ສປປ ລາວ ແລະ ສ.ບົດສະວານາ ລົງນາມສັນຍາວ່າດ້ວຍ ການສ້າງຕັ້ງສາຍພົວພັນການທູດ

ເພື່ອເປັນການເສີມຂະຫຍາຍ ສາຍພົວພັນການທູດ ກັບບັນດາປະເທດເພື່ອນມິດໃນທົ່ວໂລກ ພ້ອມທັງເປັນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືສອງຝ່າຍ ລະຫວ່າງ ສາທາ ລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ບົດສະວານາ, ໃນວັນທີ 11 ທັນ ວາ 2023 ທີ່ ນະຄອນ ນິວຢອກ, ສະຫະລັດ ອາເມລິກາ, ໄດ້ມີພິທີຮ່ວມລົງນາມໃນຖະແຫລງການຮ່ວມ ວ່າດ້ວຍການສ້າງຕັ້ງສາຍພົວພັນການທູດ ລະຫວ່າງສອງປະເທດ, ຕາງໜ້າໃຫ້ລັດຖະບານ ແຫ່ງ ສາທາ ລະນະລັດ ປະຊາທິປະໄຕ ປະຊາຊົນລາວ ໂດຍແມ່ນທ່ານ ອານຸພາບ ວົງໜໍ່ແກ້ວ ເອກອັກຄະລັດຖະທູດວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອົງການ ສະຫະປະຊາຊາດ ແລະ ຕາງໜ້າໃຫ້ ລັດຖະບານ ແຫ່ງ ສາທາລະນະລັດ ບົດສະວານາ ໂດຍແມ່ນທ່ານ ດຣ. ເລໂມກັງ ເຄວາເປ (H.E. Dr. Lemogang Kwape) ລັດຖະມົນຕີກະຊວງການຕ່າງປະເທດ ແຫ່ງ ສາທານາລະນະ ບົດສະວານາ ໂດຍການເຂົ້າຮ່ວມເປັນສັກຂີພິຍານ ຂອງບັນດານັກການທູດ ຂອງທັງສອງຝ່າຍ.

ສາທາລະນະລັດ ບົດສະວານາ ຕັ້ງຢູ່ທາງໃຕ້ຂອງທະວີບ ອາຟຣິກາ, ມີຊາຍແດນຕິດກັບ 4 ປະເທດ ຄື: ສ ອາຝຣິກກາໃຕ້, ນາມີບີ, ຊິມບັບເວ ແລະ ຊຳບີ, ມີເນື້ອທີ່ທັງໝົດ 581.730 km2 ເຊິ່ງ 70% ຂອງເນື້ອທີ່ແມ່ນເປັນທະເລຊາຍ, ປະກອບດ້ວຍ 17 ແຂວງ; ມີນະຄອນຫລວງຊື່ວ່າ ກາໂບໂລນີ ແລະ ມີປະຊາກອນ ປະມານ 2.7 ລ້ານ ຄົນ(ປີ 2023). ປະຊາຊົນ ບົດສະວານາ ນໍາໃຊ້ພາສາອັງກິດ ແລະ ສະວານາ ເປັນພາສາທາງການ. ປະຊາຊົນ ຫລາຍກວ່າ 70% ນັບຖືສາສະໜາ ຄຣິດສຕຽນ. ສ ບົດສະວານາ ໄດ້ຮັບເອກະລາດຈາກ ອັງກິດ ໃນວັນທີ 30 ກັນຍາ 1966, ແຕ່ຍັງຢູ່ໃນກຸ່ມປະເທດເຄືອຈັກກະພົບ. ສ ບົດສະວາ ມີການປົກຄອງລະບອບປະຊາທິປະໄຕ ໂດຍມີ ປະທານາທິບໍດີ ທັງເປັນປະ ມຸກລັດ ແລະ ຫົວໜ້າລັດຖະບານ. ບົດສະວານາ ເປັນປະເທດທີ່ອຸດົມສົມບູນດ້ວຍຊັບພະຍາກອນທຳ ມະຊາດ, ພື້ນຖານເສດຖະກິດສ່ວນໃຫຍ່ ແມ່ນອີງໃສ່ການກະສິກຳ ແລະ ແຮ່ທາດ, ມີການຜະລິດ ແລະ ສົ່ງອອກ ແຮ່ທອງ, ຖ່ານຫີນ, ຄໍາ, ເງິນ, ແກ້ວປະເສີດ ແລະ ຫີນກຣານິດ ເຊິ່ງກາຍເປັນພື້ນຖານໃຫ້ແກ່ການພັດທະນາເສດຖະກິດຂອງປະເທດ. ນອກນັ້ນ, ຍັງມີແຫລ່ງທ່ອງທ່ຽວທາງທຳມະຊາດ ທີ່ສຳຄັນຫລາຍແຫ່ງ ແລະ ໄດ້ຮັບການຈົດທະບຽນເປັນມໍລະດົກໂລກ ໂດຍອົງການ UNESCO.

