ສປປ ລາວ ເຂົ້າຮ່ວມກອງປະຊຸມ ວ່າດ້ວຍປະຊາກອນໃນພາກພື້ນອາຊີ-ປາຊີຟິກ ຄັ້ງທີ 7

ທ່ານ ນາງ ພອນວັນ ອຸທະວົງ ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ນຳພາຄະນະຜູ້ແທນທາງການ ຂອງ ສປປ ລາວ ປະກອບມີຜູ້ຕາງໜ້າຈາກ ກະຊວງແຜນການ ແລະ ການລົງທຶນ, ກະຊວງການຕ່າງປະເທດ, ກະຊວງສຶກສາທິການ ແລະ ກິລາ, ກະຊວງແຮງງານ ແລະ ສະຫວັດດີການສັງຄົມ ແລະ ສູນກາງສະຫະພັນແມ່ຍິງ ແລະ ສະຖານທູດລາວ ປະຈໍາ ບາງກອກ ປະເທດໄທ ເຂົ້າຮ່ວມກອງປະຊຸມ ວ່າດ້ວຍປະຊາກອນໃນພາກພື້ນອາຊີ-ປາຊີຟິກ ຄັ້ງທີ 7 ໃນລະຫວ່າງວັນທີ 15-17 ພະຈິກ ຜ່ານມາ ທີ່ ບາງກອກ ປະເທດໄທ ຊຶ່ງມີບັນດາປະເທດສະມາຊິກ ຄະນະກຳມາທິການເສດຖະກິດ-ສັງຄົມ ອົງການ ສປຊ ສຳລັບພາກພື້ນອາຊີ-ປາຊີຟິກ ເຂົ້າຮ່ວມຫຼາຍກວ່າ 40 ປະເທດ ແລະ ມີອົງການຈັດຕັ້ງສາກົນ, ອົງການຈັດຕັ້ງບໍ່ສັງກັດລັດ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.

ຈຸດປະສົງຂອງກອງປະຊຸມ ແມ່ນເພື່ອ (1) ທົບທວນການຈັດຕັ້ງປະຕິບັດຖະແຫຼງການຂອງລັດຖະ ມົນຕີ ຂອງພາກພື້ນອາຊີ-ປາຊີຟິກ ວ່າດ້ວຍປະຊາກອນ ແລະ ການພັດທະນາ (Asia Pacific Ministerial Declaration on Population and development) ທີ່ໄດ້ຮັບຮອງເອົາໃນກອງປະຊຸມ ວ່າດ້ວຍປະຊາກອນພາກພື້ນອາຊີ-ປາຊີຟິກ ໃນປີ 2013; (2) ກຳນົດຮູບແບບ, ວິທີການ ແລະ ກົນໄກໃນການຈັດຕັ້ງປະຕິບັດທີ່ດີ, ບົດຮຽນທີ່ຖອດຖອນໄດ້, ແຜນງານບຸລິມະສິດ ແລະ ເຫດການສຸກເສີນ ທີ່ກ່ຽວຂ້ອງກັບການຈັດຕັ້ງປະຕິບັດວາລະການພັດທະນາແບບຍືນຍົງຮອດປີ 2030; (3) ຮັບຮູ້ຜົນສຳເລັດຫຼາຍດ້ານກ່ຽວກັບວຽກງານປະຊາກອນ ແລະ ການພັດທະນາ ນັບແຕ່ກອງປະຊຸມປະຊາກອນຄັ້ງທຳອິດ ທີ່ໄດ້ຈັດຂຶ້ນໃນປີ 1963 ລວມທັງກາລະໂອກາດ ແລະ ສິ່ງທ້າທາຍທີ່ຕ້ອງເອົາໃຈໃສ່ແກ້ໄຂ ແລະ ກໍານົດທິດທາງ ເພື່ອສືບຕໍ່ຈັດຕັ້ງປະຕິບັດໃນຕໍ່ໜ້າ; ແລະ (4) ສັງລວມຜົນສໍາເລັດວຽກງານປະຊາກອນ ແລະ ການພັດທະນາ ຈາກພາກພື້ນອາຊີ-ປາຊີຟິກ ເຂົ້າໃນບົດລາຍງານທົບທວນຄືນ 30 ປີ ສະພາບການຈັດຕັ້ງປະຕິບັດ ແຜນດຳເນີນງານຂອງກອງປະຊຸມປະຊາກອນ ແລະ ການພັດທະນາ ຮັບຮອງເອົາໃນປີ 1994 ເພື່ອເປັນຂໍ້ມູນໃຫ້ແກ່ກອງປະຊຸມ ຄະນະກຳມາທິການວ່າດ້ວຍປະຊາກອນ ແລະ ການພັດທະນາ ຄັ້ງທີ 57 (The Fifty Seventh of the Commission on Population and Development) ຊຶ່ງມີແຜນຈະຈັດຂຶ້ນໃນລະຫວ່າງວັນທີ 29 ເມສາ – 3 ພຶດສະພາ 2024 ທີ່ ນິວຢອກ, ສ ອາເມຣິກາ.

