ເມືອງພຽງ ເປີດຂະບວນການ 3 ວັນກະສິກຳ ເພື່ອສົ່ງເສີມການລ້ຽງ ແລະ ການປູກ

ວັນທີ 15 ພະຈິກ 2023 ນີ້ ຫ້ອງການກະສິກຳ ແລະ ປ່າໄມ້ເມືອງພຽງ ແຂວງໄຊຍະບູລີ ຈັດພິທີເປີດຂະບວນການວັນຊົນລະປະທານແຫ່ງຊາດ, ວັນສັກຢາກັນພະຍາດສັດແຫ່ງຊາດ ແລະ ວັນເປີດຂະບວນການຜະລິດລະດູແລ້ງແຫ່ງຊາດ ທີ່ສູນຝາຍນ້ຳຕານ ມີທ່ານ ຄຳພັນ ຄຳພູບົວ ຮອງເຈົ້າເມືອງໆພຽງ ມີບັນດາການນຳຂອງເມືອງ, ຫົວໜ້າ, ຮອງຫົວໜ້າຫ້ອງການ, ເລຂາໜ່ວຍພັກນາຍບ້ານ, ພະນັກງານຈາກຫ້ອງການກະສິກຳ ແລະ ປ່າໄມ້ເມືອງ, ສະມາຄົມກຸ່ມຜູ້ຊົມໃຊ້ນ້ຳພ້ອມດ້ວຍຊາວກະສິກອນເຂົ້າຮ່ວມ.

ທ່ານ ສີສົມພອນ ນວນແສງສີ ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງ ໄດ້ຜ່ານບົດລາຍງານການຈັດຕັ້ງປະຕິບັດວຽກງານການຜະລິດກະສິກຳປີ 2023 ແລະ ແຜນສູ້ຊົນຜະລິດລະດູແລ້ງປີ 2024 ຊຶ່ງປັດຈຸບັນເມືອງພຽງມີເນື້ອທີ່ນາທັງໝົດ 6.800 ກວ່າເຮັກຕາ ສາມາດຜະລິດເຂົ້າໄດ້ທັງໝົດ 40 ພັນກວ່າໂຕນ ມີສັດລ້ຽງທັງໝົດ 1 ລ້ານ 5 ແສນກວ່າໂຕ ໃນນີ້ຄວາຍ 16 ພັນກວ່າໂຕ, ງົວ 30 ພັນກວ່າໂຕນ, ໝູ 50 ພັນກວ່າໂຕ ແລະ ສັດອື່ນອີກໂດຍມີເນື້ອທີ່ປູກຫຍ້າພັນປັບປຸງທັງໝົດ 1 ພັນກວ່າເຮັກຕາ ຊຶ່ງຂະແໜງກະສິກຳເມືອງໄດ້ຫັນການຜະລິດແບບທຳມະຊາດໄປສູການຜະລິດເປັນສິນຄ້າຕາມທິດຫັນກະສິກຳເປັນທັນສະໄໝໂດຍຜະລິດເປັນກຸ່ມເປັນຟາມ ຊຶ່ງທົ່ວເມືອງມີກຸ່ມປູກ-ກຸ່ມລ້ຽງທັງໝົດ 100 ກວ່າກຸ່ມ ແລະ ມີຊົນລະປະທານ 270 ກວ່າແຫ່ງ ໃນນີ້ຊົນລະປະທານແບບປະຖົມປະຖານ 210 ກວ່າແຫ່ງ, ຝາຍນ້ຳລົ້ນ 30 ກວ່າແຫ່ງ, ອ່າງເກັບນ້ຳ 5 ແຫ່ງ ແລະ ຄູຕັນນ້ຳ 18 ແຫ່ງ ສຳລັບການຜະລິດລະດູແລ້ງ 2023-2024 ເປັນຕົ້ນແມ່ນນາແຊງໃຫ້ໄດ້ 1 ພັນເຮັກຕາ ໂດຍເລັ່ງໃສ່ເຂດຊົນລະປະທານນ້ຳພຽງເບີ 1, ເບີ 2, ເບີ 3, ເບີ 4, ຝາຍນ້ຳເຮ້ຍ, ຝາຍນ້ຳຕານ ແລະ ບ່ອນອື່ນທີມີເງື່ອນໄຂ, ສົ່ງເສີມການປູກພືດລະດູແລ້ງໃຫ້ໄດ້ 1.400 ເຮັກຕາ ເປັນຕົ້ນແມ່ນ ສາລີຫວານ, ໝາກໂມ, ໝາກແຕງ, ຖົ່ວເຫຼືອງ ແລະ ພືດຜັກອື່ນໆພ້ອມທັງສຸມໃສ່ສັກຢາປ້ອງກັນພະຍາດສັດໃຫ້ໄດ້ 2 ຄັ້ງຕໍ່ປີ.

ທ່ານ ຄຳພັນ ຄຳພູບົວ ໄດ້ກ່າວເປີດຂະບວນການດັ່ງກ່າວຢ່າງເປັນທາງການພ້ອມທັງຮຽງຮ້ອງມາຍັງຂະແໜງການທີ່ກ່ຽວຂ້ອງ ແລະ ປະຊາຊົນບັນດາເຜົ່າເອົາໃຈໃສ່ຮັບປະກັນດ້ານສະບຽງອາຫານ ແລະ ຜະລິດເປັນສິນຄ້າ ໂດຍຫັນການຜະລິດກະສິກຳໃຫ້ເປັນທັນສະໄໝຕິດພັນກັບການຕະຫຼາດເພື່ອພ້ອມກັນບັນລຸຍຸດທະສາດຂອງເມືອງທີ່ວ່າ: ສ້າງເມືອງພຽງ ໃຫ້ເປັນເມືອງຜະລິດສະບຽງອາຫານຕິດພັນກັບການປຸງແຕ່ງສົ່ງອອກ ພັດທະນາການບໍລິການທາງຜ່ານ ແລະ ການທ່ອງທ່ຽວທີ່ເປັນມິດກັບສິ່ງແວດລ້ອມ ແລະ ໃນໂອກາດນີ້ຄະນະປະທານພ້ອມດ້ວຍແຂກເຂົ້າຮ່ວມກໍໄດ້ເປີດນ້ຳຊົນລະປະທານຝາຍນ້ຳຕານ, ສັກຢາກັນພະຍາດສັດ ແລະ ຮ່ວມສາທິດການເຮັດນາຢອດແຫ້ງເພື່ອເປັນການເປີດຂະບວນການ 3 ວັນດັ່ງກ່າວໃຫ້ເປັນຂະບວນການຢ່າງຟົດຟື້ນ.