້ງປະຕິບັດວຽກງານໃນຄວາມຮັບຜິດຊອບ ໃຫ້ສູງກວ່າເກົ່າແທ້ໆ ໂດຍຫັນເປັນແຜນປະຕິບັດງານລະອຽດ, ມີຄາດໝາຍຊັດເຈນ, ມີການແບ່ງຄວາມຮັບຜິດຊອບໃຫ້ການຈັດຕັ້ງ ແລະ ບຸກຄົນຢູ່ແຕ່ລະຂັ້ນ ໃນແຕ່ລະໄລຍະ ໃຫ້ຈະແຈ້ງ, ທັງສອດຄ່ອງກັບເງື່ອນໄຂສະພາບຄວາມເປັນຈິງ ຂອງແຕ່ລະບ່ອນ ແລະ ໄດ້ຮັບຜົນສຳເລັດເປັນກ້າວໆ.