ເຈົ້າໜ້າທີ່ ຊີ້ແຈງເລື່ອງຮຽກເງິນຈາກນັກທ່ອງທ່ຽວໄທ ປັບໃໝຕາມລະບຽບການພຽງແຕ່ 700.000 ກີບ ບໍ່ແມ່ນ 5 ພັນບາດ ຕາມທີ່ເປັນຂ່າວ
ວັນທີ 20 ພະຈິກ 2023, ພັທ ກິດອນ ກິວົງໄຊ ຮອງຫົວໜ້າຄະນະຄຸ້ມຄອງດ່ານ, ຫົວໜ້າດ່ານ ຕຳຫຼວດ ກວດຄົນເຂົ້າເມືອງ ( ຕມ ) ສາກົນຂົວມິດຕະພາບລາວ-ໄທ ແຫ່ງທີ I ໄດ້ຊີ້ແຈງກ່ຽວກັບເຫດການທີ່ເກີດຂຶ້ນໃນຄັ້ງ ວັນທີ 12 ພະຈິກ 2023ວ່າ: ວັນທີ 12 ພະຈິກ 2023 ເຈົ້າໜ້າທີ່ຕຳຫຼວດ ກວດຄົນເຂົ້າ-ອອກເມືອງ ປະຈຳຢູ່ດ່ານຂາອອກ ໄດ້ກວດກາໜັງສືຜ່ານແດນຂອງ ນາງ ນາພາພອນ ສຸກກະເສີມ (Ms NAPAPORNSUGKASEAM); ວັນເດືອນປີເກີດ: 18 ພະຈິກ 1981; ສັນຊາດໄທ, ໜັງສືຜ່ານແດນເລກທີ: AD1158593, ອອກໃຫ້ວັນທີ 30 ກັນຍາ 2023 ແລະ ໝົດອາຍຸໃນວັນທີ 29 ກັນຍາ 2028; ທີ່ຢູ່: ແຂວງ ໄຊຍະພູມ, ປະເທດໄທ.
ຜ່ານການກວດກາຂອງເຈົ້າໜ້າທີ່ ຕມ ເຫັນວ່າໜັງສືຜ່ານແດນຂອງຜູ້ກ່ຽວແມ່ນບໍ່ມີ ຕາປະທັບແຈ້ງເຂົ້າ ສປປ ລາວ ຊຶ່ງເປັນການລະເມີດກົດໝາຍ ວ່າດ້ວຍການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ, ສະບັບເລກທີ 59/ ສພຊ, ລົງວັນທີ 26 ທັນວາ 2014 ຊຶ່ງເປັນການເຂົ້າເມືອງຜິດກົດໝາຍ ຈະຖືກປັບໃໝ 2.000.000 ກີບ ຕາມມາດຕາ 12 ຂອງ ດຳລັດວ່າດ້ວຍການປັບໃໝ ແລະ ນໍາໃຊ້ມາດຕະການອື່ນຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ ສະບັບເລກທີ ສະບັບເລກທີ 21/ລບ, ລົງວັນທີ 20 ມັງກອນ 2021, ສ່ວນຄລິບວິດີໂອທີ່ນັກທ່ອງທ່ຽວໄທ ໄດ້ໂພດສ໌ ລົງໃນສື່ສັງຄົມອອນລາຍວ່າ ເຈົ້າໜ້າທີ່ ຕມ ຮຽກເກັບເງິນ ຈໍານວນ 5.000 ບາດ ໃນເບື້ອງຕົ້ນນັ້ນເປັນພຽງການອະທິບາຍຂອງເຈົ້າໜ້າທີ່ ຕມ ເພື່ອໃຫ້ນັກທ່ອງທ່ຽວຮັບຊາບ.
ຈາກນັ້ນເຈົ້າໜ້າທີ່ ຕມ ໄດ້ເຊີນຜູ້ກ່ຽວເຂົ້າໄປຫ້ອງການຕາມລະບຽບ ເພື່ອດໍາເນີນການສືບສວນ-ສອບສວນ ເກັບກຳຂໍ້ມູນໃນເບື້ອງຕົ້ນ ຈຶ່ງສາມາດຮູ້ໄດ້ວ່າ: ໜັງສືຜ່ານແດນຂອງຜູ້ກ່ຽວບໍ່ມີຕາປະທັບແຈ້ງເຂົ້າ ສປປ ລາວ ແທ້ ຊຶ່ງເປັນການເຂົ້າເມືອງລະເມີດກົດໝາຍ ວ່າດ້ວຍການເຂົ້າອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ ຈະຖືກປັບໃໝ 2.000.000ກີບ ຕາມດໍາລັດ ວ່າດ້ວຍການປັບໃໝ ແລະ ນໍາໃຊ້ມາດຕະການອື່ນຕໍ່ຜູ້ລະເມີດ ກົດໝາຍ ແລະ ລະບຽບການກ່ຽວກັບການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ, ການຫຼົບຫຼີກການກວດກາ ຫຼື ບໍ່ປະທັບຕາແຈ້ງເຂົ້າ-ອອກ ຈາກເຈົ້າໜ້າທີ່ຕຳຫຼວດ ກວດຄົນເຂົ້າ-ອອກເມືອງ ປະຈຳດ່ານຊາຍແດນ ແລະ ສະໜາມບິນສາກົນ, ແຕ່ໃນຕົວຈິງແລ້ວ ເຈົ້າໜ້າທີ່ ຕມ ຂອງພວກເຮົາໄດ້ປັບໃໝຜູ້ກ່ຽວເປັນຈຳນວນເງິນ 700.000 ກີບ ຕາມການສະເໜີຂອງຜູ້ກ່ຽວ ແລະ ການເຫັນດີຂອງເຈົ້າໜ້າທີ່ ຕມ ຂອງພວກ ແລະໄດ້ກ່າວເຕືອນ ສຶກອົບຮົມ ອະທິບາຍໃຫ້ເຂົ້າໃຈຕໍ່ກົດໝາຍ-ລະບຽບເປັນສໍາຄັນ ພ້ອມທັງໄດ້ປະທັບຕາແຈ້ງເຂົ້າ-ອອກ ສປປ ລາວ ໃຫ້ຜູ້ກ່ຽວແລ້ວອະນຸຍາດໃຫ້ເດີນທາງອອກ ສປປ ລາວ ໃນວັນດຽວກັນ.
ຜູ້ໂດຍສານ ກໍຄື ນັກທ່ອງທ່ຽວ ທີ່ ເດີນທາງເຂົ້າ-ອອກ ສປປ ລາວ ໂດຍຜ່ານດ່ານຊາຍແດນ ແລະ ສະໜາມບິນສາກົນ ຕ້ອງປະຕິບັດຕາມກົດໝາຍ-ລະບຽບການ ຢ່າງເຂັ້ມງວດ ກໍຄືການແຈ້ງ ເອກະສານເດີນທາງຂອງຕົນຕໍ່ເຈົ້າໜ້າທີ່ ຕມ ປະຈຳດ່ານດ້ວຍຕົນເອງທຸກຄັ້ງ ແລະ ຕ້ອງມີການ ກວດກາຄືນຢ່າງລະອຽດ.
ສໍາລັບຜູ້ຊົມໃຊ້ສື່ສັງຄົມອອນລາຍປະເພດຕ່າງໆ ກໍຕ້ອງເສບຂ່າວຢ່າງມີສະຕິ ເບິ່ງຂໍ້ມູນໃນຫຼາຍດ້ານ ລວມທັງຊ່ອງ ລາຍການໂທລະພາບ, ວິທະຍຸ ແລະ ອື່ນໆ ກໍຕ້ອງໃຫ້ມີຂໍ້ມູນຄົບຖ້ວນ, ພາວະວິໄສ ເພື່ອເຮັດໃຫ້ສັງຄົມບໍ່ມີຄວາມສັບສົນ ແລະ ເຂົ້າໃຈໄປໃນທາງທີ່ຖືກຕ້ອງ ແລະທຸກຄົນໃນສັງຄົມສາມາດ ເຂົ້າເຖິງຂໍ້ມູນກ່ຽວກັບການເຂົ້າ-ອອກ ສປປ ລາວ ຕາມເວັບໄຊ
www.immigration.gov.la,
