ອິນທະສອນ ຊະນະ ກອງທັບ 3-2 ເຊັດ ສ້າງປະຫວັດສາດ ຄອງແຊ໋ມບານສົ່ງ ເບຍລາວ ແຊ໋ມປ້ຽນຊິບ 2023
ສະໂມສອນ ອິນທະສອນ ວີຊີ ປົດລ໋ອກສ້າງປະຫວັດສາດໃຫ້ສະໂມສອນໄດ້ແລ້ວ ຫຼັງຈາກໃຊ້ຄວາມພະຍາຍາມມາຫຼາຍປີໃນການໄລ່ລ່າແຊ໋ມບານສົ່ງລະດັບຊາດ ຊຶ່ງປີນີ້ສາມາດແຈ້ງເກີດດ້ວຍການລົ້ມທີມຍັກໃຫຍ່ແຫ່ງວົງການກິລາບານສົ່ງລາວ ຢ່າງສະໂມສອນ ກອງທັບ ໄປແບບສຸດມັນ 3-2 ເຊັດ ຄອງແຊ໋ມການແຂ່ງຂັນບານສົ່ງໃນຮົ່ມ ປະເພດຊາຍ ລາຍການ Beerlao Volleyball Championship 2023 ພ້ອມເງິນລາງວັນ 25 ລ້ານກີບໄປຄອງ. ຂະນະທີ່ ສາວກົມໃຫຍ່ການເມືອງກອງທັບ ກໍສາມາດແຈ້ງເກີດຄອງແຊ໋ມລາຍການດັ່ງກ່າວໄດ້ເຊັ່ນກັນ.
ພິທີປິດການແຂ່ງຂັນບານສົ່ງໃນຮົ່ມ ປະເພດຊາຍ-ຍິງ ລາຍການ Beerlao Volleyball Championship 2023 ໄດ້ຈັດຂຶ້ນ ເມື່ອວັນທີ 10 ທັນວາ ຜ່ານມາ ພາຍຫຼັງໄດ້ດໍາເນີນການແຂ່ງຂັນກັນມາແຕ່ວັນທີ 4 ພະຈິກ 2023 ທີ່ສະໂມສອນບານສົ່ງໃນຮົ່ມກອງທັບ (ຫຼັກ5) ບ້ານຈອມມະນີໃຕ້ ເມືອງໄຊເຊດຖາ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ, ເລຂາທິການຄະນະກຳມະການໂອແລມປິກແຫ່ງຊາດລາວ ແລະ ທ່ານ ຈັນສະໝອນ ຜອງຈັນທາ ປະທານສະຫະພັນບານສົ່ງແຫ່ງຊາດລາວ, ມີບັນດາຄະນະນຳແຕ່ລະສະໂມສອນ, ຄູຝຶກ ແລະ ນັກກິລາ ຕະຫຼອດຮອດກອງເຊຍ ແລະ ສື່ມວນຊົນເຂົ້າຮ່ວມຢ່າງຄຶກຄື້ນ.
