ຫອມມໍລະນະ! ຢາສູບໄຟຟ້າ ລະເຫີຍອາຍໜ້ອຍກວ່າຢາສູບແບບຊອງ ແຕ່ເຂົ້າປອດເລິກກວ່າ ສ່ຽງເປັນຫລາຍພະຍາດ

ສຳນັກຂ່າວອຳມະຣິນໄທ ລາຍງານ ວັນທີ 10 ທັນວາ 2023 ວ່າ: ດຣ ທີລະ ວັດທະນາຣັດ ຄະນະແພດສາດ ມະຫາວິທະຍາໄລຈຸລາລົງກອນ ເປີດເຜີຍວ່າ: ຢາສູບໄຟຟ້າອັນຕະລາຍ ເຖິງຈະບໍ່ມີຄວັນ ເພາະມີສານເຄມີອື່ນອີກຫລາຍຊະນິດທີ່ອັນຕະລາຍຕໍ່ສຸຂະພາບ,

ເຊິ່ງນ້ຳຢາໃນຢາສູບໄຟຟ້າປະກອບດ້ວຍ: ສານນີໂຄຕິນ ເຮັດໃຫ້ເສບຕິດການສູບ, ໂພຣພິລິນໄກລກໍ ເຮັດໃຫ້ລະເຄືອງຕາ, ມີບັນຫາທາງເດີນຫາຍໃຈ ເຮັດໃຫ້ມີອາການໄອ, ເຈັບຫົວ, ປວດຮາກ; ສານ ກີເຊີລິນ ເມື່ອປະສົມກັບໂພຣພິລິນໄກດໍ ຍິ່ງເຮັດໃຫ້ໄອ, ຫລອດເລືອດຕີບ, ຫອບເມື່ອຍ; ສານປະກອບອັນຕະລາຍເຊັ່ນ ສານໜູ, ໂລຫະໜັກ, ຟໍມັນດີໄຮ, ເບນີນ, ເຊິ່ງອາດກໍ່ມະເຮັງ;ສານປຸງແຕ່ງກິ່ນ, ລົດຊາດ ແລະ ອື່ນໆ ບາງຕົວອາດເຮັດໃຫ້ປອດອັກເສບຮຸນແຮງ.

ສານລະເຫີຍຈາກຢາສູບໄຟຟ້າມີຂະໜາດນ້ອຍກວ່າຢາສູບທຳມະດາ ຈຶ່ງເຂົ້າໄປໃນປອດເລິກກວ່າ, ຈັບເນື້ອເຍື່ອປອດ ແລະ ດູດຊຶມເຂົ້າໃນກະແສເລືອດໄດ້ໄວ ຍາກທີ່ຮ່າງການຈະຂັບຖ່າຍອອກມາໄດ້ໝົດ.

ການສູບຢາສູບໄຟຟ້າ ເຮັດໃຫ້ສ່ຽງຕໍ່ການເກີດ ພະຍາດຫົວໃຈ ແລະ ຫລອດເລືອດ, ມະເຮັງ ແລະ ສົ່ງຜົນຕໍ່ການພັດທະນາສະໝອງ

ປັດຈຸບັນ ມີຢາສູບໄຟຟ້າເຂົ້າມາໃນສັງຄົມ ເດັກນ້ອຍໃນໂຮງຮຽນຕົກເປັນເຫຍື່ອໄດ້ງ່າຍ ເພາະມີການຜະລິດອອກມາໃນຮູບແບບທີ່ໜ້າດຶງດູດໃຈ, ມີການປັບແຕ່ງກິ່ນນາໆຊະນິດ, ນອກຈາກນີ້ຍັງມີການປະສົມສານປະກອບອື່ນໆ ລວມເຖິງນ້ຳມັນກັນຊາ ຍິ່ງເຮັດໃຫ້ສ່ຽງຕໍ່ການເສບຕິດຫລາຍຂຶ້ນ ການຮັບມືໄພຢາສູບໄຟຟ້າຈຶ່ງຍາກຂຶ້ນເປັນທະວີຄູນ.