3 ປີຜ່ານມາ ປກສ ແຂວງ ສະຫວັນນະເຂດ ແກ້ໄຂຄະດີຢາເສບຕິດໄດ້ຫລາຍລາຍການ ແລະ ກັກຕົວຜູ້ຖືກຫາໄດ້ 1.545 ຄົນ

ວັນທີ 11 ທັນວາ 2023, ພົຈວ ສົມໝາຍ ພົມມະຈັນ ຫົວໜ້າກອງບັນຊາການ ປກສ ແຂວງ ສະຫວັນນະເຂດ ໃຫ້ສໍາພາດຕໍ່ນັກຂ່າວກົມສື່ມວນຊົນ ປກສ ວ່າ: 3 ປີຜ່ານມາ (2021-2023) ໄດ້ສຸມໃສ່ຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢ່າງຕັ້ງໜ້າ ເປັນຕົ້ນແມ່ນແນ່ໃສ່ 3 ຫລັກການ ແລະ 6 ວຽກຈຸດສຸມໃນວາລະແຫ່ງຊາດ, ເຊິ່ງສາມາດຂຶ້ນບັນຊີເປົ້າໝາຍຄ້າຂາຍຢາເສບຕິດໄດ້ຫຼາຍກວ່າ 2.780 ຄົນ, ເປົ້າໝາຍເສບ 1.700ກວ່າຄົນ, ແກ້ໄຂຄະດີຢາເສບຕິດ 1.000 ກວ່າເລື່ອງ, ກັກຕົວຜູ້ຖືກຫາ 1.540 ກວ່າຄົນ, ຢຶດຂອງກາງຢາເສບຕິດປະເພດປະເພດຕ່າງໆລວມມີ ຢາບ້າ, ຢາອີ, ຢາເຄ, ຢາໄອ໌, ເຮໂຣອິນ, ກັນຊາແຫ້ງ, ໃບກະທ່ອມ, ກາເຟປະສົມສານເສບຕິດ, ບັ້ງອັດແກັດສານໄນຕັສ, ປຸ່ມເປົ້າອັດແກັດສານໄນຕັສ, ນໍ້າກະທ້ອມ, ຢາສູບໄຟຟ້າ, ອາວຸດເສິກ 32 ກະບອກ, ອາວຸດລ່າເນື້ອ 40 ກະບອກ ພ້ອມດ້ວຍເຄື່ອງຂອງກາງທີ່ພົວພັນກັບຄະດີຢາເສບຕິດອີກຈໍານວນຫລາຍລາຍການ.

ຕໍ່ໜ້ານີ້ ປກສ ແຂວງສະຫວັນນະເຂດ ຈະສືບຕໍ່ປັບປຸງລະບົບການຈັດຕັ້ງຂັ້ນນໍາພາ-ບັນຊາ ແຕ່ລະຂັ້ນຂອງກໍາລັງ ປກສ ແຂວງ ໃຫ້ມີຄວາມໜັກແໜ້ນທາງໃນທຸກດ້ານ, ສຸມໃສ່ແກ້ໄຂເປົ້າໝາຍຄ້າຂາຍ, ເປົ້າໝາຍເສບ ແລະ ສະຖານທີ່ມົ້ວສຸມຕ່າງໆຢ່າງເດັດຂາດ, ປະສານສົມທົບກັບຄະນະປະສານງານປະຈໍາພື້ນທີ່ ເພື່ອສະກັດກັ້ນ ແລະ ແກ້ໄຂບັນຫາຢາເສບຕິດ ຕາມຊາຍແດນລາວ-ໄທ ແລະ ຫ້ອງການປະສານງານ ປກສ ບ້ານ ລຽບຕາມຊາຍແດນລາວ-ຫວຽດນາມ, ສະເພາະດ່ານສາກົນຂົວມິດຕະພາບລາວ-ໄທ 2 ແລະ ດ່ານສາກົນແດນສະຫວັນ-ລາວບາວ ດ້ວຍການສຸມໃສ່ກວດກາຄົນ ແລະ ພາຫະນະເຂົ້າ-ອອກ ຢ່າງເຄັງຄັດ ແນໃສ່ສະກັດກັ້ນບໍ່ໃຫ້ມີການລັກລອບຂົນສົ່ງຢາເສບຕິດເຂົ້າມາ ສປປ ລາວຢ່າງເດັດຂາດ.