ລາຍການດັ່ງກ່າວ, ໄດ້ຮັບການສະໜັບສະໜູນຫຼັກຈາກບໍລິສັດ ເບຍລາວ ຈໍາກັດ ໃນມູນຄ່າ 350 ລ້ານກີບ ປີນີ້ມີທີມເຂົ້າຮ່ວມທັງໝັດ 14 ສະໂມສອນ ໃນນັ້ນ ຍິງ 6 ທີມ ແລະ ຊາຍ 8 ທີມ ແຂ່ງຂັນລະບົບແບບລີກ ມີພຽງຮອບຂາໄປ ທີມທີ່ມີຄະແນນດີທີ່ສຸດໄດ້ແຊ໋ມໄປຄອງ. ສຳລັບທີມແຊ໋ມ ປະເພດຊາຍ ປີ 2023 ຊະນະເລີດເປັນຂອງສະໂມສອນ ອິນທະສອນ ວີຊີ ພາຍຫຼັງເອົາຊະນະ ສະໂມສອນ ກອງທັບ ໄປໃນນັດຊີງຊະນະເລີດ 3-2 ເຊັດ ດ້ວຍຄະແນນ 19-25, 25-22, 25-9, 20-25 ແລະ 15-13 ຄະແນນ ເຮັດໃຫ້ສະໂມສອນ ກອງທັບ ໄດ້ພຽງອັນດັບທີ 2. ສ່ວນອັນດັບທີ 3 ແມ່ນສະໂມສອນ ລາວສະກາຍເວ ວີຊີ, ອັນດັບທີ 4 ສະໂມສອນ ໂກຣ-ອັບ ວີຊີ ຫຼື Grow-up, ອັນດັບທີ 5 ວິທະຍາຄານ ສັນຕິບານ ປະຊາຊົນ ກະຊວງປ້ອງກັນຄວາມສະຫງົບ, ອັນດັບທີ 6 ສະໂມສອນ ວຽງຈັນ ວີຊີ, ອັນດັບທີ 7 ສະໂມສອນ ມາສະເຕີ 7 ວີຊີ, ອັນດັບທີ 8 ສະໂມສອນ ອິນເທັນເຊີນ. ສ່ວນທີມແຊ໋ມ ປະເພດຍິງ ປີ 2023 ຊະນະເລີດ ແມ່ນສະໂມສອນ ກົມໃຫຍ່ການເມືອງກອງທັບ, ອັນດັບທີ 2 ສະໂມສອນ ກອງທັບ, ອັນດັບທີ 3 ສະໂມສອນ ວຽງຈັນ ວີຊີ, ອັນດັບທີ 4 ສະໂມສອນ ອິນທະສອນ ວີຊີ, ອັນດັບທີ 5 ສະໂມສອນ ມາສະເຕີ 7 ເອັບຊີ ແລະ ອັນດັບທີ 6 ສະມໂສອນ ເອັດອີຊີ ວິຊີ.
ສະເພາະລາງວັນ ປະເພດຊາຍ ຊະນະເລີດ ແມ່ນໄດ້ຮັບຂັນ 1 ໜ່ວຍ ແລະ ເງິນສົດ 25.000.000 ກີບ, ອັນດັບທີ 2 ໄດ້ຮັບເງິນສົດ 15.000.000 ກີບ, ອັນດັບທີ 3 ໄດ້ຮັບເງິນສົດ 10.000.000 ກີບ, ອັນດັບທີ 4 ໄດ້ຮັບເງິນສົດ 7.000.000 ກີບ, ອັນດັບທີ 5 ໄດ້ຮັບເງິນສົດ 6.000.000 ກີບ, ອັນດັບທີ 6 ໄດ້ຮັບເງິນສົດ 5.000.000 ກີບ, ອັນດັບທີ 7 ໄດ້ຮັບເງິນສົດ 4.000.000 ກີບ ແລະ ອັນດັບທີ 8 ໄດ້ຮັບເງິນສົດ 3.000.000 ກີບ. ນອກຈາກນີ້, ຍັງມີລາງວັນສໍາລັບບຸກຄົນ ແລະ ທີມດີເດັ່ນອີກດ້ວຍ.
ຂະນະທີ່ລາງວັນ ປະເພດຍິງ ຊະນະເລີດ ແມ່ນໄດ້ຮັບຂັນ 1 ໜ່ວຍ ແລະ ເງິນສົດ 15.000.000 ກີບ, ອັນດັບທີ 2 ໄດ້ຮັບເງິນສົດ 10.000.000 ກີບ, ອັນດັບທີ 3 ໄດ້ຮັບເງິນສົດ 7.000.000 ກີບ, ອັນດັບທີ 4 ໄດ້ຮັບເງິນສົດ 6.000.000 ກີບ, ອັນດັບທີ 5 ໄດ້ຮັບເງິນສົດ 4.000.000 ກີບ ແລະ ອັນດັບທີ 6 ໄດ້ຮັບເງິນສົດ 3.000.000 ກີບ. ນອກຈາກນີ້, ຍັງມີລາງວັນສຳລັບບຸກຄົນ ແລະ ທີມດີເດັ່ນເຊັ່ນກັນ.
