ພົບກ້ອນໜິ້ວ 300 ອັນ ຢູ່ໃນໄຕຄົນເຈັບຍິງສາວ ສາເຫດອາດເກີດຈາກມັກດື່ມນ້ຳອັດລົມແທນນ້ຳລ້າ
ຜ່າຕັດພົບກ້ອນໜິ້ວໝາກໄຂ່ຫລັງ ບໍ່ຕໍ່າກວ່າ 300 ກ້ອນ
ສື່ທ້ອງຖິ່ນຢູ່ໄຕ້ຫວັນລາຍງານກໍລນີຂອງຄົນເຈັບຍິງອາຍຸ 20 ປີ ເຊິ່ງລາຍງານຂ່າວລະບຸຊື່ໄວ້ພຽງວ່າ: ເສຍວໍວີ໋ ຜູ້ມີກ້ອນໜິ້ວ 300 ກວ່າກ້ອນຢູ່ໃນຮ່າງກາຍ.
ກ່ອນໜ້ານັ້ນ, ເສຍວໍວີ໋ ເຂົ້າຮັບການປິ່ນປົວຢູ່ໂຮງໝໍສີເໝີຍ ໃນເມືອງໄຖໜານ ຂອງໄຕ້ຫວັນ ຫລັງຈາກນາງຈົ່ມວ່າມີອາການເຈັບຫລັງຢ່າງຮຸນແຮງ ລວມທັງເປັນໄຂ້ນໍາ.
ຜົນການກວດເລືອດຂອງນາງ ເສຍວໍວີ໋ ສະແດງໃຫ້ເຫັນວ່າ: ເຊລເມັດເລືອດຂາວຂອງນາງມີຈໍານວນສູງຜິດປົກກະຕິ, ທີມແພດຈຶ່ງສັ່ງໃຫ້ກວດຊີທີສະແກນ ແລະ ໄດ້ຜົນອອກມາວ່າ: ໝາກໄຂ່ຫລັງເບື້ອງຂວາຂອງນາງເຕັມໄປດ້ວຍຂອງແຫລວ ແລະ ກ້ອນໜິ້ວຈໍານວນຫລາຍ.
ທໍາອິດ, ແພດໄດ້ສັ່ງໃຫ້ຄົນເຈັບຜູ້ນີ້ຮັບຢາຂ້າເຊື້ອ ຈາກນັ້ນກໍຖ່າຍຂອງແລວ ອອກຈາກໝາກໄຂ່ຫລັງຂອງນາງ ແລະ ຂັ້ນຕອນສຸດທ້າຍຄືການຜ່າຕັດແບບສ່ອງກ້ອງ ເພື່ອນໍາເອົາກ້ອນໜິ້ວທັງໝົດອອກມາ ເຊິ່ງປາກົດວ່າ: ທີມແພດຜ່າຕັດສາມາດນໍາເອົາກ້ອນໜິ້ວອອກມາໄດ້ທັງໝົດບໍ່ຕໍ່າກວ່າ 300 ກ້ອນ ມີຂະໜາດລະຫວ່າງ 5ມມ ເຖິງ 2 ຊມ ສ່ວນຫລາຍມີລັກສະນະກົມກ້ຽງຄືກ້ອນຫີນ.
ເຖິງວ່າຈະມີຫລາຍປັດໄຈທີ່ເຮັດໃຫ້ເກີດໜິ້ວໝາກໄຂ່ຫລັງ, ແຕ່ໃນກໍລະນີນີ້ ຄົນເຈັບຍິງສາວນີ້ຍອມຮັບວ່າ: ນາງບໍ່ມັກດື່ມນໍ້າລ້າ ໂດຍຈະດື່ມນໍ້າໝາກໄມ້ ແລະ ນໍ້າຊາຫວານໆທີ່ມີຂາຍຕາມຮ້ານຂາຍເຄື່ອງດື່ມທົ່ວໄປແທນ ເມື່ອຮູ້ສຶກຢາກນໍ້າ. ພຶດຕິກໍາແບບນີ້ເຮັດໃຫ້ຮ່າງກາຍຂາດນໍ້າຊໍ້າເຮື້ອ ສົ່ງຜົນເຮັດໃຫ້ປັດສະວະມີຄວາມເຂັ້ມຂຸ້ນສູງ ເກືອແຮ່ທີ່ຢູ່ໃນນໍ້າປັດສະວະເກີດການຕົກຕະກອນ ແລະ ແຂງຕົວ ກາຍເປັນກ້ອນໜິ້ວ.
ແພດລະບົບທາງເດີນປັດສະວະຂອງໂຮງໝໍສີເໝີຍໄດ້ອອກຄໍາເຕືອນປະຊາຊົນວ່າ: ຄວນດື່ມນໍ້າສະອາດໃຫ້ພຽງພໍໃນແຕ່ລະວັນ ເພື່ອໃຫ້ຮ່າງກາຍສາມາດລະລາຍ ແລະ ຂັບຖ່າຍນໍ້າຕານ, ເກືອ ແລະ ແຄນຊຽມທີ່ໄດ້ຮັບເຂົ້າໄປໄດ້ຢ່າງມີປະສິດທິພາບ ໂດຍຍົກກໍລະນີຂອງນາງ ເສຍວໍວີ໋ ເປັນຕົວຢ່າງ.
