ກອງປະຊຸມສຸດຍອດລັດຖະສະພາ CLV ຄັ້ງທີ 1 ຮັບຮອງເຫັນດີຮ່ວມມືໃນເຂດສາມຫລ່ຽມພັດທະນາ ໃຫ້ບັນລຸໄດ້ຜົນສໍາເລັດໃນຫລາຍດ້ານ

ກອງປະຊຸມສຸດຍອດລັດຖະສະພາ ກໍາປູເຈຍ-ລາວ-ຫວຽດນາມ (CLV) ຄັ້ງທີ I ດຳເນີນໄປໃນວັນທີ 5-6 ທັນວານີ້ ພາຍໃຕ້ຫົວຂໍ້: “ເພີ່ມທະວີບົດບາດຂອງລັດຖະສະພາໃນການສົ່ງເສີມການຮ່ວມມືຮອບດ້ານລະ ຫວ່າງ ກໍາປູເຈຍ-ລາວ-ຫວຽດນາມ”. ໄດ້ສໍາເລັດຕາມຈຸດປະສົງ ແລະ ລະດັບຄາດໝາຍ, ກອງປະຊຸມຄັ້ງນີ້ ຄະນະຜູ້ແທນ ຈາກ 3 ສະພາແຫ່ງຊາດ ໄດ້ພິຈາລະນາ ແລະ ເຫັນດີຮັບຮອງເອົາຮ່າງຖະແຫລງການຮ່ວມຂອງກອງປະຊຸມສຸດຍອດລັດຖະສະພາ (CLV) ຄັ້ງທີ I.

ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ກ່າວວ່າ: ກອງປະຊຸມສຸດຍອດລັດຖະສະພາ ກໍາປູເຈຍ-ລາວ-ຫວຽດນາມ (CLV) ຄັ້ງທີ I ພາຍໃຕ້ຫົວຂໍ້: “ເພີ່ມທະວີບົດບາດຂອງລັດຖະສະພາ ໃນການສົ່ງເສີມການຮ່ວມມືຮອບດ້ານ ລະຫວ່າງ ກໍາປູເຈຍ-ລາວ-ຫວຽດນາມ”, ໄດ້ຮ່ວມຄົ້ນຄວ້າ, ປຶກສາຫາລື ແລະ ແລກປ່ຽນຄໍາຄິດຄໍາເຫັນຢ່າງຫ້າວຫັນ ແລະ ກົງໄປກົງມາ ດ້ວຍຄວາມຮັບຜິດຊອບສູງ ເຮັດໃຫ້ກອງປະຊຸມສຸດຍອດລັດຖະສະພາ CLV ຄັ້ງທີ I ໄດ້ຮັບຜົນສໍາເລັດຕາມຈຸດປະສົງ ແລະ ລະດັບຄາດຫມາຍ; ປຶກສາຫາລື ແລະ ປະກອບຄໍາຄິດຄໍາເຫັນຮ່ວມກັນໃນແຕ່ລະຂົງເຂດ ໂດຍສະເພາະແມ່ນ ວຽກງານການເມືອງ-ການຕ່າງປະເທດ, ການຮ່ວມມືດ້ານເສດຖະກິດ ແລະ ວັດທະນະທໍາ-ສັງຄົມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ.

