ຄົນຮ້າຍລັກຕັດສາຍໄຟແຮງສູງຖືກດໍາເນີນຄະດີແລ້ວ

ທ້າວ ສົມ​ຊາຍ ອາຍຸ 40 ປີພັກເຊົາຢູ່ບ້ານໂນນຄໍ້ເມືອງໄຊເສດຖານະຄອນຫລວງວຽງຈັນ ແລະ ໃນວັນທີ 14 ກັນຍາຜ່ານມານີ້, ຜູ້ກ່ຽວໄດ້ໄປລັກ​ຕັດ​ສາຍ​ໄຟຟ້າແຮງສູງ​ຢູ່​ສະຖານີໄຟຟ້າ​ເດີ່ນ​ທາດຫລວງແລ້ວຖືກໄຟຊ໋ອດຈົນໄດ້ຮັບບາດເຈັບສາຫັດ ແລະ ໜ່ວຍກູ້ໄພໄດ້ສົ່ງໄປຮັກສາຢູ່ໂຮງໝໍຈົນຫາຍດີ ແລະ ປັດຈຸບັນເຈົ້າໜ້າທີ່ໄດ້ຈັບ ຕົວໄປດໍາເນີນຄະດີຕາມລະບຽບກົດໝາຍແລ້ວ.

ຜ່ານການສືບສວນ-ສວບສວນຂອງເຈົ້າໜ້າ​ທີ່ຜູ້ກ່ຽວຮັບສາລະພາບວ່າ: ກ່ອນມື້ເກີດເຫດສອງວັນຕົນໄດ້ໄປລັກຕັດເອົາສາຍໄຟຢູ່ຈຸດດັ່ງກ່າວ ແລະ ໄດ້ສາຍໄຟຍາວປະມານ 5 ແມັດຈໍານວນ 4 ເສັ້ນແລ້ວເອົາໄປຂາຍໃຫ້ຮ້ານຮັບຊື້ເຫລັກເສດເຂດບ້ານໂນນຫວາຍໄດ້ເງິນມາ 120.000 ກີບ ແລະ ຕົກມາຮອດທ່ຽງຄືນຂອງວັນທີ 14 ກັນຍາ, ຕົນກໍໄດ້ໄປລັກຕັດສາຍໄຟຢູ່ຈຸດເກົ່າອີກ ແລະ ໃນ​ຂະນະໃຊ້ຄີມຕັດສາຍໄຟຢູ່ນັ້ນ, ປາກົດວ່າ​ເກີດ​ໄຟຊ໋ອດ​ແຕກຢ່າງແຮງ ແລະ ກະແສໄຟໄດ້​ລວກທົ່ວ​ຕົນ​ຕົວ​ດ້ວຍຄວາມ​ເຈັບ​ປວດ ແລະ ​​ໜ່ວຍ​ກູ້​ໄພໄດ້ນໍາສົ່ງມາຮັກສາຕົວ​ຢູ່ໂຮງໝໍ ແລະ ຕົກມາຮອດ​ວັນ​ທີ 19 ກັນຍາ ກໍຖືກ​ເຈົ້າໜ້າ​ທີ່ຈັບ​ຕົວ​ມາ​ດຳ​ເນີນ​ຄະດີຕາມລະບຽບກົດໝາຍ.