ກະຊວງສາທາລະນະສຸກ ຍົກລະດັບດ້ານວິຊາການປິ່ນປົວພະຍາດຫົວໃຈເສັ້ນເລືອດ ເພື່ອເຮັດການເສຍຊີວິດຂອງຄົນໜ້ອຍລົງ

ວັນທີ 25 ພະຈິກ 2023, ກະຊວງສາທາລະນະສຸກ ໄດ້ຈັດກອງປະຊຸມແລກປ່ຽນວິຊາການພະຍາດຫົວໃຈເສັ້ນເລືອດ ຂຶ້ນທີ່ນະຄອນຫລວງວຽງຈັນ, ເປັນປະທານຂອງທ່ານ ສະໝອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ແລະ ທ່ານ ພັນເອກພິເສດ ຫລີປິ່ງ ທູດທະຫານປະຈໍາສະຖານເອກອັກຄະລັດຖະທູດສປ ຈີນ ປະຈໍາລາວ.

ກອງປະຊຸມຄັ້ງນີ້, ເພື່ອແລກປ່ຽນປະສົບການໃນການປິ່ນປົວພະຍາດຫົວໃຈເສັ້ນເລືອດຂອງບັນດາຊ່ຽວຊານແພດທະຫານຈີນ, ຊ່ຽນຊານແພດຫວຽດນາມ ແລະ ວິຊາການ, ຊ່ຽວຊານຈາກໂຮງໝໍພາກລັດ ແລະ ເອກະຊົນໃນນະຄອນຫລວງວຽງຈັນ ແລະ ເພື່ອຊອກຫາວິທີການປິ່ນປົວ, ບົ່ງມະຕິທີ່ຊັດເຈນທີ່ສຸດ ເຮັດການເສຍຊີວິດຂອງຄົນເຈັບຍ້ອນພະຍາດຫົວໃຈເສັ້ນເລືອດໜ້ອຍລົງ.

ອີງຕາມການສຶກສາ ແລະ ສະຖິຕິໃຫ້ຮູ້ວ່າ, ຫລາຍກວ່າ 45% ຂອງສາເຫດການເສຍຊີວິດໃນ ສປປ ລາວ ແມ່ນເກີດຈາກພະຍາດບໍ່ຕິດຕໍ່ ແລະ12,8% ແມ່ນເສຍຊີວິດຍ້ອນພະຍາດຫົວໃຈເສັ້ນເລືອດ. ສໍາລັບ ສປປ ລາວ ຍັງບໍ່ທັນມີຄວາມສາມາດ ແລະ ເງື່ອນໄຂພຽງພໍໃນການຕອບສະໜອງການປິ່ນປົວໄດ້ຢ່າງທົ່ວເຖິງໃນຂອບເຂດທົ່ວປະເທດເຮັດໃຫ້ຄົນຈໍານວນໜຶ່ງເສຍຊີວິດ.

ໃນໂອກາດນີ້, ທ່ານ ຮອງລັດຖະມົນຕີກະຊວງສາທາລະນະສຸກ ໃຫ້ຮູ້ວ່າ: ກອງປະຊຸມຄັ້ງນີ້, ຈະໄດ້ຖອດຖອນບົດຮຽນປະສົບການຈາກວິທະຍາກອນທັງໝົດທີ່ເຂົ້າຮ່ວມ, ຍົກສູງຄວາມຮູ້ ຄວາມເຂົ້າໃຈບົດຮຽນວິຊາການ, ວິທະຍາການເຕັກນິກການແພດອັນໃໝ່ ໃນການຄຸ້ມຄອງປິ່ວປົວພະຍາດຫົວໃຈເສັ້ນເລືອດ ເພື່ອພັດທະນາຕົນເອງຍົກສູງຄຸນນະພາບດ້ານວິຊາການທາງດ້ານຫົວໃຈເສັ້ນເລືອດຂອງປະເທດໃຫ້ເທົ່າທຽມກັບພາກພື້ນ ແລະ ສາກົນ ທັງເປັນການຮັດແໜ້ນ ແລະເສີມສ້າງສາຍພົວພັນກັບວິຊາການລະຫວ່າງສປ ຈີນ, ສສ ຫວຽດນາມໃຫ້ເລິກເຊິ່ງກວ່າເກົ່າ.