ນອກຈາກລາງວັນດັ່ງກ່າວແລ້ວ ຍັງມີລາງວັນບຸກຄົນດີເດັ່ນອີກ ໂດຍສະເພາະລາງວັນນັກເສີບບານດີເດັ່ນຍິງ ແມ່ນເປັນຂອງນາງ ດອນລ້າ ສາຍອຳນາດ ຈາກສະໂມສອນ ກອງທັບ, ລາງວັນນັກເສີບບານດີເດັ່ນຊາຍ ທ້າວ ບຸນນຳ ຈາກສະໂມສອນ Grow-up ວີຊີ, ລາງວັນບ໋ອກດີເດັ່ນຍິງ ນາງ ມີສະດາ ບົວລະພາ ຈາກສະໂມສອນ ກອງທັບ, ລາງວັນບ໋ອກດີເດັ່ນຊາຍ ທ້າວ ຄຳປ່ຽນ ສັນຍາຮັກ ຈາກສະໂມສອນ ກອງທັບ, ລາງວັນດີເດັ່ນບານໄວຍິງ ນາງ ລຳພອນ ຫຼວງອະໄພ ຈາກສະໂມສອນກົມໃຫຍ່ການເມືອງ, ລາງວັນດີເດັ່ນບານໄວຊາຍ ທ້າວ ວິທອງ ພົມວິຈິດ ຈາກສະໂມສອນ ກອງທັບ, ລາງວັນດີເດັ່ນບານ 3 ຫຼັງຍິງ ນາງ ລຳພັນ ຫຼວງອະໄພ ຈາກສະໂມສອນກົມໃຫຍ່ການເມືອງ, ລາງວັນດີເດັ່ນບານ 3 ຫຼັງຊາຍ ທ້າວ ຈັນເພັງ ປັນຍາສີລິ ຈາກສະໂມສອນ ອິນທະສອນ, ລາງວັນບານຫົວເສົາດີເດັ່ນຍິງ ນາງ ສຸນິຕາ ຈາກສະໂມສອນ ກອງທັບ, ລາງວັນບານຫົວເສົາດີເດັ່ນຊາຍ ທ້າວ ທະນົງລິດ ໄຊຊະນະ ຈາກສະໂມສອນ ກອງທັບ, ລາງວັນມືຍົກຍິງ ນາງ ກຸ່ງກິ່ງ ພົມມີໄຊ ຈາກສະໂມສອນ ກອງທັບ, ລາງວັນມືຍົກຊາຍ ທ້າວ ຄຳທະລັກ ອຸນາພົນ ຈາກສະໂມສອນ ອິນທະສອນ, ລາງວັນລິເບີໂຣ ຍິງ ນາງ ທອນນາລີ ລັດຕະນະ ຈາກສະໂມສອນ ວຽງຈັນ ວີຊີ, ລາງວັນລິເບີໂຣຊາຍ ທ້າວ ອາດິສັກ ໄຊຍະວົງ ຈາກສະໂມສອນ ອິນທະສອນ, ລາງວັນຮັບບານດີເດັ່ນຍິງ ນາງ ກາບແກ້ວ ອິນທິລາດ ຈາກສະໂສອນ ອິນທະສອນ, ລາງວັນຮັບບານດີເດັ່ນຊາຍ ທ້າວ ສອນປະເສີດ ເຜີຍບຸດດາ ຈາກສະໂມສອນ ອິນທະສອນ ວີຊີ, ລາງວັນນັກກິລາຊົງຄຸນຄ່າຍິງ ນາງ ປານີ ນັນທະວົງ ຈາກສະໂມສອນກົມໃຫຍ່ການເມືອງກອງທັບ ແລະ ລາງວັນນັກກິລາຊົງຄຸນຄ່າຊາຍ ທ້າວ ຄຳທະລັກ ອຸນາພົນ ຈາກສະໂມສອນ ອິນທະສອນ ວີຊີ.
ຂ່າວ: ໜັງສືພິມສຶກສາ-ກິລາລາຍວັນ
