ຊາຍຊາວຈີນທີ່ມຶນເມົາຂັບຂີ່ ລົດກະບະຕໍາລົດຈັກ ແລະ ລົດໃຫຍ່ ຫລາຍຄັນ ແລ້ວຫລົບໜີ ໄດ້ອອກມາຂໍໂທດພ້ອມຮັບຜິດຊອບຕໍ່ຜົນເສຍຫາຍ

ວັນທີ 14 ທັນວາ 2023, ພັທ ສຸນີ ໄຊຍະວົງ ຮອງຫົວໜ້າພະແນກຕໍາຫລວດ ຊີ້ນໍາວຽກງານຕໍາຫລວດຈະລາຈອນ ເມືອງໄຊທານີ ນະຄອນຫລວງວຽງຈັນ ໄດ້ຖະແຫລງຕໍ່ສື່ມວນຊົນ ປກສ ວ່າ: ເຫດການຊາຍຊາວຈີນຂັບຂີ່ ລົດກະບະຟອດ ສີຂາວ ບໍ່ມີປ້າຍທະບຽນ ຂັບຂີ່ດາດເອົາລົດຈັກ 6 ຄັນ ແລະ ລົດກະບະວີໂກ້ 4 ຄັນ ແລ້ວບໍ່ຈອດ ແມ່ນເກີດຈາກຜູ້ຂັບຂີ່ຢູ່ໃນສະພາບມຶນເມົາ, ພາຍຫລັງເກີດອຸບັດຕິເຫດແລ້ວການສື່ສານກັບຄູ່ກໍລະນີບໍ່ເຂົ້າໃຈກັນຈຶ່ງເຮັດໃຫ້ປະຊາຊົນຈໍານວນໜຶ່ງໄລ່ຕາມຈົນເຈົ້າໜ້າທີ່ຕໍາຫລວດຈະລາຈອນສາມາດຈັບຕົວໄດ້ຢູ່ບໍລິເວນໄຟອໍານາດດອນໜູນ.

ຈາກການສອບສວນຈຶ່ງຮູ້ວ່າ: ຜູ້ຂັບຂີ່ລົດ ຊື່ທ້າວ ຫວາງຢຸ່ນຫລົງ ອາຍຸ 33 ປີ ສັນຊາດຈີນ ແລະ ຜູ້ໂດຍສານທີ່ນັ່ງມານຳຊື່ ທ້າວ ຊຽງຫລາ ອາຍຸ 36 ປີ, ສັນຊາດຈີນ, ທັງສອງຄົນເປັນກຳມະກອນ, ພັກເຊົາຢູ່ບ້ານນາຄຳ ເມືອງ ສີໂຄດຕະບອງ ນະຄອນຫລວງວຽງຈັນ;

ທ້າວ ຫວາງຢຸ່ນຫລົງ ກ່າວວ່າ: “ຕໍ່ເຫດການທີ່ເກີດຂຶ້ນໃນຄັ້ງນີ້ມັນໄດ້ສ້າງຄວາມຫາຍທາງດ້ານພາຫະນະ, ສຸຂະພາບ ແລະ ເຮັດໃຫ້ສັງຄົມມີຄວາມແຕກຕື່ນ; ສະນັ້ນ, ພວກຂ້າພະເຈົ້າທັງສອງຄົນຈຶ່ງ ຂໍໂທດຕໍ່ ລັດຖະບານ ກໍ່ຄື ພໍ່-ແມ່ ປະຊາຊົນລາວບັນດາເຜົ່າ ແລະ ຂໍໂທດມາຍັງປະຊາຊົນຈີນທີ່ດຳລົງຊີວິດຢູ່ ສປປ ລາວ ທີ່ສ້າງຄວາມເຊື່ອມເສຍໄປໃນທາງທີ່ບໍ່ດີ ແລະ ຫວັງວ່າທຸກຄົນຈະໃຫ້ອະໄພ ຕໍ່ການກະທໍາຂອງພວກຂ້າພະເຈົ້າໃນຄັ້ງນີ້ ແລະ ພວກຂ້າພະເຈົ້າຈະຮັບຜິດຊອບຕໍ່ຜົນເສຍຫາຍທັງໝົດ, ແລະ ຝາກເຖິງທຸກຄົນໃນສັງຄົມລາວ ແລະ ຊາວຕ່າງປະເທດ ບໍ່ຄວນເອົາເປັນແບບຢ່າງ ແລະ ຂໍສັນຍາວ່າຈະບໍ່ໃຫ້ເກີດມີເຫດການແບບນີ້ຂຶ້ນອີກ”.