ສ່ວຍສາອາກອນ ຕ້ອງຫ້າວຫັນ ຊື່ສັດບໍລິສຸດ ແລະ ສູ້ຊົນຈັດເກັບລາຍຮັບໃຫ້ບັນລຸຕາມຄາດໝາຍ

ໃນໂອກາດໂອ້ລົມໃນກອງປະຊຸມສະຫລຸບຕີລາຄາການຈັດຕັ້ງປະຕິບັດ ການເຄື່ອນໄຫວວຽກງານສ່ວຍສາອາກອນ ທົ່ວປະເທດ ປະຈໍາປີ 2023 ແລະ ທິດທາງແຜນການປະຈໍາປີ 2024 ທີ່ອັດລົງໃນວັນທີ 15 ທັນວາ 2023, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ເນັ້ນໃຫ້ຄະນະນຳແຕ່ລະຂັ້ນຕ້ອງເພີ່ມທະວີການສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນຢ່າງຕໍ່ເນື່ອງ ແລະ ປົກກະຕິ, ກໍາແໜ້ນ ນໍາພາແນວຄິດພະນັກງານໃຫ້ໂລ່ງລ່ຽນ, ມີຄວາມຫ້າວຫັນ, ມີຄວາມຊື່ສັດ-ບໍລິສຸດ, ມີຈັນຍາບັນໃນການປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ, ທົບທວນຄືນການຈັດຕັ້ງປະຕິບັດພາລະບົດບາດຂອງກົມສ່ວຍສາອາກອນໃຫ້ແທດເໝາະກັບບັນດາໜ້າວຽກທີ່ມີນັບແຕ່ສູນກາງລົງຮອດທ້ອງຖິ່ນ, ຮັບປະກັນກົງຈັກການຈັດຕັ້ງບໍ່ໃຫ້ສັບສົນເກີນໄປ ແຕ່ມີປະສິດທິຜົນສູງສຸດ.

ພ້ອມນັ້ນຕ້ອງປັບປຸງແບບແຜນວິທີເຮັດວຽກຂອງຄະນະນໍາແຕ່ລະຂັ້ນໃນການນໍາພາ-ຊີ້ນໍາສະມາ ຊິກພັກ-ພະນັກງານລັດຖະກອນ ທີ່ເຫັນວ່າຍັງບໍ່ທັນແທດເໝາະກັບສະພາບການເຄັ່ງຮ້ອນຂອງເສດຖະ ກິດໃນປັດຈຸບັນໃຫ້ມີຄວາມກົມກຽວ, ໂລ່ງລ່ຽນ ແລະ ທັນການກວ່າເກົ່າ, ຄະນະພັກ-ຄະນະນຳຂະ ແໜງສ່ວຍສາອາກອນແຕ່ລະຂັ້ນນັບແຕ່ສູນກາງຮອດທ້ອງຖິ່ນ ຕ້ອງຮີບຮ້ອນນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ ໄປຈັດຕັ້ງປະຕິບັດໂດຍໃຫ້ມີການແບ່ງຄວາມຮັບຜິດຊອບຢ່າງຊັດເຈນ, ມີການກຳນົດເປັນແຜນຄົນ, ແຜນງານລະອຽດໃນການຈັດເກັບລາຍຮັບສ່ວຍສາອາກອນ ໂດຍມີຕົວຊີ້ວັດໃນການຈັດຕັ້ງປະຕິບັດມີການກໍານົດເປົ້າໝາຍ ແລະ ມີຈຸດສຸມຊັດເຈນ ເພື່ອສູ້ຊົນຈັດເກັບລາຍຮັບສ່ວຍສາອາກອນຕາມຕົວເລກແຜນປີ 2024 ໃຫ້ບັນລຸຕາມໝາຍ.