ຄະນະຜູ້ແທນຂັ້ນສູງ ສະພາແຫ່ງຊາດກຳປູເຈຍ ຢ້ຽມຢາມ ສປປ ລາວ ຢ່າງເປັນທາງການ

ໂດຍຕອບສະໜອງຕາມການເຊື້ອເຊີນ ຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສົມເດັດ ມະຫາ ຣັດສະເພຍທິກາ ທິພະໄດ ຄູນ ສຸດາຣີ ປະທານສະພາແຫ່ງຊາດ ແຫ່ງ ຣາຊະອານາຈັກກໍາປູເຈຍ ພ້ອມດ້ວຍຄະນະຜູ້ແທນຂັ້ນສູງ ຂອງສະພາແຫ່ງຊາດກໍາປູເຈຍ ໄດ້ຢ້ຽມຢາມສາທາລະນະລັດ ປະຊາທິປະ ໄຕ ປະຊາຊົນລາວ ຢ່າງເປັນທາງການ ໃນລະຫວ່າງວັນທີ 2-4 ທັນວາ 2023 ແລະ ສືບຕໍ່ເຂົ້າຮ່ວມກອງປະຊຸມ ສຸດຍອດລັດຖະສະພາກໍາປູເຈຍ-ລາວ-ຫວຽດນາມ (CLV) ຄັ້ງທີ 1 ເຊິ່ງຈະຈັດຂຶ້ນໃນລະຫວ່າງວັນທີ 4-7 ທັນວາ 2023.

ໃນຕອນເຊົ້າວັນທີ 3 ທັນວາ 2023, ສົມເດັດ ມະຫາ ຣັດສະເພຍທິກາ ທິພະໄດ ຄູນ ສຸດາຣີ ແລະ ຄະນະ ໄດ້ເຂົ້າຮ່ວມພິທີຕ້ອນຮັບຢ່າງເປັນທາງການ ແລະ ສົມກຽດ ຢູ່ຕໍ່ໜ້າຫໍສະພາແຫ່ງຊາດລາວ ໂດຍມີ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ພ້ອມດ້ວຍຄະນະ ເຂົ້າຮ່ວມໃນພິທີຕ້ອນຮັບໃນຄັ້ງນີ້. ພາຍຫລັງພິທີຕ້ອນຮັບຢ່າງເປັນທາງການ, ຄະນະຜູ້ແທນຂັ້ນສູງ ຂອງສະພາແຫ່ງຊາດລາວ ແລະ ກຳປູເຈຍ ໄດ້ດໍາເນີນການພົບປະເຈລະຈາສອງຝ່າຍ ເຊິ່ງໄດ້ດໍາເນີນໄປດ້ວຍບັນຍາກາດໄມຕີຈິດມິດຕະພາບອັນອົບອຸ່ນ ຖານບ້ານໃກ້ເຮືອນຄຽງ ແລະ ບົນພື້ນຖານການເປັນຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານ. ໃນການພົບປະສອງຝ່າຍຄັ້ງນີ້, ທ່ານປະທານສະພາແຫ່ງຊາດລາວ ໄດ້ຕີລາຄາສູງ ຕໍ່ການມາຢ້ຽມຢາມ ສປປ ລາວ ຢ່າງເປັນທາງການ ແລະ ໄດ້ແຈ້ງສະພາບການພົ້ນເດັ່ນຂອງ ສປປ ລາວ ເຊິ່ງຢູ່ໃນບັນຍາກາດສະເຫລີມສະຫລອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 48 ປີ, ທັງເປັນໄລຍະກາງສະໄໝ ແຫ່ງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ເປັນປີທີ 3 ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍກາແກ້ໄຂບັນຫາຢາເສບຕິດ. ສະພາແຫ່ງຊາດ ຫາກໍສໍາເລັດກອງປະຊຸມສະໄໝສາ ມັນເທື່ອທີ 6 ຂອງຕົນ ໃນທ້າຍເດືອນ ພະຈິກ 2023 ຜ່ານມາ. ພ້ອມນີ້, ທ່ານປະທານສະພາແຫ່ງຊາດລາວ ຍັງໄດ້ຕີລາຄາສູງຜົນສໍາເລັດຮອບດ້ານ ຂອງຣາຊະອານາຈັກກໍາປູເຈຍ ໃນການພັດທະນາປະເທດຊາດ ໃນໄລຍະຜ່ານມາ, ພິເສດ ແມ່ນຜົນສໍາເລັດໃນການເລືອກຕັ້ງ ສະມາຊິກສະພາແຫ່ງຊາດຊຸດທີ VII ໃນເດືອນ ກໍລະກົດ ຜ່ານມາ ແລະ ການຈັດຕັ້ງລັດຖະບານໃໝ່, ການເລືອກຕັ້ງຄະນະນໍາຊຸດໃໝ່ຂອງສະພາແຫ່ງຊາດກໍາປູເຈຍ.

