ຈີນ, ກຳປູເຈຍ, ລາວ, ມາເລເຊຍ,ໄທ ແລະ ຫວຽດນາມ ເປີດການຊ້ອມຮົບຮ່ວມຫລາຍຝ່າຍ ພາຍໃຕ້ຫົວຂໍ້ “ສັນຕິພາບ-ມິດຕະພາບ 2023”

ຂ່າວໜັງສືພິມກອງທັບປະຊາຊົນລາວ ລາຍງານວ່າ: ວັນທີ 13 ພະຈິກ 2023 ນີ້ ກອງທັບປະຊາຊົນລາວໄດ້ເຂົ້າຮ່ວມ ຊ້ອມຮົບຮ່ວມຫລາຍຝ່າຍ ພາຍໃຕ້ຫົວຂໍ້ “ສັນຕິພາບ-ມິດຕະພາບ 2023” (AMAN YOUYI-2023) ທີ່ເມືອງຈ້ານຈຽງ ແຂວງກວາງຕຸ້ງ  ສປ ຈີນ  ໂດຍຮ່ວມກັບ 6 ປະເທດຄື: ຈີນ, ລາວ, ກຳປູເຈຍ, ມາເລເຊຍ, ໄທ ແລະ ຫວຽດນາມ ໂດຍການເປັນປະທານຂອງ ພົນໂທ ຈິງຈ້ຽນເຟິງ ຄະນະກຳມະການທະຫານສູນກາງ ຮອງຫົວໜ້າເສນາທິການກົມເສນາທິການປະສານເຫລົ່າ ກອງທັບປົດປ່ອຍປະຊາຊົນຈີນ, ເຊິ່ງລາວເຮົານຳໂດຍ ພົນຕີ ພັນແສງ ບຸນພັນ ຮອງຫົວໜ້າກົມໃຫຍ່ເສນາທິການ ກອງທັບປະຊາຊົນລາວ.

ພົນຕີ ພັນແສງ ບຸນພັນ ຮອງຫົວໜ້າກົມໃຫຍ່ເສນາທິການ ກອງທັບປະຊາຊົນລາວ ມີຄຳເຫັນວ່າ: ການຝຶກຊ້ອມໃນຄັ້ງນີ້, ຖືເປັນນິມິດໝາຍອັນສຳຄັນ ແລະ ເປັນບາດກ້າວອັນໃໝ່ ໃຫ້ແກ່ກອງທັບໃນພາກພື້ນ ໄດ້ມີໂອກາດຝຶກຊ້ອມດ້ານກຳລັງທະຫານຮ່ວມກັນ ໂດຍສະເພາະແມ່ນການຝຶກຊ້ອມຮ່ວມກຳລັງປະກອບອາວຸດ ກອງທັບປົດປ່ອຍປະຊາຊົນຈີນ ເຊິ່ງເປັນການສ້າງໂອກາດອັນດີ ໃຫ້ນາຍ ແລະ ພົນທະຫານແຕ່ລະປະເທດ ໄດ້ມີການແລກປ່ຽນຄວາມຮູ້, ບົດຮຽນ, ປະສົບການດ້ານທິດສະດີ, ຫຼັກກາານ ແລະ ຍຸດທະວິທີໃນການສູ້ຮົບໂຈມຕີ ເພື່ອສ້າງໃຫ້ກໍາລັງຂອງຕົນມີຄວາມຊໍານິຊໍານານ, ມີປະສົບການ ແລະ ຄວາມພ້ອມໃນການຕໍ່ສູ້ຕ້ານກັບກຸ່ມຄົນ ແລະ ປະເທດທີ່ບໍ່ຫວັງດີ ທີ່ຍາມໃດກໍຫວັງມ້າງເພທຳລາຍກໍ່ຄວາມບໍ່ສະຫງົບ ໃຫ້ແກ່ບັນດາປະເທດໃນພາກພື້ນ, ເວົ້າສະເພາະ ກໍເພື່ອປົກປັກຮັກສາສັນຕິພາບໃນພາກພື້ນ ແລະ ໃນໂລກໃຫ້ມີຄວາມໝັ້ນຄົງ ແລະ ວັດທະນາຖາວອນ.         ການຊ້ອມຮົບຮ່ວມຫຼາຍຝ່າຍໃນຄັ້ງນີ້, ບໍ່ພຽງແຕ່ເປັນການຝຶກຊ້ອມດ້ານພາລະກຳລັງຮ່ວມກັນເທົ່ານັ້ນ ແຕ່ຍັງເປັນໂອກາດອັນດີໃຫ້ແກ່ນາຍ ແລະ ພົນທະຫານ ຈາກບັນດາປະເທດທີ່ເຂົ້າຮ່ວມໄດ້ມີໂອກາດພົບປະໂອ້ລົມແລກປ່ຽນວັດທະນະທຳ ແລະ ເປັນການສ້າງຄວາມສາມັກຄີອັນສະໜິດສະໜົມ ກັບນາຍ ແລະ ພົນທະຫານຈາກກອງທັບປົດປ່ອຍປະຊາຊົນຈີນກັນຫຼາຍຂຶ້ນ  ເຊິ່ງເປັນພື້ນຖານອັນດີໃນການເສີມສ້າງໄມຕີຈິດມິດຕະພາບ ລະຫວ່າງບັນດາກອງທັບ ໃນປະເທດອາຊຽນ ແລະ ສປ ຈີນ ໃຫ້ມີຄວາມແໜ້ນແຟ້ນຂຶ້ນໄປເທື່ອລະກ້າວ.

#ຂ່າວພາຍໃນລາວພັດທະນາ #ຊ້ອມຮົບຮ່ວມຫລາຍຝ່າຍ