ເປີດນໍາໃຊ້ຫໍພິພິທະພັນປະຫວັດສາດ ກອງທັບປະຊາຊົນລາວ ພາຍຫລັງສຳເລັດການບູລະນະສ້ອມແປງລວມມູນຄ່າທັງໝົດ 4.631.755 ໂດລາ
ວັນທີ 13 ທັນວາ 2023, ກະຊວງປ້ອງກັນປະເທດ ໄດ້ເປີດນໍາໃຊ້ ຫໍພິພິທະພັນປະຫວັດສາດກອງທັບ ພາຍຫລັງທີ່ສຳເລັດການບູລະນະສ້ອມແປງ ແລະ ປັບປຸງເນື້ອໃນການວາງສະແດງຄືນໃໝ່ ເພື່ອກະກຽມຈັດຕັ້ງສະເຫລີມສະຫລອງ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ທີ່ຈະມາເຖິງນີ້, ມີພົອ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ທ່ານ ຟາມ ມິນຈຽນ ອຸປະທູດຊົ່ວຄາວ ສະຖານທູດຫວຽດ ນາມ ປະຈຳລາວ ເຂົ້າຮ່ວມ.
ທ່ານ ລັດຖະມົນຕີກະຊວງປ້ອງກັນປະເທດ ມີຄຳເຫັນວ່າ: ເພື່ອແນໃສ່ປັບປຸງຄືນລະບົບໂຄງຮ່າງວາງສະແດງ ແລະ ເນື້ອໃນດ້ານຕ່າງໆ, ສ້າງໃຫ້ເປັນສູນລວມປະຫວັດສາດ, ທ້ອນໂຮມວັດຖຸກໍາ, ຄຸ້ມຄອງ-ປົກປັກຮັກສາ ແລະ ຈັດວາງສະແດງປະຫວັດມູນເຊື້ອ, ຜົນງານໄຊຊະນະຂອງກອງທັບປະຊາຊົນລາວ ພາຍໃຕ້ການນໍາພາ-ຊີ້ນໍາ ຂອງພັກປະຊາຊົນ ປະຕິວັດລາວ ໃຫ້ມວນຊົນທຸກຊັ້ນຄົນ ທັງພາຍໃນ ແລະ ຕ່າງປະເທດ ໄດ້ເຂົ້າຄົ້ນຄວ້າ, ສຶກສາຮໍ່າຮຽນ ແລະ ຢ້ຽມຊົມດ້ວຍຄວາມປະທັບໃຈ ຄືບັນຍາກາດເໝືອນດັ່ງໄດ້ຮ່ວມເຄື່ອນໄຫວຊີວິດຕົວຈິງຢູ່ໃນເຫດການປະຫວັດສາດເຫລົ່ານັ້ນ.
ປັດຈຸບັນ, ກອງທັບປະຊາຊົນລາວ ໄດ້ເປັນກຳລັງຫລັກແຫລ່ງ ເຮັດໜ້າທີ່ປົກປັກຮັກສາເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດໄວ້ໃຫ້ໝັ້ນຄົງ,ຮັບປະກັນສະຖຽນ ລະພາບທາງການເມືອງ, ຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພທາງສັງຄົມ, ປົກປັກຮັກສາລະບອບປະຊາທິປະໄຕປະຊາຊົນ, ປະຊາຊົນບັນດາເຜົ່າ ແລະ ວັດທະນະທຳອັນດີງາມຂອງຊາດ, ກອງທັບປະຊາຊົນລາວ ໄດ້ເຕີບໃຫຍ່ຂະຫຍາຍຕົວຂຶ້ນເປັນກ້າວໆ ທັງດ້ານກໍາລັງ ແລະ ການປະກອບຢູ່ໃນທົ່ວກໍາລັງຫລວງ-ກໍາລັງທ້ອງຖິ່ນ ແລະ ບັນດາເຫລົ່າຮົບ ກໍໄດ້ຮັບການສ້າງຕັ້ງຂຶ້ນເປັນແຕ່ລະໄລຍະ, ດ້ວຍເຫດນັ້ນ, ທາດແທ້, ມູນເຊື້ອທີ່ກ້າແກ່ນສະຫງ່າງາມ ແລະ ຜົນງານ, ໄຊຊະນະອັນໃຫ່ຍຫລວງ ແລະ ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ນັບແຕ່ມື້ກຳເນີດຈົນເຖິງປັດຈຸບັນ ຖືກບັນທຶກໄວ້ໃນຫໍພິພິທະພັນປະຫວັດສາດກອງ ທັບແຫ່ງນີ້ ເພື່ອໃຫ້ອະນຸຊົນຄົນຮຸ່ນຫລັງໄດ້ສຶກສາຮຽນຮູ້ ແລະ ສືບທອດພາລະກຳອັນເລີດລ້ຳສືບຕໍ່ໄປ.
ຫໍພິພິທະພັນປະຫວັດສາດກອງທັບປະຊາຊົນລາວ ໄດ້ເປີດບໍລິການໃຫ້ແຂກຄົນທັງພາຍໃນ ແລະ ຕ່າງປະເທດຫຼາຍແສນຄົນເຂົ້າມາຢ້ຽມຊົມ ແຕ່ປີ 2006-2017 ເປັນຕົ້ນມາ, ໃນປີ 2018 ເນື່ອງຈາກຫລັງຄາຂອງຫໍພິພິທະພັນດັ່ງກ່າວ ເລີ່ມຮົ່ວຊຶມເຮັດໃຫ້ເພດານເສຍຫາຍ ແລະ ວັດຖຸວາງສະແດງກໍມີການປຽກຊຶມດ້ວຍອາຍນໍ້າໃນລະດູຝົນການບໍລິການໃຫ້ແຂກເຂົ້າຊົມກໍບໍ່ສາມາດດໍາເນີນໄດ້., ຈົນຮອດປີ 2019 ໄດ້ເລີ່ມປັບປຸງຫລັງຄາ ແລະ ອາຄານຕຶກວາງສະແດງຄືນ ໂດຍການຊ່ວຍເຫລືອດ້ານທຶນຮອນຈາກ ກະຊວງປ້ອງກັນປະເທດ ສສ ຫວຽດນາມ ເຊິ່ງການກໍ່ສ້າງ ແລະ ປັບປຸງຫໍພິພິທະພັນຄັ້ງນີ້ ແບ່ງເປັນ 3 ໄລຍະລວມມູນຄ່າທັງໝົດ 4.631.755 ໂດລາສະຫະລັດ, ມາຮອດປັດຈຸບັນການກໍ່ສ້າງປັບປຸງຫໍພິພິທະພັນປະຫວັດສາດກອງທັບປະຊາຊົນລາວໄດ້ສຳເລັດ ແລະ ເປີດນໍາໃຊ້ຄືນຢ່າງເປັນທາງການ.