ໃນວັນທີ 15 ພະຈິກ 2023, ທ່ານ ນາງ ພອນວັນ ອຸທະວົງ ໄດ້ກ່າວປາໄສຕໍ່ກອງປະຊຸມໃນວາ ລະທີ 2: ທົບທວນຄືນ ຄວາມຄືບໜ້າກ່ຽວກັບການຈັດຕັ້ງປະຕິບັດ ຖະແຫຼງການຂອງກອງປະຊຸມລັດຖະ ມົນຕີວ່າດ້ວຍ ປະຊາກອນ ແລະ ການພັດທະນາ, ກໍຄື ແຜນດຳເນີນງານ ຂອງກອງປະຊຸມປະຊາກອນ ແລະ ການພັດທະນາ. ໃນນັ້ນ, ທ່ານຮອງລັດຖະມົນຕີກະຊວງແຜນການ ແລະ ການລົງທຶນ ໃນນາມຫົວໜ້າຄະນະຜູ້ແທນຂອງ ສປປ ລາວ ໄດ້ຍົກໃຫ້ເຫັນຄວາມໝາຍຄວາມສຳຄັນ ແລະ ຜົນສໍາເລັດຕົ້ນຕໍຂອງວຽກງານປະຊາກອນ ແລະ ການພັດທະນາ, ເປັນຕົ້ນ: ໄດ້ເຊື່ອມສານເນື້ອໃນຈິດໃຈ ຖະແຫຼງການ ແລະ ແຜນປະຕິບັດງານດັ່ງກ່າວ ເຂົ້າໃນນະໂຍບາຍແຫ່ງຊາດດ້ານປະຊາກອນ ແລະ ການພັດທະນາ, ແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ແລະ ເຫັນໄດ້ເຖິງຄວາມຄືບໜ້າໃນການຈັດຕັ້ງປະຕິບັດວຽກງານດັ່ງກ່າວ: ອັດຕາເຂົ້າຮຽນຊັ້ນປະຖົມ ເພີ່ມຂຶ້ນ, ສຸຂະພາບຈະເລີນພັນ ແລະ ສຸຂະພາບທາງເພດ, ການວາງແຜນຄອບຄົວ, ການເກີດລູກໂດຍມີແພດຊ່ວຍ ເພີ່ມຂຶ້ນ ອັນພົ້ນເດັ່ນແມ່ນຫຼຸດຜ່ອນອັດຕາການເສຍຊີວິດຂອງແມ່. ພ້ອມດຽວກັນນີ້, ທ່ານ ນາງ ພອນວັນ ອຸທະວົງ ໄດ້ແຈ້ງໃຫ້ກອງປະຊຸມຊາບ ຜົນຂອງກອງປະຊຸມລະດັບຊາດ ວ່າດ້ວຍປະຊາກອນ ແລະ ການພັດທະນາ ຂອງ ສປປ ລາວ ຈັດຂຶ້ນໃນລະຫວ່າງວັນທີ 23-24 ຕຸລາ ຜ່ານມາ ທີ່ນະຄອນຫຼວງວຽງຈັນ, ໂດຍກອງປະຊຸມໄດ້ທົບທວນຄືນການຈັດຕັ້ງປະຕິບັດວຽກງານ ປະຊາກອນ ແລະ ການພັດທະນາ, ການແກ້ໄຂບັນຫາສິ່ງທ້າທາຍ ໃນວຽກງານປະຊາກອນ ແລະ ການພັດທະນາ ເປັນຕົ້ນບັນຫາສຸຂະພາບ, ການປ່ຽນແປງດິນຟ້າອາກາດ ແລະ ບັນຫາໃນຂົງເຂດສັງຄົມ ໂດຍສະເພາະວຽກງານສຸຂະພາບຈະເລີນພັນ ແລະ ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ເພື່ອຮັບປະກັນໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ; ພ້ອມທັງວາງທິດທາງແຜນການວຽກງານປະຊາກອນ ແລະ ການພັດທະນາ ຂອງ ສປປ ລາວໃນຕໍ່ໜ້າ. ທ້າຍສຸດ, ທ່ານ ນາງ ພອນວັນ ອຸທະວົງ ໄດ້ຢ້ຳຄືນຄວາມໝາຍໝັ້ນ ຂອງ ສປປ ລາວ ຕໍ່ການຈັດຕັ້ງປະຕິບັດວຽກງານປະຊາກອນ ແລະ ການພັດທະນາ ແລະ ການບັນລຸເປົ້າໝາຍການພັດທະນາແບບຍືນຍົງຂອງຕົນ ໂດຍຜ່ານການຮ່ວມມືກັບອົງການເຄືອຂ່າຍ ສປຊ ພາຍໃນປະເທດ ໂດຍສະເພາະອົງການສະຫະປະຊາຊາດກອງທຶນສໍາລັບປະຊາກອນ (UNFPA) ທີ່ໃຫ້ການສະໜັບສະໜູນທາງດ້ານວິຊາການ ແລະ ທຶນຮອນ ໃນການຈັດຕັ້ງປະຕິບັດວຽກງງານປະຊາກອນ ແລະ ການພັດທະນາ ຢູ່ ສປປ ລາວ; ຄຽງຄູ່ກັນນີ້ ຍັງໄດ້ເນັ້ນເຖິງການປະກອບສ່ວນທີ່ສໍາຄັນຂອງຄູ່ພັດທະນາ ໃນຂອບການຮ່ວມມືສອງຝ່າຍ, ຫຼາຍຝ່າຍ, ອາຊຽນ, ພາກພື້ນ ແລະ ໃນຂອບວຽກແຜນດຳເນີນງານ ດ້ານປະຊາກອນ ແລະ ການພັດທະນາ ທີ່ເປັນແຜນງານຫຼັກຂອງສາກົນອີກດ້ວຍ.

ໃນວັນທີ 17 ພະຈິກ ຜ່ານມາ, ກອງປະຊຸມຮັບຮອງເອົາບົດລາຍງານຂອງກອງປະຊຸມວ່າດ້ວຍປະຊາກອນໃນພາກພື້ນອາຊີ-ປາຊີຟິກ ຄັ້ງທີ 7 ເພື່ອເປັນບ່ອນອີງໃນການຈັດຕັ້ງປະຕິບັດວຽກງານ ດ້ານປະຊາກອນ ແລະ ການພັດທະນາໃນພາກພື້ນ ອາຊີ-ປາຊີຟິກ ແລະ ເປັນຂໍ້ມູນກະກຽມໃຫ້ແກ່ກອງປະຊຸມ ຄະນະກຳມາທິການວ່າດ້ວຍປະຊາກອນ ແລະ ການພັດທະນາ ຄັ້ງທີ 57 ຊຶ່ງມີແຜນຈະຈັດຂຶ້ນໃນລະຫວ່າງວັນທີ 29 ເມສາ – 3 ພຶດສະພາ 2024, ທີ່ ນິວຢອກ ສ ອາເມຣິກາ.

(ຂ່າວ: ກະຊວງການຕ່ງປະເທດ)