ຮອງນາຍົກ ເນັ້ນໜັກໃຫ້ຄະນະກໍາມະການຄຸ້ມຄອງອິນເຕີເນັດແຫ່ງຊາດ ແຕ່ລະຂັ້ນສຸມໃສ່ຄຸ້ມຄອງອິນເຕີເນັດໃຫ້ມີຄຸນນະພາບ

ໃນໂອກາດ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ປະທານຄະນະກຳມະການຄຸ້ມຄອງອິນເຕີເນັດ ແຫ່ງຊາດ ເປັນປະທານກອງປະຊຸມສະຫລຸບວຽກງານ ປະຈຳປີ 2023 ແລະ ວາງທິດທາງແຜນການ ປະຈຳປີ 2024 ຂອງຄະນະກໍາມະການຄຸ້ມຄອງອິນເຕີເນັດ ແຫ່ງຊາດ (ຄຄອຊ) ເຊິ່ງທ່ານມີຄໍາເຫັນໃນການຄຸ້ມຄອງລະບົບອິນເຕີເນັດດັ່ງນີ້:

1. ສືບຕໍ່ປັບປຸງພາລະບົບບາດ, ສິດໜ້າທີ່ ແລະ ໂຄງປະກອບການຈັດຕັ້ງຂອງຄະນະກຳ ມະການຄຸ້ມຄອງອິນເຕີເນັດແຫ່ງຊາດ ໃຫ້ສອດຄ່ອງກັບການຄຸ້ມຄອງ, ການພັດທະນາ ເຕັກໂນໂລຊີການສື່ສານ, ຂໍ້ມູນຂ່າວສານ, ເຕັກໂນໂລຊີຕິຈິຕອນ ທັງສຸມໃສ່ສ້າງ, ປັບປຸງນິຕິກຳ ທີ່ຍັງບໍ່ພຽງພໍ ໃຫ້ແທດເໝາະກັບການປ່ຽນແປງໃນແຕ່ລະໄລຍະ; ໃນນັ້ນ, ພວກເຮົາ ມີລັດຖະດຳລັດ ວ່າດ້ວຍການແຕ່ງຕັ້ງຄະນະກຳມະການລະດັບຊາດ ເພື່ອການຫັນເປັນດິຈິຕອນລາວແລ້ວ; ໃນຕໍ່ໜ້າ ນອກຈາກສຸມໃສ່ສ້າງແຜນແມ່ບົດ ອັນລວມ, ອັນສະເພາະ ໃນການຫັນເປັນດິຈິຕອນ ເພື່ອການຄຸ້ມຄອງ ແລະ ການພັດທະນາວຽກງານຫັນເປັນດິຈິຕອນ ຂອງທຸກຂະແໜງການແລ້ວ ໃຫ້ເລັ່ງໃສ່ ການສ້າງຕັ້ງຄະນະກຳມະການຄຸ້ມຄອງອິນເຕີເນັດຂັ້ນກະຊວງ, ແຂວງ, ນະຄອນຫຼວງ ຫຼືພາກສ່ວນໃດໄດ້ສ້າງແລ້ວ ໃຫ້ກວດກາ, ປັບປຸງ ເພື່ອໃຫ້ໄດ້ເຄື່ອນໄຫວຕາມພາລະບົດບາດ ລວມທັງສ້າງກົນໄກປະສານງານ ໃຫ້ມີຄວາມກົມກຽວ ແຕ່ຂັ້ນສູນກາງລົງຮອດທ້ອງຖິ່ນ.
2. ເພີ່ມທະວີຂອດປະສານງານກັບອົງການທີ່ກ່ຽວຂ້ອງ ເປັນຕົ້ນສູນປ້ອງກັນຄວາມປອດໄພທາງໄຊເບີ, ສູນປ້ອງກັນຂ່າວປອມ, ບັນດາໜ່ວຍງານທີ່ຂຶ້ນກັບກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ເພື່ອພ້ອມກັນຄຸ້ມຄອງ, ຕິດຕາມ, ກວດກາ, ເຝົ້າລະວັງ ແລະ ຕອບຕ້ານຫາງສຽງບໍ່ດີ, ຂໍ້ມູນຂ່າວສານບໍ່ຖືກຕ້ອງ ເທິງອິນເຕີເນັດ ໃຫ້ມີຄວາມວ່ອງໄວທັນການ; ໃນນັ້ນ, ໃຫ້ເພີ່ມທະວີຄວາມເປັນເຈົ້າການຂອງໜ່ວຍງານ 007/ຄຄອຊ ໃນການຕິດຕາມ, ກວດກາ ແລະ ຕອບໂຕ້ບັນດາຫາງສຽງທີ່ບໍ່ດີ ເທິງສື່ສັງຄົມອອນລາຍ ກໍຄືບັນຫາພົ້ນເດັ່ນທີ່ເກີດຂຶ້ນຢູ່ໃນສັງຄົມ ຕາມຄວາມຮັບຜິດຊອບຂອງແຕ່ລະພາກສ່ວນ; ບັນຫາເກີດຂຶ້ນຢູ່ບ່ອນໃດ, ບ່ອນນັ້ນຕ້ອງສະໜອງຂໍ້ມູນໃຫ້ສໍານັກຂ່າວທາງການ ແລະ ອອກຖະແຫຼງຂ່າວທີ່ຖືກຕ້ອງ ໃຫ້ສັງຄົມຮັບຊາບຢ່າງທັນການ; ພ້ອມນັ້ນ, ໃຫ້ຄົ້ນຄວ້າສ້າງຕັ້ງຈຸດປະສານງານ ກັບບັນດາບໍລິສັດ ຜູ້ສະໜອງຂໍ້ມູນຂ່າວສານຢູ່ຕ່າງປະເທດ ເປັນຕົ້ນເຟັດບຸກ, ທະວິດເຕີ, ຢູທູບ ແລະ ອື່ນໆ ເພື່ອເປັນເງື່ອນໄຂໃນການດຳເນີນວຽກງານດັ່ງກ່າວ.
