ຫວຽດນາມສົ່ງອອກເຂົ້າສູງເປັນປະຫວັດສາດໃນປີນີ້ ແຊງໄທເປັນເບີ 2 ຂອງໂລກ
ຂໍ້ມູນຈາກລັດຖະບານຫວຽດນາມລະບຸວ່າ: ຫວຽດນາມສາມາດຂາຍເຂົ້າໄດ້ແລ້ວ 7,8 ລ້ານໂຕນໃນປີນີ້ ແຊງໄທຂຶ້ນເປັນຜູ້ສົ່ງອອກເຂົ້າໝາຍເລກ 2 ຂອງໂລກ.
ວັນທີ 6 ທັນວາ, ກະຊວງກະສິກໍາຫວຽດນາມລາຍງານວ່າ: ມູນຄ່າການສົ່ງອອກເຂົ້າຂອງປະເທດລະຫວ່າງເດືອນມັງກອນ-ພະຈິກປີນີ້ ບັນລຸເກືອບ 7,8 ລ້ານໂຕນ ສ້າງລາຍໄດ້ເຂົ້າປະເທດປະມານ 4.400 ລ້ານໂດລາສະຫະລັດ ເປັນສະຖິຕິສູງທີ່ສຸດໃນດ້ານປະລິມານ ແລະ ມູນຄ່າ. ອີກທັງເຂົ້າໃກ້ເປົ້າໝາຍ ສົ່ງອອກເຂົ້າໃຫ້ໄດ້ 8 ລ້ານໂຕນໃນປີນີ້ ແຊງໄທເປັນຜູ້ສົ່ງອອກເຂົ້າລາຍໃຫຍ່ອັນດັບ 2 ຂອງໂລກ ສ່ວນອັນດັບ 1 ຍັງເປັນອິນເດຍ.
ຂະນະທີ່ສະມາຄົມອາຫານຫວຽດນາມລາຍງານ ລາຄາເຂົ້າຫັກ 5% ຂອງຫວຽດນາມ ມີລາຄາຂາຍ 663 ໂດລາສະຫະລັດຕໍ່ໂຕນ ໃນລາຄາຕະຫລາດໂລກວັນທີ 4 ທັນວາຜ່ານມາ ເປັນສະຖິຕິສູງທີ່ສຸດໃນຮອບ 10 ປີ, ສ່ວນລາຄາເຂົ້າຫັກ 5% ຂອງໄທ ມີລາຄາຂາຍໂຕນລະ 625 ໂດລາສະຫະລັດ.
ທັງນີ້, ປະເທດຜູ້ຊື້ເຂົ້າລາຍໃຫຍ່ຂອງຫວຽດນາມໄດ້ແກ່ ຟີລິບປິນ, ອິນໂດເນເຊຍ ແລະ ຈີນ.
