ແຂວງເຊກອງ ສຸມໃສ່ສ້າງໂຮງຮຽນຕົວແບບປອດຢາເສບຕິດໃຫ້ບັນລຸຄາດໝາຍວາງໄວ້
December 19, 2023 - 12:26 PM
ວັນທີ 18 ທັນວາ 2023, ທ່ານ ຄໍາໄພ ສິມມາວັດ ຫົວໜ້າພະແນກສຶກສາທິການ ແລະ ກິລາ ແຂວງເຊກອງ ໃຫ້ຮູ້ວ່າ: ພະແນກສຶກສາທິການ ແລະ ກິລາແຂວງເຊກອງ ໄດ້ສຸມໃສ່ສ້າງໂຮງຮຽນ, ຫ້ອງການຂະແໜງການສຶກສາ ແລະ ກິລາ ໃຫ້ປອດຢາເສບຕິດດ້ວຍການໂຄສະນາສຶກສາອົບຮົມການເມືອງ-ແນວຄິດ, ຈັດສໍາມະນາຖາມ-ຕອບ, ໂຄສະນາເຜີຍກົດໝາຍ-ນິຕິກໍາໃຕ້ກົດໝາຍ ແລະ ຜົນຮ້າຍຂອງຢາເສບໃຫ້ສະມາຊິກພັກ, ພະນັກງານ, ຄູ-ອາຈານ, ນັກຮຽນ-ນັກສຶກ ຢູ່ສະຖາບັນການສຶກສາ ກໍຄື ໂຮງຮຽນແຫ່ງຕ່າງໆໃຫ້ຮັບຮູ້ຢ່າງກວ້າງຂວາງ.
ປັດຈຸບັນທົ່ວແຂວງເຊກອງມີໂຮງຮຽນທັງໝົດ 310 ແຫ່ງ, ຮັບຮອງເປັນໂຮງຮຽນຕົວແບບປອດຢາເສບຕິດໄດ້ 253 ແຫ່ງ. ໃນນີ້, ໂຮງຮຽນອະນຸບານ 34 ແຫ່ງ, ໂຮງຮຽນປະຖົມ 219 ແຫ່ງ, ໂຮງຮຽນມັດທະຍົມ 48 ແຫ່ງ, ໂຮງຮຽນເຕັກນິກ-ວິຊາຊີບ 1 ແຫ່ງ, ສູນການສຶກສານອກໂຮງຮຽນ 3 ແຫ່ງ, ແລະ ສຳນັກງານຫ້ອງການຂະແໜງການສຶກສາ-ກິລາ 5 ແຫ່ງ.
ທ່ານ ຄໍາໄພ ສິມາວັດ ໃຫ້ຮູ້ຕື່ມວ່າ: ເພື່ອປະຕິບັດ 6 ວຽກຈຸດສຸມແກ້ໄຂບັນຫາຢາເສບຕິດ ໃນປີ 2024; ສສກ ແຂວງຈະສືບຕໍ່ຜັນຂະຫຍາຍ ວາລະແຫ່ງຊາດ ວ່າດ້ວຍແກ້ໄຂບັນຫາຢາເສບຕິດທີ່ນອນໃນຄວາມຮັບຜິດຊອບຂອງຕົນໃຫ້ເປັນໂຄງການ, ເປັນແຜນ ແລະ ຈັດຕັ້ງປະຕິບັດໃຫ້ເປັນຮູບປະທໍາ; ສືບໂຄສະນາສຶກສາອົບຮົມການເມືອງແນວຄິດ, ໂຄສະນາເຜີຍແຜ່ກົດໝາຍ-ຜົນຮ້າຍຂອງຢາເສບຕິດ, ຈັດພິມປ້າຍໂຄສະນາຕ້ານຢາເສບຕິດ; ເຜີຍແຜ່ຂອບແນວຄວາມຄິດ ກ່ຽວກັບການສະກັດກັ້ນ ແລະ ແກ້ໄຂບັນຫາຢາເສບຕິດ; ຊຸກຍູ້, ຕິດຕາມ, ກວດກາປະເມີນໂຮງຮຽນ, ສູນການສຶກສາ ແລະ ກົມກອງຫ້ອງການປອດຢາເສບຕິດ ແລະ ສືບຕໍ່ສ້າງໂຮງຮຽນຕົວແບບປອດຢາເສບຕິດໃຫ້ບັນລຸໄດ້ຕາມແຜນການທີ່ວາງໄວ້.