3. ການປັບປຸງລະບົບບໍລິຫານລັດ ໃຫ້ເປັນທັນສະໄໝ ໂດຍສະເພາະລະບົບປະຊຸມທາງໄກ, ລະບົບການສື່ສານພາກລັດ, ລະບົບອີເມວ, ລະບົບຈັດເກັບ ແລະ ນຳໃຊ້ເອກະສານຮ່ວມກັນ, ລະບົບໂຄງສ້າງຊອບແວ-ເວັບໄຊ ພາກລັດ ກໍຄືລະບົບຫ້ອງການທັນສະໄໝ; ປະເມີນຄືນເຖິງປະສິດທິພາບຂອງການນຳໃຊ້; ລະບົບໃດທີ່ຍັງບໍ່ທັນມີ ຄວາມຈຳເປັນ, ຍັງບໍ່ທັນຮັບປະກັນດ້ານຄວາມປອດໄພ ໃຫ້ສະລໍການພັດທະນາໄປກ່ອນ ເພື່ອຫຼຸດຜ່ອນການນຳໃຊ້ງົບປະມານພາກລັດ.
4. ສືບຕໍ່ການຄຸ້ມຄອງ ແລະ ຈັດສັນຊັບພະຍາກອນ ໂທລະຄົມມະນາຄົມ ແລະ ອິນເຕີເນັດ ໃຫ້ມີປະສິດທິພາບ; ໃນນີ້, ໃຫ້ສົມທົບພາກສ່ວນທີ່ກ່ຽວຂ້ອງ, ສືບຕໍ່ຄົ້ນຄວ້າ, ແກ້ໄຂບັນຫາການຄຸ້ມຄອງອິນເຕີເນັດ, ຄື້ນຄວາມຖີ່, ສັນຍານໂທລະສັບ ແລະ ບັນຫາອື່ນໆທີ່ກ່ຽວຂ້ອງ ເພື່ອໃຫ້ເຂົ້າສູ່ລະບຽບການ.
5. ສືບຕໍ່ຕິດຕາມ ແລະ ຊຸກຍູ້ການສ້າງສູນສຳຮອງອິນເຕີເນັດແຫ່ງຊາດ ທີ່ຍັງບໍ່ທັນສຳເລັດ ລວມທັງການສ້າງ ແລະ ປັບປຸງຈຸດເຊື່ອມຕໍ່ຕາມບໍລິເວນຊາຍແດນ; ຄົ້ນຄວ້າການປັບປຸງ ແລະ ພັດທະນາລະບົບອິນເຕີເນັດ ໃຫ້ມີຄວາມໄວສູງ, ລາຄາເໝາະສົມ, ເຂົ້າເຖິງໄດ້ໃນທົ່ວປະເທດຢ່າງມີຄວາມປອດໄພ ແລະ ມີຄຸນນະພາບ; ເຊິ່ງມີຄວາມຈຳເປັນ ທີ່ຕ້ອງໄດ້ເລັ່ງແກ້ໄຂການເຊື່ອມຕໍ່ສັນຍານອິນເຕີເນັດແບບລວມສູນ ຜ່ານປະຕູດຽວໃຫ້ສຳເລັດໂດຍໄວ; ປັບປຸງການສ້າງ ແລະ ນໍາໃຊ້ໂຄງລ່າງພື້ນຖານໂທລະຄົມມະນາຄົມ ແລະ ອິນເຕີເນັດຮ່ວມກັນ ເປັນຕົ້ນລະບົບສາຍສົ່ງໂທລະຄົມມະນາຄົມ ແລະ ລະບົບເສົາສົ່ງສັນຍານ; ສ້າງຕັ້ງບໍລິສັດ ຜູ້ສະໜອງໂຄງລ່າງພື້ນຖານໂທລະຄົມມະນາຄົມແຫ່ງຊາດ ເພື່ອຕອບສະໜອງ ແລະ ໃຫ້ບໍລິການແກ່ສັງຄົມ ໂດຍຫຼີກການລົງທຶນຊ້ຳຊ້ອນ ແລະ ຮັບປະກັນໃຫ້ລັດ ສາມາດຄຸ້ມຄອງຢ່າງມີປະສິດທິຜົນ.