ໃນໂອກາດພົບປະສອງຝ່າຍນີ້, ສົມເດັດ ຄູນ ສຸດາຣີ, ປະທານສະພາແຫ່ງຊາດກໍາປູເຈຍ ໄດ້ສະແດງຄວາມປິຕິຍິນດີເປນຢ່າງຍິ່ງ ທີ່ໄດ້ມາຢ້ຽມຢາມ ສປປ ລາວ ເປັນຄັ້ງທໍາອິດ ພາຍຫລັງຖືກເລືອກຕັ້ງເປັນປະທານສະພາແຫ່ງຊາດກໍາປູເຈຍ. ທ່ານໄດ້ແຈ້ງສະພາບການອັນພົ້ນເດັ່ນຂອງລາຊະອານາຈັກກໍາປູເຈຍໃນໄລຍະມານີ້. ສອງປະທານສະພາແຫ່ງຊາດ ໄດ້ຮ່ວມກັນຕີລາຄາຄືນການຈັດຕັ້ງປະຕິບັດບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ສອງສະພາແຫ່ງຊາດລາວ-ກໍາປູເຈຍ ທີ່ໄດ້ເຊັນຮ່ວມກັນໃນປີ 2022 ຜ່ານມາ ແລະ ເປັນເອກະພາບກັນກໍານົດທິດທາງແຜນການຮ່ວມມືໃນຕໍ່ໜ້າ ກໍຄື ການປະກອບ ສ່ວນອັນສໍາຄັນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພນມິດຕະພາບທີ່ເປັນມູນເຊື້ອ, ການເປັນຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ສປປ ລາວ ແລະ ຣາຊະອານາຈັກກໍາປູເຈຍ.

ພາຍຫລັງການພົບປະສອງຝ່າຍລະຫວ່າງ ສອງປະທານສະພາແຫ່ງຊາດລາວ-ກໍາປູເຈຍແລ້ວ. ຄະນະຜູ້ແທນຂອງສອງປະເທດ ລາວ-ກຳປູເຈຍ ກໍໄດ້ສືບຕໍ່ພົບປະສອງຝ່າຍນຳກັນ ເພື່ອປຶກສາຫາລື ແລະ ຊຸກຍູ້ເສີມຂະຫຍາຍການພົວພັນຮ່ວມມືນໍາກັນ ແລະ ບັນດາເນື້ອໃນທີ່ຈະນໍາມາຄົ້ນຄວ້າ, ພິຈາລະນາ ແລະ ຮັບຮອງເອົາໃນກອງປະຊຸມສຸດຍອດ ລັດຖະສະພາກໍາປູເຈຍ-ລາວ-ຫວຽດນາມ ຄັ້ງທີ 1 ເຊິ່ງຈະຈັດຂຶ້ນໃນໄວໆນີ້.

ພາບ+ຂ່າວ: ຂ່າວສານປະເທດລາວ