ນ້ອຍໝາກເຜັດຂີ້ໜູເກັ່ງກ້າ ໃຫຍ່ຂຶ້ນມາຂໍໃຫ້ເປັນໝາກແຕງຊ້າງໜ່ວຍປາຍ

ໂດຍ: ທິດກໍ່າ

ເປັນທີ່ໜ້າຊົມເຊີຍ ແລະ ພູມໃຈຢ່າງຊາບຊຶ້ງທີ່ນັກເຕະບານເຍົາວະຊົນລາວຮຸ້ນອາຍຸບໍ່ເກີນ 10 ປີ U-10 WIG NAGA ໄດ້ສ້າງປະຫວັດສາດຊະນະທີມບານເຕະເຍົາວະຊົນຈາກປະເທດອິນໂດເນເຊຍ 4-1 ປະຕູ ໃນລາຍການທີເອອາ TAR Asia Qualifiers ທີ່ຈັດຂຶ້ນຢູ່ປະເທດໄທ ເພື່ອຄັດເລືອກໄປເຕະຮອບສຸດທ້າຍທີ່ປະເທດແອັສປາຍ ໃນວັນທີ 15-17 ທັນວາ 2023 ທີ່ຜ່ານມາ. ໃນບັນດາທີມນັກເຕະເຍົາວະຊົນໃນເຂດອາຊີທີ່ໄດ້ເຂົ້າຮ່ວມທັງໝົດ 56 ທີມທີ່ຄັດມາຈາກ 8 ປະເທດຄື: ໄທ ເຈົ້າພາບ, ສປ ຈີນ, ຍີ່ປຸ່ນ, ມາເລເຊຍ, ອິນໂດເນເຊຍ, ສິງກະໂປ, ລາວ ແລະ ໄຕ້ຫວັນ ໃນຈໍານວນນີ້ໄດ້ແບ່ງອອກເປັນ 8 ກຸ່ມໆລະ 7 ທີມ. ສໍາລັບທີມນ້ອງນ້ອຍເຜັດຂີ້ໜູລາວເຮົາຈັດຢູ່ໃນກຸ່ມ C ໂດຍມີທີມເຍົາວະຊົນໄທ 5 ທີມ, ທີມຈາກ ສປ ຈີນ 1 ທີມ. ຜ່ານການໄຕ່ເຕົ້າແຂ່ງຂັນຕໍ່ສູ້ຂອງແຕ່ລະທີມຈຶ່ງໄດ້ມາວັດກັນໃນຮອບຊີງຊະນະເລີດ ກໍເປັນອັນວ່ານ້ອງນ້ອຍລາວເຮົາສາມາດພິກຊະນະທີມເຍົາວະຊົນອິນໂດເນເຊຍ 4-1 ມີສິດໂກອິນເຕີ Go Inter ໄປແຂ່ງຂັນຮອບສຸດທ້າຍທີ່ປະເທດແອັສປາຍ (Spain) ໃນປີ 2024 ທີ່ຈະມາເຖິງ.

ຢ່າງໃດກໍດີ, ຫາກຕັ້ງໂຈດກັນວ່າ ດ້ວຍສາເຫດໃດເຂົາຈຶ່ງມີສິດເອົາຊະນະຄູ່ຕໍ່ສູ້ໄດ້ຢ່າງຂາດລອຍ. ຄໍາຕອບກໍຄື ຍ້ອນເຂົາເກັ່ງກວ່າທີມອື່ນໆທີ່ໄດ້ເຂົ້າຮ່ວມແຂ່ງຂັນໃນຄັ້ງນີ້, ສ່ວນປັດໄຈທີ່ເຮັດໃຫ້ເຂົາເກັ່ງກໍຍ້ອນເຂົາມີຄວາມຕັ້ງໃຈຝຶກຊ້ອມ ທັງມີພອນສະຫວັນມັກຮັກກິລາບານເຕະ, ໄດ້ຮັບຄວາມອົບອຸ່ນ, ປະຕິບັດລະບຽບໃນການຝຶກຊ້ອມ ແລະ ສິ່ງທີ່ຂາດບໍ່ໄດ້ກໍຄືມີຄະນະນໍາທີ່ດີ, ມີຄູຝຶກທີ່ພຽບພ້ອມ ທັງມີບົດຮຽນ, ມີປະສົບປະການໃນການຝຶກແອບ, ມີນໍ້າໃຈເສຍສະຫລະ, ບໍ່ເຫັນແກ່ຜົນປະໂຫຍດສ່ວນຕົວ, ກຽດ ແລະ ຊື່ສຽງຂອງປະເທດຊາດຄືສິ່ງສູງສຸດ ເຖິງຈະເກີດກໍລະນີໃດກໍຕາມຕ້ອງສູ້ເພື່ອປະເທດຊາດເປັນທີ່ຕັ້ງ ແລະ ສິ່ງທີ່ຂາດບໍ່ໄດ້ອີກປະການໜຶ່ງ ກໍຄືກຸ່ມບໍລິສັດເອກະຊົນໄດ້ສະໜອງເຫື່ອແຮງ ທັງນໍ້າໃຈ ແລະ ວັດຖຸເງິນຄໍາ ທັງຕັດສິນໃຈສ້າງທີມບານເຕະເຍົາວະຊົນທີ່ມີສາຍານາມຈາກພື້ນແຜ່ນຕໍານານວຽງຈັນສີສັດຕະນາຄະນາຫຸດ ອັນເປັນແຫລ່ງທີ່ມາຂອງຊື່ນະຄອນຫລວງວຽງຈັນໃນຍຸກລ້ານຊ້າງ.

ແນວໃດກໍຕາມ, ເມື່ອຫລິ່ງໄປເບື້ອງໜ້າທີ່ຈະມາເຖິງ ພາລະກິດຂອງພວກລູກຫລານຍັງມີອັນຂວາງໜ້າຄື ຕ້ອງສ້າງຜົນງານມາເອກອ້າງປະເທດຊາດບ້ານເມືອງໃນເສິກທີ່ຈະໄປແຂ່ງກັບທີມທີ່ແຂງແກ່ນທີ່ປະເທດແອັສປາຍ (Spain). ສະນັ້ນ ຕ້ອງສືບຕໍ່ຝຶກຊ້ອມໃຫ້ແຂງແກ່ນຫລາຍທົບເທົ່າ ເພື່ອຈະເກັບໄຊຊະນະມາໃຫ້ປະເທດຊາດ. ກຽດຊື່ສຽງ ແລະ ຄວາມຫວັງອັນໃຫຍ່ຫລວງຂອງຊາດ ແລະ ປະຊາຊົນລາວທີ່ລໍຄອຍຊົມຜົນງານນັ້ນ ຄືນໍາເອົາໄຊຊະນະມາຝາກມາຕ້ອນທຸກຄົນໃນຊາດ. ພວກຫລານຕ້ອງກາຍເປັນສິນໄຊແຫ່ງຍຸກສະໄໝ ໃຫຍ່ຂຶ້ນມາກໍຂໍໃຫ້ເປັນໝາກແຕງຊ້າງໜ່ວຍປາຍຂອງປະເທດຊາດບ້ານເມືອງ.