ເມືອງຕົ້ນເຜິ້ງ ວາງສີລາລຶກສ້າງພຣະທາດ ຣັດຕະນະເຈດີ ສຸວັນນະສຣິຄູນເມືອງ ແລະ ຫລໍ່ພຣະເຈົ້າທັນໃຈ ປາງມາຣະວິໄຊ

ໃນພິທີ, ທ່ານ ອ່ອນແກ້ວ ວົງມະນີ ນາຍບ້ານໆໃຫຍ່ນໍ້າເກິ່ງໃໝ່ ໄດ້ກ່າວປະຫວັດຄວາມເປັນມາ ຂອງການສ້າງສາພັດທະນາວັດສຣີດອນຄູນ ນັບແຕ່ປະຊາຊົນເຜົ່າໄທເໜືອ ແລະ ເຜົ່າລື້ ບ້ານໃຫຍ່ນໍ້າເກິ່ງໃໝ່ ໄດ້ອົບພະຍົບຈາກເມືອງສິງ ແຂວງຫລວງນໍ້າທາ ມາຕັ້ງຖິ່ນຖານຢູ່ບ້ານໃຫຍ່ນໍ້າເກິ່ງໃໝ່ ໃນປີ 1963 ແລະ ໄດ້ສ້າງວັດສຣີດອນຄູນຂຶ້ນ ເພື່ອເປັນສູນລວມທາງຈິດໃຈ ຈົນສຳເລັດໃນປີ 1970 ພ້ອມທັງໃຫ້ຮູ້ກ່ຽວກັບຄວາມເປັນມາ ຂອງການລິເລີ່ມວາງແຜນສ້າງ ພຣະທາດ ຣັດຕະນະເຈດີສຸວັນນະສຣິຄູນເມືອງ ແລະ ພຣະພຸດທະຮູບ ພຸດທະປະຕິມາກອນ ບໍວອນໂຄຕະມະ ມະຫາສີລະວັນໂຕ ປາງມາຣະວິໄຊ ໄວ້ໃນບໍວອນພຸດທະສາສະໜາ ຕາມເຈດຕະນາຂອງຄະນະສັດທາເຄົ້າ ແລະ ຕາມການຕົກລົງເຫັນດີ ຈາກທຸກພາກສ່ວນພາຍໃນບ້ານ, ເຊິ່ງພຣະທາດຣັດຕະນະເຈດີ ສຸວັນນະສຣີຄູນເມືອງ ປະກອບມີກົມມະລຽນອ້ອມຮອບກວ້າງ 12 ແມັດມົນທົນ, ມີຂັ້ນໄດທາງຂຶ້ນ 4 ດ້ານ, ອົງພຣະທາດໃຫຍ່ ມີຂະໜາດກວ້າງ 6 ແມັດ, ສູງ 19 ແມັດ, ມີເຈດີນ້ອຍ 4 ອົງ ປະດິດສະຖານໄວ້ 4 ດ້ານ ຂອງກົມມະລຽນດ້ານນອກ ແລະ ພຣະພຸດທະຮູບປາງປະທານພອນ 4 ອົງ ສູງ 170 ຊັງຕີແມັດ ປະດິດສະຖານໄວ້ຊຸ້ມປະຕູ ຂອງອົງພຣະທາດທັງ 4 ທິດ ຄາດວ່າຈະໃຊ້ເວລາໃນການກໍ່ສ້າງ 240 ວັນ ໃຫ້ສຳເລັດ.