ລັດຖະບານປະເທດຝຣັ່ງ ປະກາດໃຫ້ທຶນ 550.000 ໂດລາ ສົ່ງເສີມວຽກງານໂພຊະນາການ ຢູ່ແຂວງສາລະວັນ
ອົງການອາຫານໂລກລາຍງານວັນທີ 5 ທັນວາ 2023 ນີ້ວ່າ: ສະຖານທູດຝຣັ່ງ ປະຈຳ ສປປ ລາວ ປະກາດທຶນງົບປະມານ 550.000 ໂດລາສະຫະລັດ ເພື່ອສະໜັບສະໜູນວຽກງານຮັບປະກັນການເຂົ້າເຖິງອາຫານໃຫ້ແກ່ປະຊາຊົນ 10.000 ກວ່າຄົນ ຫລື 1.818 ຄອບຄົວ ໃນແຂວງສາລະວັນ ພາຍໃຕ້ການຈັດຕັ້ງປະຕິບັດຜ່ານໂຄງການຂອງອົງການອາຫານໂລກ ປະຈຳ ສປປ ລາວ (WFP) ຮ່ວມກັບກະຊວງກະສິກຳ ແລະ ປ່າໄມ້ ແລະ ກະຊວງສາທາລະນະສຸກ.
ເພື່ອຕອບສະໜອງຄວາມຕ້ອງການດ້ານສະບຽງອາຫານ ແລະ ສາມາດນຳໄປລົງທຶນເຂົ້າໃນວຽກງານສົ່ງເສີມຊີວິດການເປັນຢູ່ ເຊັ່ນ: ການເຮັດສວນຄົວ ແລະ ການລ້ຽງສັດນ້ອຍ ເພື່ອເປັນອາຫານ ພະແນກກະສິກຳ ແລະ ປ່າໄມ້ເມືອງ ແມ່ນຈະສືບຕໍ່ໃຫ້ຄຳແນະນຳທາງດ້ານເຕັກນິກການປູກຝັງ ແລະ ການລ້ຽງສັດ, ຮຽນຮູ້ກ່ຽວກັບການປະຕິບັດດ້ານໂພຊະນາການ ແລະ ວິທີການກະກຽມ ແລະ ປັບຕົວໃຫ້ເຂົ້າກັບເຫດການທີ່ກ່ຽວຂ້ອງກັບການປ່ຽນແປງຂອງສະພາບດິນຟ້າອາກາດ ແລະ ເຫດການແບບກະທັນຫັນອື່ນໆ.
ສະໜອງການຊ່ວຍເຫຼືອແກ່ ແມ່ຍິງ ແລະ ເດັກນ້ອຍທີ່ມີຄວາມສ່ຽງ ແລະ ເດັກນ້ອຍທີ່ມີອາຍຸຕໍ່າກວ່າ 5 ປີ ເປັນຕົ້ນຕໍ ການຄັດເລືອກຊຸມຊົນ ແມ່ນອີງໃສ່ລະດັບຄວາມທຸກຍາກ ຄະແນນການບໍລິໂພກອາຫານ ອັດຕາການຮູ້ໜັງສືຕໍ່າ ແລະ ຈໍານວນໄພພິບັດທີ່ເກີດຂຶ້ນ.
ຈາກການປະເມີນເຫັນໄດ້ວ່າ ປະມານ 43 ສ່ວນຮ້ອຍ ຂອງເດັກອາຍຸຕໍ່າກວ່າ 5 ປີ ຢູ່ໃນແຂວງສາລະວັນ ມີພາວະຂາດສານອາຫານ, ການຈະເລີນເຕີບໂຕຊ້າ, ຄວາມສາມາດໃນການຮຽນຮູ້ບໍ່ເຕັມທີ່ ເຊິ່ງມີຜົນຕໍ່ປະສິດທິພາບການເຮັດວຽກ ແລະ ສຸຂະພາ, ອັດຕານ້ຳໜັກຕ່ຳເມື່ອທຽບກັບລວງສູງຂອງເດັກໃນກຸ່ມອາຍຸດຽວກັນ ແລະ ຄ່າສະເລ່ຍແຫ່ງຊາດ ເຊິ່ງລ້ວນແຕ່ກ່ຽວຂ້ອງກັບສະພາບແວດລ້ອມດິນຟ້າອາກາດ ເຊັ່ນ: ໄພນ້ຳຖ້ວມຕາມລະດູການ ໄພແຫ້ງແລ້ງ ໄດ້ສົ່ງຜົນກະທົບຕໍ່ປະຊາຊົນທີ່ອາໄສໃນພື້ນທີ່ທີ່ມີຄວາມສ່ຽງທີ່ສຸດໃນແຂວງ ນອກນີ້ ປະຊາຊົນໃນເຂດທຸກຍາກທີ່ສຸດຂອງແຂວງສາລາວັນ ກຳລັງປະສົບກັບຄວາມຫຍຸ້ງຍາກໃນການດຳລົງຊີວິດ ເປັນຜົນສະທ້ອນຈາກການວິກິດການດ້ານເສດຖະກິດມະຫາພາກໃນທົ່ວປະເທດ.