6. ໃຫ້ສືບຕໍ່ສັງລວມໂຄງການເຕັກນິກຂອງພາກສ່ວນຕ່າງໆ ທີ່ເຫັນວ່າມີຄວາມຈຳເປັນ ເລັ່ງດ່ວນ ເພື່ອນຳສະເໜີລັດຖະບານ ພິຈາລະນາ; ສ່ວນບັນດາແຜນການ, ໂຄງການທີ່ໄດ້ຮັບອະນຸມັດແລ້ວ ກໍເລັ່ງໃຫ້ເກີດເປັນຮູບປະທຳ; ພ້ອມນັ້ນ, ໃຫ້ຄົ້ນຄວ້າຈັດຫາແຫຼ່ງລາຍຮັບໃໝ່ ໂດຍການຂຸດຄົ້ນທ່າແຮງຈາກຊັບພະຍາກອນອິນເຕີເນັດ ແລະ ບັນດາການບໍລິການເທິງອິນເຕີເນັດໃຫ້ຫຼາຍຂຶ້ນ ເພື່ອໃຫ້ພວກເຮົາມີງົບປະມານ, ມີແຫຼ່ງທຶນທີ່ຈຳເປັນ ນຳໃຊ້ເຂົ້າໃນການເຄື່ອນໄຫວວຽກງານທີ່ກ່ຽວຂ້ອງດ້ານຕ່າງໆຂອງຄະນະກຳມະການຄຸ້ມຄອງອິນເຕີເນັດແຫ່ງຊາດ.
7. ວຽກງານລວມສູນການສື່ສານ ແມ່ນບັນຫາສຳຄັນຕໍ່ການຄຸ້ມຄອງອິນເຕີເນັດ; ສະນັ້ນ ບັນດາບໍລິສັດ ຜູ້ໃຫ້ບໍລິການໂທລະຄົມ ແລະ ອີນເຕີເນັດ ຕ້ອງເຂົ້າມາລວມສູນ ຜ່ານສູນອີນເຕີເນັດແຫ່ງຊາດ ໃຫ້ສຳເລັດໂດຍໄວ; ພ້ອມນັ້ນ, ການຂຶ້ນທະບຽນເລກໝາຍໂທລະຊັບ (ຊິມກາດ) ຂອງຫົວໜ່ວຍ ຫຼືບຸກຄົນ ທີ່ຊື້ເບີໂທລະສັບ ເພື່ອຂາຍຕໍ່ ໂດຍສະເພາະການຂາຍໃຫ້ຄົນຕ່າງປະເທດ ຫຼືມີໄວ້ໃຊ້ໃນຈຳນວນຫຼາຍ ໃຫ້ແກ້ໄຂຢ່າງຂາດຕົວ ເພື່ອເຮັດໃຫ້ການເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ ມີຄວາມຮັບປະກັນ.
8. ການຄຸ້ມຄອງເກມອອນລາຍ; ການທົດລອງຂຸດຄົ້ນ ແລະ ຊື້-ຂາຍ ສະກຸນເງິນຄຮິບໂຕ ແລະ ບັນຫາອື່ນໆ ທີ່ເປັນບັນຫາໃໝ່ ແມ່ນໃຫ້ຕິດຕາມ, ປະເມີນຢ່າງໃກ້ຊິດ ເພື່ອບໍ່ໃຫ້ສົ່ງຜົນກະທົບຕໍ່ພາກລວມຂອງການພັດທະນາ, ທັງຄົ້ນຄ້ວາ, ສ້າງນິຕິກຳໃນການຄຸ້ມຄອງໃຫ້ລະອຽດ, ຊັດເຈນຕື່ມອີກ.

9: ສືບຕໍ່ພົວພັນຮ່ວມມື ກັບບັນດາປະເທດເພື່ອນມິດຍຸດທະສາດ ເພື່ອຍາດແຍ່ງເອົາການຊ່ວຍເຫຼືອ ໃນການພັດທະນາບຸກຄະລາກອນ, ອຸປະກອນເຕັກນິກ-ເຕັກໂນໂລຊີດິຈິຕອນ ທີ່ມີລັກສະນະຍຸດທະສາດ; ພົວພັນກັບອົງການ, ຜູ້ໃຫ້ບໍລິການດ້ານໂທລະຄົມມະນາຄົມ ພາກພື້ນ ແລະ ສາກົນ ໃນແລກປ່ຽນຂໍ້ມູນຂ່າວສານ, ກົນໄກປະສານງານ, ການພັດທະນາລະບົບ ໂທລະຄົມມະນາ ຄົມ ຮັບໃຊ້ຄວາມຕ້ອງການຂອງສັງຄົມ ເພື່ອກ້າວໄປສູ່ຄວາມເປັນທັນສະໄໝໃນລະດັບສາກົນ.