ສ ບົດສະວານາ ເຂົ້າເປັນສະມາຊິກຂອງ ອົງການ ສປຊ ໃນວັນທີ 17 ຕຸລາ 1966 ແລະ ຜ່ານມາໄດ້ເຄື່ອນໄຫວຢ່າງຫ້າວຫັນ ເປັນຕົ້ນ ໄດ້ປະກອບສ່ວນເຂົ້າໃນກອງກຳລັງຮັກສາສັນຕິພາບຂອງ ສປຊ, ເຄີຍໄດ້ຮັບເລືອກຕັ້ງເປັນສະມາຊິກບໍ່ຖາວອນ ຂອງ ສະພາຄວາມໝັ້ນຄົງ ສປຊ ໃນສົກປີ 1995-1996, ເປັນສະມາຊິກ ສະພາເສດຖະກິດ-ສັງຄົມ ສປຊ 04 ຄັ້ງ ໃນສົກປີ 1983-1985, 1991-1993, 2014-2016 ແລະ 2020-2022 ແລະ ເປັນສະມາຊິກສະພາສິດທິມະນຸດ ໃນປີ 2011-2017. ໃນບໍ່ດົນຜ່ານມານີ້, ສ ບົດສະວານາ ຫາກໍສຳເລັດການເປັນປະທານ ສະພາເສດຖະກິດ ແລະ ສັງຄົມ ສປຊ ສົກປີ 2021-2022. ໃນເວທີ ສປຊ, ສປປ ລາວ ແລະ ບົດສະວານາ ໄດ້ມີການພົວພັນ ແລະ ຮ່ວມມືອັນດີ ໃນຖານະເປັນສະມາຊິກກຸ່ມຕ່າງໆຮ່ວມກັນ ເຊັ່ນ: ກຸ່ມປະເທດກຳລັງພັດທະນາ ທີ່ບໍ່ມີຊາຍແດນຕິດກັບທະເລ (LLDCs), ກຸ່ມ 77 ແລະ ຈີນ, ຂະບວນການບໍ່ຮ່ວມກຸ່ມ (NAM) ແລະ ອື່ນໆ.

ໃນໂອກາດນີ້, ທັງສອງຝ່າຍ ຍັງໄດ້ຢືນຢັນຄືນເພື່ອສືບຕໍ່ຄວາມພະຍາຍາມຮ່ວມກັນ ໃນການເສີມຂະຫຍາຍການພົວພັນ ແລະ ຮ່ວມມືໃນດ້ານຕ່າງໆໃນຕໍ່ຫນ້າ, ລວມທັງ ການສະໜັບສະໜູນ ເຊິ່ງກັນ ແລະ ກັນ ໃນເວທີສາກົນ. ປັດຈຸບັນ, ສປປ ລາວ ພວມສືບຕໍ່ເຮັດໜ້າທີ່ເປັນສະມາຊິກ ສະພາເສດຖະ ກິດ-ສັງຄົມ ສປຊ (ECOSOC) ສໍາລັບສົກປີ 2023-2025 ແລະ ຈະເລີ່ມຕົ້ນປະຕິບັດຫນ້າທີ່ເປັນປະທານອາຊຽນ ໃນປີ 2024. ການສ້າງຕັ້ງສາຍພົວພັນການທູດຮ່ວມກັບປະເທດ ບົດສະວານາ ໃນຄັ້ງນີ້ ເປັນການສືບຕໍ່ປະກອບສ່ວນໃຫ້ແກ່ ການຈັດຕັ້ງປະຕິບັດແນວທາງການຕ່າງປະເທດ “ສັນຕິພາບ, ເອກະ ລາດ, ມິດຕະພາບ ແລະ ການຮ່ວມມື” ອັນສະເໝີຕົ້ນສະເໝີປາຍຂອງ ສປປ ລາວ ແລະ ເຮັດໃຫ້ ສາທາ ລະນະລັດ ປະຊາທິປະໄຕ ປະຊາຊົນລາວ ມີສາຍພົວພັນການທູດ ກັບ 149 ປະເທດ ໃນທົ່ວໂລກ.