ກວດພົບຮ້ານບັນເທີງຢູ່ເມືອງສັງທອງ 2 ຮ້ານ ລະເມີດລະບຽບການເປີດຮ້ານເກີນໂມງ

ວັນທີ 12 ທັນວາ 2023, ຄະນະຮັບຜິດຊອບຕິດຕາມ, ກວດກາ ແລະ ແກ້ໄຂສຽງເນືອງນັນໃນທຸລະກິດຮ້ານອາຫານ ແລະ ຮ້ານບັນເທີງຢູ່ນະຄອນຫລວງວຽງຈັນ (ນວ) ຈຸທີ 4 ໃນຂອບເຂດຮັບຜິດຊອບ 3 ເມືອງ ຄື: ສີໂຄດຕະບອງ, ນາຊາຍທອງ ແລະ ສັງທອງ, ໄດ້ສືບຕໍ່ເຄື່ອນໄຫວຕິດຕາມສະພາບການຕົວຈິງຂອງບັນດາຮ້ານອາຫານ ແລະ ຮ້ານບັນເທີງ ຢູ່ເມືອງສັງທອງ ພົບເຫັນ 2 ຮ້ານທີ່ລະເມີດລະບຽບການກຳນົດຄື: ຮ້ານບັນເທີງໃບຢົກ ຢູ່ບ້ານປາກຕອນ ເປີດບໍລິການເກີນເວລາ ແລະ ເປີດ ເພງສຽງດັງເກີນກໍານົດ; ຮ້ານບັນເທີງນີນ່າ ຢູ່ບ້ານເພຍລາດ ເປີດເພັງເກີນເວລາ ແຕ່ລະດັບສຽງຢູ່ໃນເກນທີ່ກໍານົດໄວ້ບໍ່ສົ່ງຜົນກະທົບຕໍ່ຄົນອ້ອມຂ້າງ.

ລະບຽບທີ່ກໍານົດໄວ້, ຮ້ານອາຫານກາງແຈ້ງໃຫ້ປິດສຽງເພງ-ປິດຮັບລູກຄ້າ ເວລາ 23:00 ໂມງ ແລະ ປິດຮ້ານເວລາ 24:00 ໂມງ, ສ່ວນຮ້ານບັນເທີງໃຫ້ປິດສຽງເພງ-ປິດຮັບລູກຄ້າ ເວລາ 24:00 ໂມງ ແລະ ປິດຮ້ານເວລາ 1:00 ໂມງ, ສຳລັບຮ້ານທີ່ກວດພົບວ່າ ເຈົ້າຂອງທຸລະກິດທີ່ເຮັດຜິດລະບຽບການດັ່ງກ່າວ ຄະນະສະເພາະກິດ ໄດ້ເຮັດບັນທຶກກວດກາ ແລະ ສຶກສາອົບຮົມປັບໃໝ ຕາມລະບຽບ ແລະ ຂັ້ນຕອນທີ່ຂັ້ນເທິງວາງອອກຢ່າງເຂັ້ງງວດ.