ລາວ-ຫວຽດ ແລກປ່ຽນບົດຮຽນດ້ານຂະແໜງການທ່ອງທ່ຽວ

ວັນທີ 22 ພະຈິກ 2023  ພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ (ຖວທ ນວ) ສປປ ລາວ ແລະ ສະມາຄົມທ່ອງທ່ຽວແຂວງກວາງນິງ ສສ ຫວຽດນາມ ໄດ້ພົບປະແລກປ່ຽນບົດຮຽນດ້ານການທ່ອງທ່ຽວ ມີທ່ານ ຄໍາຄູນ ໃບລາຕຣີ ຮອງຫົວໜ້າພະແນກ ຖວທ ນວ ແລະ ທ່ານ ຫງວຽນ ເທເຫວ ຫົວໜ້າກຸ່ມສະມາຄົມທ່ອງທ່ຽວ 6 ແຂວງຕິດທະເລ ທັງເປັນປະທານສະມາຄົມທ່ອງທ່ຽວ ແຂວງກວາງນິງ ພ້ອມດ້ວຍຄະນະ ເຂົ້າຮ່ວມ.

ທ່ານ ຄໍາຄູນ ໃບລາຕຣີ ໄດ້ລາຍງານຫຍໍ້ກ່ຽວກັບສະພາບການທ່ອງທ່ຽວໃນ ນວ ໂດຍສະເພາະຢູ່ໃນ 9 ເດືອນ ປີ 2023 ຜ່ານມາ ພວກເຮົາໄດ້ຮັບນັກທ່ອງທ່ຽວ ທັງພາຍໃນ ແລະ ຕ່າງປະເທດ ປະມານ 900.000 ກວ່າເທື່ອຄົນ ນອກຈາກນັ້ນ ຢູ່ ນວ ເຮົາຍັງມີສິ່ງຮອງຮັບຈາກການທ່ອງທ່ຽວ ໂດຍສະເພາະມີບໍລິສັດທ່ອງທ່ຽວ 386 ບໍລິສັດ ມີໂຮງແຮມ 340 ກວ່າແຫ່ງ ໃນນັ້ນ ສໍາລັບພັດຕະຄານ ຮ້ານອາຫານ ທີ່ສາມາດບໍລິການ-ຮອງຮັບນັກທ່ອງທ່ຽວໃນລະດັບເປັນກຸ່ມໄດ້ (ຖືວ່າເປັນແຂກຜ່ານລາຍການ ທ່ອງທ່ຽວ ມີຢູ່ປະມານ 200 ກວ່າແຫ່ງ) ພ້ອໃກັນນັ້ນ ພວກເຮົາກໍຍັງມີແຫຼ່ງທ່ອງທ່ຽວ ທີ່ສາມາດຮອງຮັບນັກທ່ອງທ່ຽວຢູ່ໃນ ນວ 37 ແຫ່ງ ເຊິ່ງແຫຼ່ງທ່ອງທ່ຽວທີ່ມີຄວາມໂດດເດັ່ນມີຫຼາຍບ່ອນ ເຊັ່ນ:ພະທາດຫຼວງ ປະຕູໄຊ ຫໍພະແກ້ວ ແລະ ອື່ນໆ ພ້ອມດຽວກັນນັ້ນ ຍັງມີຫໍພິພິຕະພັນໄມ້ແກະສະຫຼັກ ເຊິ່ງເປັນແຫຼ່ງທ່ອງທ່ຽວແຫ່ງໃໝ່ ທີ່ກໍາລັງມີການກໍ່ສ້າງໃກ້ຈະສໍາເລັດໃນໄວໆນີ້.

ນອກຈາກນັ້ນ ຍັງມີແຫຼ່ງທ່ອງທ່ຽວ ທີ່ຕິດພັນກັບທໍາມະຊາດ (ນໍ້າປຽນຢໍລະປາ) ທີ່ຢູ່ບໍ່ໄກຈາກ ນວ ແລະ ຍັງມີແຫຼ່ງທ່ອງທ່ຽວສາຍນໍ້າງື່ມ ມີເຮືອບໍລິການອາຫານ ແລະ ເຮືອບໍລິການທ່ອງທ່ຽວຈໍານວນໜຶ່ງ ພ້ອມກັນນີ້ ສິ່ງອໍານວຍຄວາມສະດວກຢູ່ ນວ ຍັງມີດ່ານສາກົນຢູ່ 3 ແຫ່ງ ຄື:ສະໜາມບິນສາກົນວັດໄຕ ດ່ານສາກົນຂົວມິດຕະພາບ ລາວ-ໄທ 1 ແລະ ສະຖານນີລົດໄຟທ່ານາແລ້ງ ນອກຈາກນັ້ນ ພວກເຮົາຍັງມີເສັ້ນທາງລົດໄຟເຊື່ອມຕໍ່ ລະຫວ່າງ ນວ ກັບ ສປ ຈີນ ເຊິ່ງສາມາດເດີນທາງໄປແຂວງພາກເໜືອ ແລະ ຍັງມີລົດໂດຍສານລະຫວ່າງປະເທດ ລະຫວ່າງ ນວ ກັບບັນດາປະເທດໃກ້ຄຽງ.

ທ່ານ ຫງວຽນ ເທເຫວ ກໍໄດ້ແຈ້ງໃຫ້ຮູ້ເຖິງສະພາບການທ່ອງທ່ຽວ ຢູ່ໃນແຂວງກວາງນິງ ສສ ຫວຽດນາມ ແລະ ຢູ່ໃນແຫຼ່ງທ່ອງທ່ຽວ 6 ແຂວງຕິດທະເລ ໂດຍສະເພາະວຽກງານການ ທ່ອງທ່ຽວ ທີ່ພົ້ນເດັ່ນທີ່ສຸດ ກໍຄືການບໍລິການການທ່ອງທ່ຽວ ອ່າວຮາລອງ ມົນສະເໜແຫຼ່ງທ່ອງທ່ຽວ ທີ່ເປັນມໍລະດົກໂລກ ທາງທໍາມະຊາດ.