ຈະນຳໃຊ້ກຳລັງ 400 ກວ່າຄົນ ປ້ອງກັນງານບຸນພະທາດຫລວງ ແກ້ໄຂບັນຫາການສັນຈອນແອອັດ

ວັນທີ 17 ພະຈິກ 2023, ກອງບັນຊາການ ປກສ ນະຄອນຫຼວງວຽງຈັນ ໄດ້ດຳເນີນກອງປະຊຸມຜ່ານແຜນປ້ອງກັນ ງານບຸນພະທາດຫລວງວຽງຈັນ ແລະ ງານວາງສະແດງສິນຄ້າ ລາວ-ໄອເຕັກ ທີ່ຈະຈັດຂຶ້ນໃນລະຫວ່າງວັນທີ 23-27 ພະຈິກນີ້,
ພັທ ສັງຄົມ ພົມມະລາດ ຫົວໜ້າພະແນກຕໍາຫຼວດຈະລາຈອນ ນະຄອນຫຼວງວຽງຈັນ ໄດ້ຜ່ານແຜນປ້ອງກັນ ງານບຸນພະທາດ ຫຼວງວຽງຈັນ ແລະ ງານວາງສະແດງສິນຄ້າ ລາວ-ໄອເຕັກ ວ່າ: ງານບຸນພະທາດຫຼວງວຽງຈັນ ແລະ ງານວາງສະແດງສິນຄ້າ ລາວ-ໄອເຕັກ ປີນີ້ ຄາດວ່າສະພາບການສັນຈອນຈະມີຄວາມແອອັດ, ສັບສົນຢູ່ບາງເສັ້ນທາງ ເປັນຕົ້ນແມ່ນ: ເສັ້ນທາງໜອງບອນ, ຖະຫນົນທາດຫຼວງ, ກໍາແພງເມືອງ, ຖະຫນົນໄກສອນ, ໂພນໄຊ, 23 ສິງຫາ ແລະ ອື່ນໆ.

ດັ່ງນັ້ນ ເຈົ້າໜ້າທີ່ພະແນກຕໍາຫຼວດຈະລາຈອນ ຈະໄດ້ ສົມທົບກັບ ຈະລາຈອນ ເມືອງສີໂຄດຕະບອງ, ເມືອງໄຊເສດຖາ, ເມືອງ ຈັນທະບູລີ, ເມືອງສີສັດຕະນາກ, ເມືອງໄຊທານີ, ເມືອງຫາດຊາຍຟອງ ແລະ ເມືອງນາຊາຍທອງ ລົງປະຈໍາຢູ່ຈຸດປ້ອງກັນທັງຫມົດ 124 ຈຸດ, ມີກໍາລັງເຂົ້າປ້ອງກັນທັງໝົດເກືອບ 500ຄົນ, ຍິງ 13 ສະຫາຍ; ໃນນີ້, ວົງໃນ 69 ຈຸດ, ວົງນອກ 40 ຈຸດ, ມີ 10 ຈຸຄອຍເຫດ ແລະ ມີ 1 ບຸດໂຄສະນາ, ສ່ວນກອງຕໍາຫຼວດຈະລາຈອນ 4 ເມືອງ ແມ່ນໃຫ້ອອກ ຕັ້ງຈຸດກວດກາ ແລະ ຄອຍເຫດ 24 ຊົ່ວໂມງ ຄື:
1. ກອງຕໍາຫຼວດຈະລາຈອນ ເມືອງນາຊາຍທອງ ສົມທົບກັບ ພະແນກ ຕັ້ງດ່ານຢູ່ບ້ານນາດີ (ຂາເຂົ້າເມືອງ)
2. ກອງຕໍາຫຼວດຈະລາຈອນ ເມືອງໄຊທານີ ຕັ້ງດ່ານຢູ່ເສັ້ນທາງເລກ 10 ທ່າງ່ອນ (ຂາເຂົ້າເມືອງ)
3. ກອງຕໍາຫຼວດຈະລາຈອນ ເມືອງປາກງື່ມ ສົມທົບກັບ ຄະນະ ສະເພາະກິດ ຕັ້ງດ່ານຢູ່ບ້ານສົມສະຫວາດ (ຂາເຂົ້າເມືອງ)
4. ກອງຕໍາຫຼວດຈະລາຈອນ ເມືອງສັງທອງ ຕັ້ງດ່ານຢູ່ປ້ອມປາກ ຕອນ (ຂາເຂົ້າເມືອງ)

ທັງໝົດນີ້ ເພື່ອຮັບປະກັນໃຫ້ການສັນຈອນ ໃນໄລຍະງານບຸນນະມັດສະການພະທາດຫຼວງ ມີຄວາມສະດວກ ແລະ ປອດໄພ.