ສະຫະປະຊາຊາດເຜີຍ ອາຊີໃຕ້ປະສົບບັນຫາຂາດເຂີນນໍ້າ “ຮ້າຍແຮງທີ່ສຸດໃນໂລກ”

ສະຫະປະຊາຊາດ (UN) ລະບຸວ່າ: ເດັກນ້ອຍຈໍານວນຫລາຍຢູ່ອາຊີໃຕ້ກໍາລັງປະສົບຄວາມລໍາບາກ ເນື່ອງຈາກການຂາດເຂີນນໍ້າຮ້າຍແຮງກວ່າພາກພື້ນອື່ນທົ່ວໂລກ ເຊິ່ງເປັນຜົນກະທົບຂອງການປ່ຽນແປງສະພາບອາກາດ.

ສໍານັກຂ່າວຕ່າງປະເທດລາຍງານວ່າ: ວັນທີ 13 ພະຈິກ, ກອງທຶນເພື່ອເດັກແຫ່ງສະຫະປະຊາຊາດ (ອຸຍນີເຊບ) ລະບຸໃນລາຍງານວ່າ: ເດັກນ້ອຍອາຍຸຕໍ່າກວ່າ 18 ປີ ປະມານ 347 ລ້ານຄົນ ຕ້ອງຜະເຊີນບັນຫາການຂາດເຂີນນໍ້າທີ່ສູງ ຫລື ສູງຫລາຍໃນອາຊີໃຕ້ ເຊິ່ງຖືເປັນອັນຕະລາຍສູງສຸດໃນບັນດາພາກພື້ນຕ່າງໆທົ່ວໂລກ.

“ການປ່ຽນແປງສະພາບອາກາດກໍາລັງທໍາລາຍຮູບແບບສະພາບອາກາດ ແລະ ປະລິມານນໍ້າຝົນ ສົ່ງຜົນເຮັດໃຫ້ບໍ່ສາມາດຄາດຄະເນປະລິມານນໍ້າສໍາລັບການນຳໃຊ້ໄດ້”. UN ລະບຸອີກໃນລາຍງານ ໂດຍກ່າວເຖິງບັນຫາດ້ານອື່ນນອກເໜືອຈາກການປ່ຽນແປງສະພາບອາກາດ ບໍ່ວ່າຈະເປັນຄຸນນະພາບນໍ້າທີ່ບໍ່ດີ, ການຂາດເຂີນນໍ້າ ແລະ ການແກ້ໄຂທີ່ບໍ່ຖືກຕ້ອງເຊັ່ນ: ການສູບນໍ້າອອກຈາກຊັ້ນຫີນອູ້ມນໍ້າຫລາຍເກີນໄປ.

ທັງນີ້, ອຸຍນິເຊບ ກ່າວວ່າ: ຈະຮຽກຮ້ອງໃຫ້ບັນດາຜູ້ນໍາ “ຮັກສາໂລກທີ່ໜ້າຢູ່” ໃນກອງປະຊຸມລັດພາຄີອະນຸສັນຍາສະຫະປະຊາຊາດ ວ່າດ້ວຍການປ່ຽນແປງສະພາບອາກາດ ຕາມຂອບຂອງອະນຸສັນຍາສະຫະປະຊາຊາດ ວ່າດ້ວຍການປ່ຽນແປງສະພາບອາກາດ (UNFCCC) ຄັ້ງທີ 28 ເຊິ່ງຈະມີຂຶ້ນຢູ່ເມືອງດູໄບ ໃນເດືອນທັນວານີ້.