ກອງປະຊຸມໄດ້ຟັງລາຍງານຄວາມຄືບໜ້າ ໃນການຈັດຕັ້ງປະຕິບັດແຜນດໍາເນີນງານຕ່າງໆ ໃນເຂດສາມຫລ່ຽມພັດທະນາຈາກພາກສ່ວນກ່ຽວຂ້ອງຂອງລັດຖະບານ ເຊິ່ງເຫັນວ່າລັດຖະບານ ແລະ ຂະແໜງການກ່ຽວຂ້ອງ ຂອງ 3 ປະເທດ ໄດ້ຈັດຕັ້ງປະຕິບັດບັນດາສັນຍາ ແລະ ຂໍ້ຕົກລົງ ທີ່ໄດ້ຕົກລົງຮ່ວມກັນຕາມຂອບການຮ່ວມມືໃນເຂດສາມຫລ່ຽມພັດທະນາ ແລະ ບັນລຸໄດ້ຜົນສໍາເລັດໃນຫລາຍດ້ານ ໂດຍສະເພາະພື້ນຖານໂຄງລ່າງ ໃນເຂດສາມຫລ່ຽມພັດທະນາໄດ້ຮັບການປັບປຸງ-ຍົກລະດັບ ຊຶ່ງເປັນການສົ່ງເສີມ ແລະ ອໍານວຍຄວາມສະດວກໃຫ້ແກ່ການຄ້າ, ການລົງທຶນ ແລະ ການທ່ອງທ່ຽວຢູ່ເຂດສາມຫລ່ຽມພັດທະນາ ເຮັດໃຫ້ຊີວິດການເປັນຢູ່ຂອງປະຊາຊົນ ນັບມື້ໄດ້ຮັບການແກ້ໄຂດີຂຶ້ນເປັນກ້າວໆ.

ກອງປະຊຸມໄດ້ຮຽກຮ້ອງໃຫ້ສະມາຊິກສະພາແຫ່ງຊາດ ແຕ່ລະປະເທດ ຕ້ອງໄດ້ສົມທົບກັບພາກ ສ່ວນທີ່ກ່ຽວຂ້ອງຂອງລັດຖະບານຕົນ ຊອກຫາວິທີທາງແກ້ໄຂ ເຮັດໃຫ້ເຂດດັ່ງກ່າວໄດ້ຮັບການພັດ ທະນາໃຫ້ດີຂຶ້ນກວ່າເກົ່າ, ສາມສະພາແຫ່ງຊາດ ຂອງສາມປະເທດ ຕ້ອງສືບຕໍ່ຕິດຕາມກວດກາການຈັດ ຕັ້ງປະຕິບັນດາສັນຍາ ແລະ ໂຄງການຕ່າງໆ ທີ່ລັດຖະບານສາມປະເທດໄດ້ລົງນາມຮ່ວມກັນໃຫ້ມີປະ ສິດທິພາບ, ສ້າງເງື່ອນໄຂການເຊື່ອມໂຍງເຊື່ອມຈອດ, ສ້າງຄວາມຍືນຍົງ ແລະ ຄວາມ ຈະເລີນກ້າວໜ້າທາງດ້ານເສດຖະກິດ, ວັດທະນະທໍາ-ສັງຄົມ ໃນເຂດ CLV ໃຫ້ກາຍເປັນສ່ວນສໍາຄັນໜຶ່ງ ໃນການປະຕິບັດວິໄສທັດປະຊາຄົມອາຊຽນປີ 2025 ດ້ວຍການກໍານົດແນວທາງນະໂຍບາຍຂອງແຕ່ລະປະເທດ ຕໍ່ເຂດສາມຫລ່ຽມພັດທະນາໃຫ້ມີຄວາມແທດເໝາະ ແລະ ສອດຄ່ອງກົມກຽວກັນ.

ໃນກອງປະຊຸມ, ປະທານສະພາແຫ່ງຊາດ 3 ປະເທດໄດ້ລົງນາມ ເຊັນຖະແຫລງການຮ່ວມຂອງກອງປະຊຸມ ແລະ ມອບຄ້ອນການເປັນເຈົ້າພາບກອງປະຊຸມສຸດຍອດລັດຖະສະພາ CLV ຄັ້ງທີ 2 ໃຫ້ປະທານສະພາແຫ່ງຊາດ ສສ ຫວຽດນາມ ທີ່ຈະເປັນເຈົ້າພາບຈັດກອງປະຊຸມສຸດຍອດລັດຖະສະພາ CLV ຄັ້ງທີ 2 ໃນອີກ 2 ປີຂ້າງໜ້າ.