ມາເຂົ້າໃຈກັນຕື່ມອີກຂອງຕະຫຼາດຜັກປອດສານພິດ
ຂະແໜງສົ່ງເສີມກະສິກໍາ ແລະ ສະຫະກອນ ນະຄອນຫຼວງວຽງຈັນ ໃຫ້ຮູ້ວ່າ: ຕະຫຼາດຜັັກປອດສານພິດ ແມ່ນຕະຫຼາດຂອງຊາວກະສິກອນ ຊຶ່ງສ້າງຕັ້ງຂຶ້ນ ພາຍໃຕ້ການຊີ້ນໍາຂອງຂະແໜງການກະສິກໍາ ແລະ ປ່າໄມ້ ໂດຍລັດຖະບານໄດ້ມີນະໂຍບາຍ ສະໜັບສະໜູນໃຫ້ຊາວກະສິກອນ ຈັດຕັ້ງການຜະລິດແບບເປັນກຸ່ມ ພ້ອມທັງເອື້ອອໍານວຍຄວາມສະດວກໃຫ້ແກ່ກຸ່ມໃນການຈໍາໜ່າຍຜົນຜະລິດ, ກຸ່ມປູກຜັກອິນຊີໄດ້ປູກພືດຜັກຂອງຕົນຕາມມາດຕະຖານກະສິກໍາ ອິນຊີລາວ ແລະ ຜົນການຜະລິດຂອງກຸ່ມອິນຊີ ນໍາມາຈໍາໜ່າຍຢູ່ໃນຕະຫຼາດດັ່ງກ່າວ ແລະ ສົ່ງເສີມໃຫ້ສະມາຊິກກຸ່ມ ມີລາຍຮັບ ແລະ ສາມາດຫຼຸດພົ້ນອອກຈາກຄວາມທຸກຍາກໄດ້. ພ້ອມຊ່ວຍໃຫ້ຜູ້ບໍລໂພກ ໄດ້ບໍລິໂພກພືດຜັກທີ່ປອດໄພ ເພາະວ່າພືດຜັກດັ່ງກ່າວ ມີການກວດກາຕັ້ງແຕ່ຂອດການຜະລິດ ຈົນຮອດການນໍາມາຈໍາໜ່າຍຢູ່ໃນຕະຫຼາດ ໂດຍໄດ້ຮັບການຢັ້ງຢືນມາດຕະຖານກະສິກໍາອິນຊີລາວ ແລະ ຂະແໜງການກ່ຽວຂ້ອງເປັນຢ່າງດີ ນອກຈາກນີ້ ຜັກປອດສານພິດ ຍັງສາມາດເກັບຮັກສາໄວ້ໄດ້ດົນ ແລະ ມີລາຄາເໝາະສົມ ເມື່ອທຽບໃສ່ຄຸນນະພາບຂອງຜັກ.
+ດີໃຈທີ່ມີຕະຫລາດຜັກປອດສານພິດ ແຕ່ຈະຄຸ້ມຄອງມັນແນວໃດໃຫ້ຍືນຍົງ
ຂະແໜງສົ່ງເສີມກະສິກໍາ ແລະ ສະຫະກອນ ນະຄອນຫຼວງວຽງຈັນ ໃຫ້ຮູ້ອີກວ່າ: ການຄຸ້ມຄອງບໍລິຫານຢູ່ໃນຕະຫຼາດປອດສານພິດ ແມ່ນປະຕິບັດຕາມກົດລະບຽບຂອງຕະຫຼາດ, ມີຄະນະກໍາມະການບໍລິຫານ ແລະ ກວດກາເປັນປະຈໍາ, ເພື່ອສ້າງຄວາມເຂັ້ມແຂງໃຫ້ກຸ່ມຜະລິດ ແລະ ເພື່ອພັດທະນາຕະຫຼາດເຊັ່ນ: ວັນຈັນ ແລະ ວັນພະຫັດ ຈັດຢູ່ສວນເຈົ້າຟ້າງຸ່ມ, ວັນພຸດ ແລະ ວັນອາທິດ ຈັດຢູ່ສູນການຄ້າວຽງຈັນເຊັນເຕີ, ວັນພຸດ ແລະ ວັນເສົາ ຈັດຢູ່ທາດຫຼວງ ແລະ ວັນເສົາ ຈັດຢູ່ຕະຫຼາດຫ້ວຍຫົງ. ສໍາລັບສະຖານທີ່ຈັດຕະຫຼາດປອດສານພິດແບບຖາວອນນັ້ນ ພາກລັດກໍາລັງປຶກສາຫາລື ແລະ ຄົ້ນຄວ້າສະຖານທີ່ ທີ່ເໝາະສົມ ເພື່ອໃຫ້ຜູ້ບໍລິໂພກເຂົ້າເຖິງໄດ້ງ່າຍຂຶ້ນ.
